ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກຳ ແລະ ການຄ້າ (ອຄ) ຂື້ນປາໄສໃນເວທີ ການຮ່ວມມືດ້ານເສດຖະກິດການຄ້າລະຫວ່າງລາວ-ຈີນ ພາຍໃຕ້ຫົວຂໍ້ “ການເປີດປະຕູສູ່ໂລກພາຍນອກທີ່ມີຄຸນນະພາບສູງ ແລະ ການກໍ່ສ້າງຄູ່ຮ່ວມຊາຕາກຳລາວ-ຈີນ” ໃນກອງປະຊຸມແລກປ່ຽນການຮ່ວມມືດ້ານເສດຖະກິດການຄ້າ ລາວ-ຈີນ ຂື້ນໃນວັນທີ 5 ກັນຍາ 2024, ທີ່ນະຄອນຫຼວງວຽງຈັນ.
ທ່ານລັດຖະມົນຕີ ໄດ້ກ່າວວ່າ: ລາວ ແລະ ຈີນ ມີຊາຍແດນຕິດຈອດກັນ, ມີສາຍພົວພັນມິດຕະພາບທີ່ມີມາແຕ່ດົນນານ ເປັນຄູ່ຮ່ວມຍຸດທະສາດຮອບດ້ານ ໜັ້ນຄົງຍາວນານ, ເປັນບ້ານໃກ້ເຮືອນຄຽງທີ່ດີ, ເປັນເພື່ອນທີ່ດີ, ເປັນສະຫາຍທີ່ດີ ແລະ ເປັນຄູ່ຮ່ວມມືທີ່ດີ. ສອງປະເທດ ໄດ້ຍົກລະດັບການຮ່ວມມື ເປັນຄູ່ຮ່ວມຊາຕາກໍາລາວ-ຈີນ ໃນປີ 2019 ເຮັດໃຫ້ການຮ່ວມມືຮອບດ້ານລະຫວ່າງ 2 ປະເທດ ຍີ່ງມີຄວາມກວ້າງຂວາງ, ເລິກເຊີ່ງ ແລະ ໜັກ ແໜ້ນ, ການຮ່ວມມືດ້ານເສດຖະກິດ-ການຄ້າ ລະຫວ່າງ ລາວ-ຈີນ ກໍໄດ້ພັດທະນາຢ່າງວ່ອງໄວ ແລະ ມີຄຸນນະພາບ, ໄດ້ປະກອບສ່ວນອັນສໍາຄັນເຂົ້າໃນການພັດທະນາເສດຖະກິດ-ສັງຄົມຂອງລາວ. ການກໍ່ສ້າງໂຄງການທາງລົດໄຟລາວ-ຈີນ ໄດ້ກາຍເປັນເງື່ອນໄຂໃຫ່ມ, ເປັນຊ່ອງທາງ ທີ່ສ້າງຄວາມສະດວກ, ເພີ່ມຄວາມວ່ອງໄວ, ຫລຸດຕົ້ນທຶນການຂົນສົ່ງ ແລະ ໄປມາຫາສູ່, ທັງເປັນສັນຍາລັກຂອງການຮ່ວມມືແບບພິເສດລະຫວ່າງລາວ-ຈີນ ທີ່ກໍາລັງປະກອບສ່ວນອັນສໍາຄັນໃນການຫັນປ່ຽນໂຄງສ້າງເສດຖະກິດຂອງ ສປປ ລາວ ໃຫ້ເຊື່ອມໂຍງ ແລະ ເຊື່ອມຈອດກັບອາຊຽນ ແລະ ສປ ຈີນ ໃຫ້ໄວຂື້ນ ເຊິ່ງຈະປ່ຽນໂສມໜ້າຂອງການພັດທະນາຂອງ ສປປ ລາວ ໃນອານະຄົດ.
ກ່ອນອື່ນໃນນາມ ກະຊວງອຸດສາຫະກໍາ ແລະ ການຄ້າ ມີຄວາມຍິນດີທີ່ຈະຮ່ວມກັບຝ່າຍຈີນ ຜັນຂະຫຍາຍ ແລະ ປະຕິບັດທິດນໍາຂອງການນຳຂັ້ນສູງຂອງສອງປະເທດ, ເພີ່ມການຕິດຕໍ່ປະສານງານ ເພື່ອຊຸກຍູ້ການຈັດຕັ້ງປະຕິ ບັດແຜນກໍ່ສ້າງຄູ່ຮ່ວມຊາຕາກຳລາວ-ຈີນ ສະບັບໃໝ່ ແລະ ຂະຫຍາຍການຮ່ວມມືໃຫ້ກວ້າງຂວາງ ແລະ ຮອບດ້ານ, ເພື່ອຜັນຂະຫຍາຍແນວຄິດຈິດໃຈທີ່ສຳຄັນຂອງການນຳສູງສຸດຂອງສອງປະເທດໃຫ້ມີຜົນສຳເລັດ ແລະ ເປັນຮູບປະທຳ, ສົ່ງເສີມການສ້າງຄູ່ຮ່ວມຊາຕາກໍາລາວ-ຈີນໃຫ້ກ້າວຂຶ້ນສູ່ລະດັບໃໝ່; ອັນທີອງ ສືບຕໍ່ສົ່ງເສີມການຮ່ວມມືດ້ານເສດຖະກິດ-ການຄ້າລະຫວ່າງລາວ-ຈີນ, ຊຸກຍູ້ໃຫ້ຂໍ້ລິເລີ່ມ “ໜຶ່ງແລວ, ໜຶ່ງເສັ້ນທາງ” ຂອງຈີນໄດ້ເຊື່ອມຕໍ່ກັບຍຸດທະສາດຂອງລາວ ແລະ ຂອງອາຊຽນ ທີ່ຫັນຈາກປະເທດທີ່ບໍ່ມີທາງອອກສູ່ທະເລເປັນປະເທດທີ່ເຊື່ອມໂຍງ ແລະ ເຊື່ອມຈອດທາງບົກ, ຊຸກຍູ້ການກໍ່ສ້າງແລວເສດຖະກິດລາວ-ຈີນ, ສົ່ງເສີມໃຫ້ລາວ ກາຍເປັນປະຕູ ແລະ ເປັນຂົວຕໍ່ໃຫ່ຍໜື່ງ ທີ່ເຊື່ອມຈີນ ແລະ ອາຊຽນ ໃຫ້ແໜ້ນແຟ້ນ ແລະ ນໍາເອົາຜົນປະໂຫຍດມາສູ່ສອງຝ່າຍ; ອັນທີສາມ ຍິນດີຕ້ອນຮັບບັນດາວິສາຫະກິດຂອງຈີນ ແລະ ປະເທດຕ່າງໆໄປລົງທຶນພັດທະນາຢູ່ລາວ, ຮ່ວມມືພັດທະນາພື້ນຖານໂຄງລ່າງ, ການພັດທະນາພະລັງງານ, ການຜະລິດ, ການທ່ອງທ່ຽວ ແລະ ບໍລິການ ເພື່ອຜົນປະໂຫຍດຂອງສອງຝ່າຍ, ຕັ້ງໜ້າສົ່ງເສີມການຮ່ວມມືລະຫວ່າງວິສາຫະກິດລາວ ແລະ ວິສາຫະກິດຈີນ, ເພື່ອຮ່ວມກັນບຸກເບີກຕະຫຼາດສາກົນ; ອັນທີສີ່ ໃນປີ 2024 ນີ້, ສປປ ລາວ ເປັນປະທານອາຊຽນ ພາຍໃຕ້ຄໍາຂວັນ: “ Enhancing Connectivity and Resilience ” ຫລື “ ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ ” ກະຊວງອຸດສາຫະກໍາ ແລະ ການຄ້າ ໃນນາມເປັນປະທານຂອງເສົາຄໍ້າເສດຖະກິດອາຊຽນ ກໍໄດ້ຜັກດັນ ແລະ ໄດ້ຮັບການສະໜັບສະໜູນ ຈາກປະເທດສະມາຊິກໃນການຈັດຕັ້ງປະຕິບັດ 14 ບູລິມະສິດ ທາງດ້ານເສດຖະກິດອາຊຽນ ເຊິ່ງປະກອບດ້ວຍ ສາມກຸ່ມຍຸດທະສາດຄື : ການເຊື່ອມໂຍງ ແລະ ເຊື່ອມຈອດດ້ານເສດຖະກິດ, ການສ້າງອານາຄົດ ແບບຍືນຍົງ ແລະ ທຸກພາກສ່ວນມີສ່ວນຮ່ວມ; ແລະ ການຫັນປ່ຽນເທື່ອລະກ້າວ ໄປສູ່ ດິີຈິຕ້ອນ ໃນອານາຄົດ; ອັນທີຫ້າ ກະຊວງອຸດສາຫະກຳ ແລະ ການຄ້າ ສປປ ລາວ ຍິນດີທີ່ຈະເພີ່ມການຮ່ວມມື ແລະ ແລກປ່ຽນກັບບັນດາອົງການສື່ມວນຊົນ ແລະ ອົງການຈັດຕັ້ງດ້ານຄັງປັນຍາຂອງສອງປະເທດລາວ-ຈີນ ໃນນັ້ນລວມມີສຳນັກການສື່ສານຕ່າງປະເທດ ສປ ຈີນ (CICG), ຜ່ານການໂຄສະນາຂອງບັນດາສື່ມວນຊົນ.
ຕອນທ້າຍທ່ານເຊື່ອໝັ້ນວ່າ ພາຍໃຕ້ຄວາມພະຍາຍາມຮ່ວມກັນຂອງລັດຖະບານ ແລະ ປະຊາຊົນສອງຊາດລາວ-ຈີນ, ລວມທັງການສະໜັບສະໜູນຂອງບັນດາແຂກຜູ້ມີກຽດທີ່ເຂົ້າຮ່ວມເວທີປາໄສໃນມືື້ນີ້, ການຮ່ວມມືດ້ານເສດຖະກິດ-ການຄ້າລະຫວ່າງລາວ-ຈີນ ຈະປະສົບຜົນສຳເລັດທີ່ຈົບງາມ ຈະນຳເອົາຜົນປະໂຫຍດສູ່ປະຊາຊົນສອງຊາດໄດ້ຫຼາຍຂຶ້ນກວ່າເກົ່າ, ທັງປະກອບສ່ວນອັນໃຫຍ່ຫຼວງເຂົ້າໃນ ການຮັກສາສັນຕິພາບ, ການພັດທະນາ ແລະ ຄວາມຈະເລີນຮຸ່ງເຮືອງໃນພາກພື້ນ.
ພາບ-ຂ່າວ: ສູນສະຖິຕິ ແລະ ຂໍ້ມຸນຂ່າວສານ ຫອຄ
