ໃນລະຫວ່າງວັນທີ 23-24 ກັນຍາ 2024 ຜ່ານມາ, ທີ່ໂຮງແຮມລາວພລາຊາ, ນະຄອນຫຼວງວຽງຈັນ ສໍານັກງານສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ (ສຈນກ), ກະຊວງອຸດສາຫະກຳ ແລະ ການຄ້າ ໃນນາມຈຸດປະສານງານວຽກງານຄະນະກຳມະການ ຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ອາຊຽນຂອງ ສ ປ ປ ລາວ ໄດ້ຈັດກອງປະຊຸມທຸລະກິດແບບທົ່ວເຖິງ ອາຊຽນ ຄັ້ງທີ 7 (Seventh ASEAN Inclusive Business Forum) ຊຶ່ງກອງປະຊຸມດັ່ງກ່າວ ແມ່ນເປັນໜຶ່ງໃນກອງປະຊຸມທີ່ ສນຈກ ເປັນເຈົ້າພາບໃນໄລຍະທີ່ ສປປ ລາວ ເປັນປະທານອາຊຽນໃນປີ 2024, ໃຫ້ກຽດເຂົ້າຮ່ວມ ແລະ ກ່າວເປີດກອງປະຊຸມໂດຍ ທ່ານ ບຸນເຖິງ ດວງສະຫວັນ, ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ແລະ ມີຜູ້ເຂົ້າຮ່ວມທັງໝົດ 200 ກວ່າທ່ານ  ຈາກພາຍໃນ, ພາກພື້ນ ແລະ ສາກົນ ຊຶ່ງເປັນ ເຈົ້າພາບຮ່ວມຈັດ ໂດຍອົງການ ESCAP, OECD, ກອງເລຂາອາຊຽນ ແລະ ຮ່ວມສະໜັບສະໜຸນໂດຍອົງການ OXFAM ແລະ Asia Foundation.

ເລີ່ມແຕ່ປີ 2017 ເປັນຕົ້ນມາ, ວຽກງານທຸລະກິດແບບທົ່ວເຖິງ (IB) ໄດ້ຖືກຮັບຮອງໂດຍຜູ້ນຳອາຊຽນ, ມີຈຸດປະສົງໃນການສ້າງສະພາບແວດລ້ອມການສົ່ງເສີມ IB ໃນພາກພື້ນໃຫ້ມີການເຕີບໃຫຍ່. ໃນປີ 2023 ກອງປະຊຸມລັດຖະມົນຕີເສດຖະກິດ ອາຊຽນ (AEM) ຄັ້ງທີ 55 ໄດ້ຮັບຮອງເອົາແຜນການດຳເນີນງານ ເພື່ອສົ່ງເສີມການດຳເນີນທຸລະກິດແບບທົ່ວເຖິງໃນອາຊຽນ (2023-2027), ກຳນົດບັນດາຂົງເຂດບູລິມະສິດ ເພື່ອເພີ່ມທະວີການຮ່ວມມືໃນພາກພື້ນກ່ຽວກັບ IB, ລວມມີການໃຫ້ຄຳປຶກສາດ້ານນະໂຍບາຍ, ສະໜູນການສົ່ງເສີມ IB ໃຫ້ເປັນນະໂຍບາຍພັດທະນາເສດຖະກິດລະດັບຊາດ ແລະ ການອອກແບບເຄື່ອງມືນະໂຍບາຍສະເພາະ ການສົ່ງເສີມທຸລະກິດແບບທົ່ວເຖິງໃນອາຊຽນ, ໃນກອງປະຊຸມລັດຖະມົນຕີເສດຖະກິດ ອາຊຽນ (AEM) ຄັ້ງທີ 56 ປີ 2024 ທີ່ ສປປ ລາວ ເປັນເຈົ້າພາບ ນີ້ກໍ່ໄດ້ຮັບຮອງເອົາແຜນສ້າງລະບຽບການຢັ້ງຢືນ ທຸລະກິດແບບທົ່ວເຖິງອາຊຽນ.

ການຈັດກອງປະຊຸມທຸລະກິດແບບທົ່ວເຖິງ ອາຊຽນ ຄັ້ງທີ 7  ນີ້ ແມ່ນໄດ້ເນັ້ນ ປຶກສາຫາລືແລກປ່ຽນຄວາມຮູ້ ກ່ຽວກັບການຈັດຕັ້ງປະຕິບັດທີ່ດີກ່ຽວກັບການສົ່ງເສີມ IB ເພື່ອຊຸກຍູ້ທຸລະກິດແບບທົ່ວເຖິງໃຫ້ເຕີບ ໃຫຍ່ເຂັ້ມແຂງ, ແບ່ງປັນເຄື່ອງມືໃຫ້ບັນດາວິສາຫະກິດສາມາດເປັນຄູຝຶກໃຫ້ວິສາຫະກິດດ້ວຍກັນ, ແລກປ່ຽນ ບົດຮຽນກ່ຽວກັບກຳນົດກົນໄກ ແລະ ວິທີການທີ່ຊ່ວຍເຮັດໃຫ້ບັນດາທຸລະກິດ ສາມາດເຂົ້າເຖິງແຫຼ່ງທຶນ ໃນ ເງື່ອນໄຂທີ່ຕ້ອງຜ່ານການປະເມີນຜົນກະທົບຕໍ່ສັງຄົມ, ເຮັດໃຫ້ບັນດາວິສາຫະກິດທີ່ເຂົ້າຮ່ວມ ເຂົ້າໃຈໃນການຕີລາຄາດ້ວຍຕົນເອງວ່າລັກສະນະແບບໃດ ແມ່ນມີຄວາມພ້ອມໃນການລົງທຶນ, ສາມາດເຂົ້າເຖິງແຫຼ່ງທຶນ ແລະ ສ້າງວຽກເຮັດງານທຳ ໃຫ້ກຸ່ມທີ່ມີ ລາຍຮັບຕໍ່າ.

ຂ່າວ-ພາບ: ສຈນກ