ກະຊວງອຸດສາຫະກຳ ແລະ ການຄ້າ ໄດ້ຮ່ວມກັບ ບໍລິສັດ ລາວສະແຕນດາດ ຈຳກັດ ລົງນາມ ບົດບັນທຶກຄວາມເຂົ້າໃຈ (MOU) ກ່ຽວກັບໂຄງການສຶກສາຄວາມເປັນໄປໄດ້ໃນການຮ່ວມມືວຽກງານກວດກາ ແລະ ຢັ້ງຢືນເຄມີ ກ່ອນການນໍາເຂົ້າ ສປປ ລາວ

ພິທີດັ່ງກ່າວຈັດຂື້ນ ໃນວັນທີ 04 ພະຈິກ 2024, ທີ່ກະຊວງອຸດສາຫະກຳ ແລະ ການຄ້າ ເຂົ້າຮ່ວມຂອງ ທ່ານ ບຸນເຖິງ ດວງສະຫວັນ, ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ການລົງນາມຂອງ ທ່ານ ປອ ບົວວັນ ວິລະວົງ ຫົວໜ້າຫ້ອງການກະຊວງ  ແລະ  ທ່ານ ອຸທັນ ໄຕລິດທິ ປະທານບໍລິສັດ ລາວສະແຕນດາດ ຈຳກັດ. ເຂົ້າຮ່ວມໃນພິມີຜູ້ຕາງໜ້າຈາກ ບັນດາກົມອ້ອມຂ້າງ ກະຊວງ ອຸດສາຫະກຳ ແລະ ການຄ້າ ແລະ ຕາງໜ້າບໍລິສັດ ລາວສະແຕນດາດ ຈຳກັດ.

ທ່ານ ບຸນເຖິງ ດວງສະຫວັນ ໄດ້ກ່າວວ່າ: ການຮ່ວມມືວຽກງານດັ່ງກ່າວ ແມ່ນສອດຄ່ອງກັບພາລະບົດບາດຂອງກະຊວງອຸດສາຫະກຳ ແລະ ການຄ້າ ໃນການຕິດຕາມ ກວດກາ ແລະ ວິໄຈ ຄວາມຖືກຕ້ອງຂອງທາດເຄມີ ທີ່ນຳເຂົ້າ-ສົ່ງອອກ ຊື່ງຈະຊ່ອຍຊຸກຍູ້ສົ່ງເສີມໃຫ້ຜູ້ດຳເນີນທຸລະກິດກ່ຽວກັບທາດເຄມີ ເອົາໃຈໃສ່ການນຳເຂົ້າເຄມີ ໃຫ້ຖືກຕາມເປົ້າໝາຍ, ມີຄວາມປອດໄພ ແລະ ສອດຄ່ອງກັບກົດໝາຍ, ລະບຽບການທີ່ຈັດຕັ້ງປະຕິບັດຢູ່ ເປັນຕົ້ນ ກົດໝາຍ ວ່າດ້ວຍຄຸ້ມຄອງເຄມີ, ຂໍ້ຕົກລົງ ວ່າດ້ວຍການບໍລິການທີ່ປຶກສາຄວາມປອດໄພກ່ຽວກັບເຄມີ ແລະ ຂໍ້ຕົກລົ ງວ່າດ້ວຍການຂຶ້ນທະບຽນບັນຊີເຄມີ, ການນຳເຂົ້າ-ສົ່ງອອກ, ສົ່ງຜ່ານເຄມີ.

ຜ່ານມາຂະແໜງການອຸດສາຫະກຳ ແລະ ການຄ້າ ບໍ່ໄດ້ມີການແຕ່ງຕັ້ງພະນັກງານໄປປະຈຳຢູ່ດ່ານພາສີສາກົນ ເພື່ອກວດກາເຄມີກ່ອນການນຳເຂົ້າມາ ແຕ່ຈະກວດກາເຄມີພາຍຫຼັງທີ່ໄດ້ນຳເຄມີເຂົ້າມາແລ້ວ ເນື່ອງຈາກຍັງຂາດເຄື່ອງມືອຸປະກອນ, ພະນັກງານທີ່ມີຄວາມຊຳນານ ແລະ ຕ້ອງໄດ້ກຳນົດລາຍການເຄມີທີ່ຈະທໍາການກວດກາ ແລະ ວິໄຈ ເປັນອັນສະເພາະ ຈຶ່ງສາມາດປະຕິບັດໄດ້.

ການຮ່ວມມືດັ່ງກ່າວ ຈະຊ່ວຍພະນັກງານ ຂະແໜງການ ອຄ ໄດ້ຮັບຍົກລະດັບຄວາມຮູ້ຄວາມສາມາດ ໃນການສຶກສາໃນການເກັບ ແລະ ວິໄຈຕົວຢ່າງເຄມີເພີ່ມຂຶ້ນ ໃນອະນາຄົດ ຫາກວຽກງານດັ່ງກ່າວມີຄວາມເຂັ້ມແຂງຂະແໜງການອຸດສາຫະກຳ ແລະ ການຄ້າ ອາດພິຈາລະນາຄົ້ນຄວ້າ ແຕ່ງຕັ້ງພະນັກງານໄປປະຈຳຢູ່ດ່ານພາສີສາກົນ ເພື່ອກວດກາເຄມີກ່ອນການນຳເຂົ້າມາ ຄ້າຍຄືກັບປະເທດອ້ອມຂ້າງ. 

ທ່ານ ບຸນເຖິງ ດວງສະຫວັນ ໄດ້ເນັ້ນໜັກໃຫ້ ກົມອຸດສາຫະກຳ ແລະ ບໍລິສັດ ເອົາໃຈໃສ່ລົງເກັບກຳຂໍ້ມູນລະອຽດ ເພື່ອສຶກສາຄວາມເປັນໄປໄດ້ ແລະ ເປັນຂໍ້ມູນໃນການວາງແຜນກຳນົດກອບໜ້າວຽກ ແລະ ຂອບເຂດໃນການເຮັດວຽກຮ່ວມກັນ ພ້ອມທັງໃຫ້ສືກສາຂໍ້ມູນລະອຽດ ທາງດ້ານບຸກຄະລາກອນ, ເຄື່ອງມືອຸປະກອນ, ສະຖານທີ່ຮອງຮັບ, ກົດໝາຍ, ລະບຽບການ, ຜົນໄດ້, ຜົນເສຍທີ່ກ່ຽວຂ້ອງ ແລະ ໃຫ້ສຶກສາຂໍ້ມູນຂອງຕ່າງປະເທດ ຕື່ມ ເພີ່ນມີການຈັດຕັ້ງປະຕິບັດແນວໃດ. ໃນຕອນທ້າຍ, ກໍໄດ້ສະແດງຄວາມຂອບໃຈມາຍັງທຸກພາກສ່ວນທີ່ໃຫ້ການຮ່ວມມື ແລະ ສະໜັບສະໜູນ ຕະຫຼອດມາ ແລະ ຂໍສະແດງຄວາມຊົມເຊີຍຕໍ່ການຮ່ວມມື ໃນຄັ້ງນີ້ ແລະ ອວຍພອນໃຫ້ການຈັດຈັດຕັ້ງປະຕິບັດປະສົບຜົນສຳເລັດ ຕາມຈຸດປະສົງທີ່ວາງໄວ້.

ຂ່າວ-ພາບ: ສູນສະຖິຕິ ແລະ ຂໍ້ມູນຂ່າວສານ