ສະຖາບັນ ອຸດສາຫະກໍາ ແລະ ການຄ້າ ກະຊວງອຸດສາຫະກໍາ ແລະ ການຄ້າ ເປັນເຈົ້າພາບ ຈັດກອງປະຊຸມດ້ານນະໂຍຍາຍລະດັບພາກພື້ນຫົວຂໍ້: “ ສ້າງຄວາມເຂັ້ມແຂງທາງດ້ານການຄ້າເອເລັກໂຕຣນິກ ໃນຮູບແບບທຸລະກິດກັບທຸລະກິດ ແລະ ທຸລະກິດ ກັບຜູ້ບໍລິໂພກ ໃນລະຫວ່າງວັນທີ 19-20 ພະຈິກ 2024 ທີ່ໂຮງແຮມລາວພຣາຊາ. ຈຸດປະສົງ ຄື: 1. ອະທິບາຍ ແລະ ຊີ້ແຈງບັນຫາທີ່ເປັນສິ່ງທ້າທາຍຂອງການຄ້າອີເລັກໂຕຼນິກ, 2. ສະເໜີແນະດ້ານນະໂຍບາຍທີ່ເນັ້ນການສ້າງຄວາມເຂັ້ມແຂງຕ້ານທຸກການຜັນປ່ຽນຂອງສະພາບການໂລກ, ການພັດທະນາແບບມີສ່ວນຮ່ວມ ແລະ  ສົ່ງເສີມການແຂ່ງຂັນ. ໂດຍໄດ້ຮັບການສະໜັບສະໜູນຈາກຂອບການຮ່ວມມືດ້ານເສດຖະກິດ ແລະ ດ້ານວິຊາການພາຍໃຕ້ສັນຍາການຄ້າເສລີອາຊຽນ-ຮົງກົງ (AHIKFTA – ECOTECH Work Programme) ເປັນປະທານຂອງທ່ານ ນາງ ຈັນສຸກ ແສງພະຈັນ, ຮອງລັດຖະມົນຕີກະຊວງອຸດສາຫະກຳ ແລະ ການຄ້າ, ມີຄະນະກຳມະການປະສານງານຂອງອາຊຽນ ກ່ຽວກັບການຄ້າເອເລັກໂຕຼນິກ ແລະ ເສດຖະກິດດີຈີຕອນ ຫຼື ACCED, ນັກຄົ້ນຄ້ວາຈາກປະເທດອາຊຽນ ແລະ ຮົງກົງ, ຜູ້ຕາງໜ້າຈາກກອງເລຂາອາຊຽນ ພາກລັດ – ທຸລະກິດເຂົ້າຮ່ວມ.

ທ່ານ ນາງ ຈັນສຸກ ແສງພະຈັນກ່າວວ່າ: ຂ້າພະເຈົ້າມີຄວາມດີໃຈ ແລະ ເປັນກຽດທີ່ໄດ້ຕ້ອນຮັບບັນດາທ່ານເຂົ້າຮ່ວມການສົນທະນາດ້ານນະໂຍບາຍລະດັບພາກພື້ນພາຍໃຕ້ຂອບສັນຍາການຄ້າເສລີອາຊຽນ-ຮົງກົງ ກ່ຽວກັບການເພີ່ມທະວີການຮ່ວມມືດ້ານການຄ້າອີເລັກໂຕຼນິກ ເພື່ອຊຸກຍູ້ການພົວພັນລະຫວ່າງທຸລະກິດກັບທຸລະກິດ ແລະ ນັກທຸລະກິດກັບຜູ້ບໍລິໂພກໃນມື້ນີ້.

ກອງປະຊຸມເວທີສົນທະນາຄັ້ງນີ້ ແມ່ນມີຄວາມໝາຍສໍາຄັນຕໍ່ການພັດທະນາໃນຂອບຄວາມຮ່ວມມືຂອງພາກພື້ນໂດຍສະເພາະແມ່ນໃນໄລຍະທີ່ການຄ້າອີເລັກໂຕຼນິກ ກຳລັງມີບົດບາດສໍາຄັນໃນການຍູ້ດັນການປ່ຽນຜ່ານຂອງລະບົບເສດຖະກິດໂລກ,ຊຸກຍູ້ການຄ້າໃຫ້ເຂັ້ມແຂງ, ສ້າງການມີສ່ວນຮ່ວມຂອງຜູ້ບໍລິໂພກແລະການພັດທະນາທີ່ຍືນຍົງຂອງອາຊຽນ ແລະ ຮົງກົງ, ສປຈີນ.

ການເຂົ້າຮ່ວມປະຊຸມຂອງບັນດາທ່ານໃນມື້ນີ້ແມ່ນການຢັ້ງຢືນເຖິງຄວາມສຳຄັນຂອງການ ຄ້າອີເລັກໂຕຼນິກທີ່ກຳລັງພັດທະນາດ້ວຍຈັງຫວະກ້າວກະໂດດຢູ່ບັນດາປະເທດອາຊຽນ ແລະຮົງກົງ. ຕາມການລາຍງານ ຕົວເລກການຄ້າອີເລັກໂຕຼນິກ ໃນປີ 2025 ຄາດວ່າຈະບັນລຸກາຍ 216 ຕື້ໂດລາ; ທ່າແຮງຂອງຮູບແບບການຄ້ານີ້ ບໍ່ພຽງແຕ່ຈະຊ່ວຍຊຸກຍູ້ການຂະຫຍາຍຕົວຂອງທຸລະກິດ ຍັງສາມາດຜົນໄດ້ຮັບຂອງທຸລະກິດດັ່ງກ່າວ ແມ່ນເກີດຈາກການນຳໃຊ້ເຕັກໂນໂລຊີດີຈີຕອນ, ການເຂົ້າເຖິງລະບົບອິນເຕີເນັດ ແລະ ການຂາຍໃນຮູບແບບອອນລາຍທີ່ມີຄວາມຫຼາກຫຼາຍຕ່າງໆ.ສົ່ງເສີມການສ້າງນະວັດຕະກຳໃໝ່ຂອງທຸກວິສາຫະກິດນ້ອຍໃຫຍ່ຕ່າງໆ.

ໂດຍໄດ້ຮັບການສະໜັບສະໜູນຈາກຂອບການຮ່ວມມືດ້ານເສດຖະກິດ ແລະ ດ້ານວິຊາການພາຍໃຕ້ສັນຍາການຄ້າເສລີອາຊຽນ-ຮົງກົງ (AHIKFTA – ECOTECH Work Programme), ສະຖາບັນອຸດສາຫະກຳ ແລະ ການຄ້າ, ກະຊວງອຸດສາຫະກຳ ແລະ ການຄ້າ ໄດ້ເປັນເຈົ້າການນຳພາການຄົ້ນຄວ້າ ສຶກສາໃນຫົວຂໍ້ທີ່ກ່າວມາພ້ອມນັ້ນກໍເປັນສູນລວມໃນການໃຫ້ຄໍາແນະນໍາດ້ານນະໂຍບາຍທີ່ມີການສະໜັບສະໜູນດ້ານສະຖິຕິ ແລະ ຂໍ້ມູນທີ່ມີຄວາມເຊື່ອຖື ແລະ ພິເສດ ກອງປະຊຸມມື້ນີ້ ແມ່ນຍັງມີຈຸດປະສົງລະດົມຄຳຄິດເຫັນໃນການພັດທະນາຮູບແບບ ແລະ ລະບົບການຄ້າອີເລັກໂຕຼນິກ ທີ່ສາມາດເຮັດທຸລະກິດການຄ້າຜ່ານແດນຢ່າງໂລ່ງລ່ຽນ ສ້າງຜົນປະໂຫຍດໃຫ້ທັງວິສາຫະກິດຂະໜາດໃຫຍ່ ແລະ ນ້ອຍ.

ການໝູນໃຊ້ການຄ້າອີເລັກໂຕຼນິກໃນທຸລະກິດຈະຊ່ວຍໃຫ້ ຈວນກ (MSMEs) ບໍ່ພຽງຈະຂະຫຍາຍຕົວ ແຕ່ຍັງໝາຍເຖິງການເຂົ້າເຖິງຕະຫຼາດ, ເພີ່ມໂອກາດໃນການຈ້າງງານ ແລະ ກ້າວສູ່ການຄ້າລະດັບສາກົນ. ຢ່າງໃດກໍດີ ການຍົກໃຫ້ເຫັນບັນຫາພື້ນຖານທີ່ເປັນທ້າທາຍຕໍ່ການຂະຫຍາຍຕົວຂອງທຸລະກິດ ເຊັ່ນ: ການປົກປ້ອງຂໍ້ມູນສ່ວນຕົວຂອງລູກຄ້າ, ການຫຼຸດຜ່ອນຂັ້ນຂອດດ້ານລະບຽບການຂົນສົ່ງ ແລະ ລະບົບການຊຳລະເງິນ ທີ່ມີຄວາມເຊື່ອຖືເວລາດຳເນີນທຸລະກຳດ້ານດີຈີຕອນ ກໍເປັນບັນຫາທີ່ສຳຄັນ.

ອີງໃສ່ການສຶກສາຜ່ານມາ ຂອງໂຄງການໄດ້ຊີ້ໃຫ້ເຫັນຄວາມຈໍາເປັນຕ້ອງໄດ້ຫຼຸດຜ່ອນຄວາມແຕກໂຕນດ້ານພື້ນຖານດີຈີຕອນຂອງແຕ່ລະປະເທດ. ຂະນະທີ່ສະມາຊິກ ເຊັ່ນ ປະເທດສິງກະໂປ ແລະ ຮົງກົງ ມີການພັດທະນາພື້ນຖານດ້ານດີຈີຕອນໃນລະດັບສູງ ປະເທດສະມາຊິກອື່ນໆຍັງ ຢູ່ໃນຊ່ວງຂະຫຍາຍເຄືອຄ່າຍອິນເຕີເນັດຄວາມໄວສູງ, ລະບົບສັນຍານເຄື່ອນທີ່ທົ່ວປະເທດແລະພັດທະນາດ້ານຄວາມຮູ້ດີຈີຕອນເຊິ່ງທັງໝົດແມ່ນປັດໄຈສໍາຄັນໃນການສົ່ງເສີມການຄ້າອີເລັກໂຕຼນິກ. ການສ້າງຄວາມເຂັ້ມແຂງດ້ານຄວາມອາດສາມາດຂອງຄົນໃນຊົນນະບົດ ແລະ ເຂດຫ່າງໄກຊອກຫຼີກຈະຊ່ວຍໃຫ້ທຸລະກິດຂອງທ້ອງຖິ່ນສ້າງຜົນປະໂຫຍດໃນເສດຖະກິດດີຈີຕອນ ເຊິ່ງຈະປະກອບ ສ່ວນຫຼຸດຜ່ອນຄວາມແຕກໂຕນດ້ານການພັດທະນາ ແລະ ສ້າງຄວາມເຂັ້ມແຂງໃຫ້ເສດຖະກິດຕາມທິດຍືນຍົງ ໃນການສົນທະນາ ຂອງກອງປະຊຸມເທື່ອນີ້ຍັງຈະເນັ້ນເຖິງການແລກປ່ຽນກ່ຽວກັບຄວາມຈໍາເປັນທີ່ຕ້ອງມີລະບຽບການທີ່ສອດຄ່ອງກັນຂອງພາກພື້ນ. ກົດລະບຽບທີ່ສໍາພັນກັນຈະສາມາດຫຼຸດຜ່ອນຂັ້ນຂອດດ້ານພາສີ-ອາກອນ ແລະ ຄ່າໃຊ້ຈ່າຍໃນການເຮັດທຸລະກຳການຄ້າ, ສ້າງຄວາມເອກະພາບໃນຂອບວຽກການປົກປ້ອງຜູ້ບໍລິໂພກ ແລະ ຊັບສິນທາງປັນຍາ. ບັນດາມາດຕະການດັ່ງກ່າວແມ່ນມີຄວາມສໍາຄັນໃນການປ້ອງກັນວິສາຫະກິດທ້ອງຖິ່ນຈາກສິນຄ້າປອມແປງ   ແລະ ເພື່ອສ້າງຄວາມເຊື່ອໝັ້ນ ຄວາມປອດໄພ ແລະ ປະສິດທິພາບໃນການເຮັດທຸລະກຳຜ່ານແດນ.

ສຸດທ້າຍນີ້ ຂ້າພະເຈົ້າ ຫວັງວ່າກອງປະຊຸມເວທີສົນທະນານີ້ ຈະປະກອບສ່ວນສຳຄັນໃນການສ້າງຄວາມເອກະພາບ ແລະ ການແລກປ່ຽນແນວຄວາມຄິດເພື່ອສ້າງຄວາມເຂັ້ມແຂງໃຫ້ເສດຖະກິດ ດີຈີຕອນຂອງພາກພື້ນພວກເຮົາ. ຄວາມຮູ້ວິຊາການ, ແບບແຜນວິທີການ ແລະ ຂໍ້ສະເໜີແນະທາງດ້ານນະໂຍບາຍ ທີ່ກອງປະຊຸມໄດ້ນຳສະ ເໜີ ຈະກາຍເປັນແຮງຜັນດັນໃຫ້ລະບົບເສດຖະກິດພວກເຮົາມີຄວາມຕ້ານທານຕໍ່ວິກິດການຕ່າງໆຫຼາຍຂຶ້ນ ພ້ອມນັ້ນກໍຈະເຮັດໃຫ້ປະຊາກອນ ກໍຄືພາກທຸລະກິດໄດ້ຮັບການພັດທະນາ ໃນຍຸກດິຈິຕອນ ຊ້າພະເຈົ້າມີຄວາມເຊື່ອໝັ້ນວ່າ ການປະກອບສ່ວນ ຂອງບັນດາທ່ານຊ່ຽວຊານ ການນໍາແຕ່ລະຂັ້ນ  ແລະ ຜູ້ແທນພາກທຸລະກິດ ຈະສ້າງພື້ນຖານໝັ້ນຄົງຕໍ່ການ ພັດທະນາການຄ້າອີເລັກໂຕນິກ ຂອງອາຊຽນ ແລະ ຮົງກົງ.

ຂ່າວ-ພາບ: ສູນສະຖິຕິ ແລະ ຂໍ້ມູນຂ່າວສານ