ກະຊວງອຸດສາຫະກຳ ແລະ ການຄ້າ ໄດ້ຈັດກອງປະຊຸມສຳມະນາ ກ່ຽວກັບ ການຍົກສູງຄຸນນະພາບການເປັນເສນາທິການທີດີ ໃຫ້ແກ່ຄະນະພັກ-ຄະນະນຳກະຊວງ ຂຶ້ນໃນວັນທີ 21 ຕຸລາ 2024, ທີ່ຫ້ອງປະຊຸມໃຫ່ຍຊັ້ນ I ຕືກກະຊວງອຸດສາຫະກຳ ແລະ ການຄ້າ ໂດຍພາຍໃຕ້ການເປັນປະທານຂອງ ສະຫາຍ ມະໄລທອງ ກົມມະສິດ ກໍາມະການສໍາຮອງສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີກະຊວງອຸດສາຫະກໍາ ແລະ ການຄ້າ. ຊຶ່ງມີບັນດາທ່ານຮອງລັດຖະມົນຕີ, ຫົວໜ້າ, ຮອງຫົວໜ້າຫ້ອງການ, ບັນດາກົມ, ສຳນັກງານ ແລະ ສະຖາບັນອຸດສາຫະກຳ ແລະ ການຄ້າ ພ້ອມດ້ວຍແຂກຖືກເຊີນຈາກອ້ອມຂ້າງ ແລະ ວິຊາການຈາກພາກສ່ວນກ່ຽວຂ້ອງເຂົ້າຮ່ວມທັງໝົດຈໍານວນ 100 ກວ່າທ່ານ. ຈຸດປະສົງຂອງການຈັດກອງປະຊຸມສໍາມະນາໃນຄັ້ງນີ້ ເພື່ອເພີ່ມທະວີຄຸນນະພາບໃນການເປັນເສນາທິການຂອງຄະນະພັກ-ຄະນະນຳ ຂອງແຕ່ລະກົມກອງທົ່ວອົງຄະນະພັກ ໃນການເປັນຜູ້ຊ່ວຍຄະນະພັກ-ຄະນະນຳກະຊວງໃນການໃຫ້ຄຳແນະນຳ ແລະ ຊ່ວຍຈັດຕັ້ງຜັນຂະຫຍາຍບັນດາມະຕິຄຳສັ່ງຂອງຂັ້ນເທິງ ແລະ ຂອງອົງຄະນະພັກກະຊວງ ໃຫ້ສຳເລັດຕາມກຳນົດໝາຍ.

ໃນກອງປະຊຸມສໍາມະນາ ຍັງໄດ້ຮັບຟັງການນໍາສະເໜີກ່ຽວກັບ ວຽກງານເປັນເສນາທິການຈາກ 3 ສະຫາຍ ຄື: ສະຫາຍ ປອ ບົວວັນ ວິລະວົງ, ຄະນະປະຈຳພັກ-ຫົວໜ້າຫ້ອງການກະຊວງ, ສະຫາຍ ນາງ ກິ່ງສະດອນ ເພັດດາວເຮືອງ, ຄະນະພັກກະຊວງ-ຫົວໜ້າກົມຈັດຕັ້ງ ແລະ ພະນັກງານ, ແລະ ສະຫາຍ ເກີທ່າວ ເຈິເຈັ່ງ, ຮອງປະທານຄະນະກວດກາພັກ-ຮອງຫົວໜ້າກົມກວດກາ. ນອກນັ້ນ, ກອງປະຊຸມຍັງໄດ້ເປີດກວ້າງໃຫ້ຜູ້ເຂົ້າຮ່ວມໄດ້ປຶກສາຫາລື ແລະ ແລກປ່ຽນຄຳຄິດຄຳເຫັນເຊິ່ງກັນ ແລະ ກັນຢ່າງກົງໄປກົງມາ.

ໃນໂອກາດດຽວກັນນີ້, ທ່ານປະທານກອງປະຊຸມຍັງໄດ້ໃຫ້ກຽດໂອ້ລົມ ແລະ ສະແດງຄວາມຊົມເຊີຍຕໍ່ກອງປະຊຸມສຳມະນາດັ່ງກ່າວ ຊຶ່ງເປັນບົດບາດໜຶ່ງທີ່ສຳຄັນ, ເຫັນໄດ້ວ່າວຽກງານການເປັນເສນາທິການແມ່ນເປັນວຽກງານໜຶ່ງທີ່ຂາດບໍ່ໄດ້ ແລະ ໃຫ້ມີການແລກປ່ຽນບົດຮຽນເຊິ່ງກັນລະກັນ. ພ້ອມນັ້ນ, ທ່ານຍັງໄດ້ຮຽກຮ້ອງມາຍັງພະນັກງານວິຊາການຈົ່ງສືບຕໍ່ຍົກລະດັບວິຊາສະເພາະຂອງຕົນເອງເພື່ອມາພັດທະນາໝູນໃຊ້ເຂົ້າໃນການປະຕິບັດໜ້າວຽກງານວິຊາສະເພາະຂອງຂະແໜງອຸດສາຫະກຳ ແລະ ການຄ້າ ໃຫ້ມີປະສິດທິພາບ ແລະ ປະສິດທິຜົນ.