ສະມາຄົມຫັດຖະກໍາລາວ ໄດ້ພິທີສະຫຼຸບຜົນສໍາເລັດ ຂອງງານມະຫາກໍາສີມືຫັດຖະກໍາ ປີ 2024, ຜົນສໍາເລັດຂອງງານເດີນແບບການກຸສົນໃນໂຄງການຫ່ວງໄຍໄປເຖິງ ປີ 2024, ຜົນສໍາເລັດຂອງງານວາງສະແດງແຜ່ນແພພື້ນເມືອງລາວ ທີ່ຕໍານັກຜ້າໄໝລາວບູຮານ ແລະ ຜົນສໍາເລັດຂອງກອງປະຊຸມແຜ່ນແພພື້ນເມືອງອາຊຽນ ຄັ້ງທີ 9 ປີ 2024 ທີ່ ສປປ ລາວ ເປັນເຈົ້າພາບ ຂຶ້ນທີ່ ຕໍານັກຜ້າໄໝ ລາວບູຮານ ໃນວັນທີ 24 ທັນວາ 2024 ໂດຍການເຂົ້າຮ່ວມຂອງທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ແລະ ການຄ້າ, ທ່ານ ນາງ ນາລີ ສີສຸລິດ ປະທານທີ່ປຶກສາສະມາຄົມຫັດຖະກຳລາວ, ມີຮອງລັດຖະມົນຕີ, ມີບັນດາທ່ານ ພັນລະຍາການນໍາຂັ້ນສູງ, ບັນດາທ່ານ ປະທານກິດຕິມະສັກ ສະມາຄົມຫັດຖະກຳລາວ ແລະ ຜູ້ປະກອບການ ສະມາຊີກສະມາຄົມຫັດຖະກໍາລາວ ແລະ ແຂກ ເຂົ້າຮ່ວມ.
ທ່ານ ມະໄລທອງ ກົມມະສິດ ກ່າວວ່າ: ຂ້າພະເຈົ້າ ຮູ້ສືກພາກພູມໃຈ ແລະ ເປັນກຽດຢ່າງຍິ່ງ ທີ່ໄດ້ມາເຂົ້າຮ່ວມ ພິທີສະຫຼຸບຜົນສຳເລັດ ການຈັດງານມະຫາກຳສີມືຫັດຖະກຳລາວ, ກອງປະຊຸມຜ້າແພພື້ນເມືອງອາຊຽນຄັ້ງທີ 9 ແລະ ງານເດີນແບບເພື່ອການກຸສົນ ສຳລັບປີ 2024 ການຈັດງານຄັ້ງນີ້ ແມ່ນຖືເປັນງານໃຫຍ່ລະດັບຊາດ ແລະ ພາກພື້ນ ທີ່ໄດ້ຈັດຂຶ້ນນັບແຕ່ ວັນທີ 26 ຕຸລາ ຫາ 6 ພະຈິກ 2024.
ພິເສດປີນີ້ ດ້ວຍຄວາມເຊື່ອໝັ້ນ ແລະ ຜົນງານຮອບດ້ານ ຂອງວຽກງານຫັດຖະກຳ ກໍຄື ສະມາຄົມຫັດຖະກຳ, ສປປ ລາວ ສາມາດຍາດແຍ່ງເອົາ ການຈັດກອງປະຊຸມ ຜ້າແພພື້ນເມືອງອາຊຽນ ຄັ້ງທີ 9 ຂື້ນເປັນຄັງທຳອິດ ຢູ່ປະເທດເຮົາ ສະແດງໃຫ້ເຫັນເຖິງຄວາມພ້ອມ ແລະ ສັກກະພາບ ໃນການເປັນປະທານໝູນວຽນ ອາຊຽນ ແລະ ເຈົ້າພາບກອງປະຊຸມສຸດຍອດອາຊຽນ ທີ່ສຳເລັດລົງດ້ວຍຜົນສຳເລັດອັນຈົບງາມ ແລະ ມີໝາກຜົນ. ພ້ອມນີ, ເປັນໂອກາດອັນສຳຄັນຍິ່ງ ສະແດງໃຫ້ບັນດາປະເທດອາຊຽນ ຂົງເຂດວຽກງານຫັດຖະກຳ ໄດ້ປະຈັກຕາເຖິງການພັດທະ ນາ ສີໄມ້ລາຍມື ຄວາມປານີດບັນຈົງ ແລະ ມໍລະດົກຕົກທອດທີ່ລໍ້າຄ່າ ຂອງແຜ່ນແພລາວ ທີ່ມີຄວາມໂດດເດັ່ນ ແລະ ໄດ້ຮັບການຍອມຮັບໃນລະດັບສາກົນ.
ງານສຳຄັນອີກອັນໜຶ່ງທີ່ປັດສະຈາກບໍ່ໄດ້ແມ່ນ ງານເດີນແບບເພື່ອການກຸສົນ ທີ່ຖືວ່າເປັນຄວາມພະຍາຍາມ ທີີ່ໜ້າສັນລະເສີນ ຂອງບັນພັນລະຍາການນຳຂັ້ນສູງລາວ ທີ່ເປັນຄະນະທີ່ປຶກສາຂອງສະມາຄົມຫັດຖະກຳລາວ ແລະ ບັນດາຫົວໜ່ວຍທຸລະກິດຫັດຖະກຳ ທີ່ມີນໍ້າໃຈປະກອບສ່ວນຊ່ວຍເຫຼືອສັງຄົມ ຜ່ານການຈັດຕັ້ງເປັນໂຄງ ທີ່ເປັນປະໂຫຍດຍິ່ງໃຫຍ່ໃຫ້ ແກ່ປະຊາຊົນບັນດາເຜົ່າພາຍໃນປະເທດທີ່ຍັງຫຍຸ້ງຍາກ ໃນເຂດຊົນນະບົດຫ່າງໄກຊອກຫຼີກ.
ການຈັດງານໃນ ຄັ້ງນີ້ ຍັງປະກອບສ່ວນອັນສຳຄັນ ໃນການເປີດເປັນປີທ່ອງທ່ຽວລາວ ປີ 2024 ເຊິ່ງສາ ມາດນໍາສະເໜີ ແລະ ດຶງດູດແຂກ, ນັກທ່ອງທ່ຽວ ຈາກຕ່າງປະເທດເຂົ້າມາລາວ ໄດ້ມີໂອກາດໄດ້ຮັບຮູ້ ແລະ ເຂົ້າໃຈຫຼາຍຂື້ນ ສີໄມ້ລາຍມື ຫັດຖະກຳຂອງລາວ. ພ້ອມນີ້ງານຍັງເປັນໂອກາດອັນດີໃນການແລກປ່ຽນຂໍ້ມູນຂ່າວສານ, ສົ່ງ ເສີມການຮ່ວມມືຮອບດ້ານ ວຽກງານຫັດຖະກຳ ລະຫວ່າງພາກລັດ, ພາກທຸລະກິດ ແລະ ບັນດາອົງການຈັດຕັ້ງສາກົນ ແລະ ໂຄງການໃຫ້ການຊ່ວຍເຫຼືອຕ່າງໆ ເຊັ່ນ ໂຄງການຂອງ JICA, ໂຄງການ MOTTAINAI, ໂຄງການ CBI ແລະ ການຮ່ວມມືອັນດີຈາກ ບັນດາປະເທດສະມາຊິກອາຊຽນ.
ແຜນສົ່ງເສີມໃນຕໍ່ໜ້າ ພາກລັດ ກໍຄືກະຊວງອຸດສາຫະກຳ ແລະ ການຄ້າ ຈະຮ່ວມກັບສະມາຄົມຫັດຖະກຳລາວ ໃນການຈັດຕັ້ງປະຕິບັດ ແຜນພັດທະນາຫັດຖະກຳ 2021-2025, ໂດຍສະເພາະ ປິ 2025 ສຶບຕໍ່ຈັດຕັ້ງປະຕິ ບັດ ການຊຸກຍູ້ສົ່ງເສີມ ແລະພັດທະນາ ຜະລິດຕະພັນຫັດຖະກຳ ແລະ ຜູ້ປະກອບການ, ຊາວຊ່າງຫັດຖະກຳ ເປັນຕົ້ນ ດ້ານການຜະລິດ, ການຕະຫຼາດຊ່ອງທາງໃໝ່, ການຍົກລະດັບ ຊາວຊ່າງຫັດຖະກໍາ, ດຶງດູດ ການລົງທຶນ ແລະ ການນຳໃຊ້ເຕັກໂນໂລຊີເຂົ້າໃນການຜະລິດ, ການໂຄສະນາ ປະຊາສໍາພັນ ເຄື່ອງມືໜຶ່ງທີ່ສຳຄັນ ຄື ກາໝາຍຫັດຖະກຳ ແຫ່ງຊາດ ໂດຍກະຊວງອຸດສາຫະກຳ ແລະ ການຄ້າຮ່ວມກັບ ສະມາຄົມຫັດຖະກຳລາວ, ສົ່ງເສີມນັກພັດທະນາ ອອກແບບຫັດຖະກຳ, ສົ່ງເສີມການອົບຮົມວິຊາຊີບຫັດຖະກຳ, ການສ້າງຕັ້ງສູນສົ່ງເສີມຫັດຖະກຳ ທີ່ຈະເປັນ ສະຖານທີ່ຮຽນຮູ້ ແລະ ອະນຸລັກ ພູມປັນຍາທ້ອງຖີ່ນ, ມໍລະດົກຫັດຖະກຳຂອງປະຊາຊົນບັນດາເຜົາກໍຄື ປະເທດຊາດ.
ທ່ານ ນາງ ສຸວິຕາ ປະເສີດ ປະທານສະມາຄົມຫັດຖະກໍາລາວ ແລະ ໃນນາມປະທານຮ່ວມ ຂອງກອງປະຊຸມແຜ່ນພື້ນເມືອງອາຊຽນ ຄັ້ງທີ9 ປີ 2024 ໄດ້ລາຍງານຜົນສໍາເລັດການຈັດຕັ້ງປະຕິບັດ 4 ກິດຈະກໍາ ເຊີ່ງກ່ຽວຂ້ອງກັບວຽກງານຫັດຖະກໍາ ດັ່ງນີ້: 1. ລາຍງານຜົນສໍາເລັດຂອງງານມະຫາກໍາສີມືຫັດຖະກໍາ ປີ 2024, ລາຍງານຜົນສໍາເລັດຂອງງານເດີນແບບການກຸສົນໃນໂຄງການຫ່ວງໄຍໄປເຖິງ ປີ 2024, ລາຍງານຜົນສໍາເລັດຂອງງານວາງສະແດງແຜ່ນແພພື້ນເມືອງລາວ ທີ່ຕໍານັກຜ້າໄໝລາວບູຮານ ແລະ, ລາຍງານຜົນສໍາເລັດຂອງກອງປະຊຸມແຜ່ນແພພື້ນເມືອງອາຊຽນ ຄັ້ງທີ 9 ປີ 2024 ທີ່ ສປປ ລາວ ເປັນເຈົ້າພາບ
ທ່ານກ່າວວ່າ: “ງານມະຫາກຳສີມືຫັດຖະກຳລາວ” ປີ 2024 ພາຍໃຕ້ຄໍາຂວັນທີ່ວ່າ: “ສີໄມ້ລາຍມື ຄືອຸທິ ຍານແຫ່ງການທ່ອງທ່ຽວ, ເຊື່ອມໂຍງມໍລະດົກຜ້າແພພື້ນເມືອງອາຊຽນ” ໄດ້ຈັດຂຶ້ນເປັນໄລຍະເວລາ 9 ວັນ, ນັບແຕ່ວັນທີ 26 ຕຸລາ ຫາ 03 ພະຈິກ 2024 ຢູ່ທີ່ສູນວາງສະແດງສິນຄ້າລາວ-ໄອເຕັກ ເພື່ອສ້າງຂະບວນການຕ້ອນຮັບປີທ່ອງທ່ຽວລາວ ປີ 2024, ພິເສດແມ່ນ ເພື່ອກະກຽມຄວາມພ້ອມ ແລະ ສ້າງຂະບວນການຄໍານັບຮັບຕ້ອນ ທີ່ ສປປ ລາວ ເຮົາໄດ້ເປັນເຈົ້າພາບຈັດກອງປະຊຸມແຜ່ນແພພື້ນເມືອງອາຊຽນ ຄັ້ງທີ 9, ພາຍໃນງານ “ມະຫາກໍາສີມືຫັດຖະກໍາລາວ” ປີ 2024 ນີ້ ໄດ້ຈັດໃຫ້ມີ 6 ກິດຈະກໍາ.
ທ່ານກ່າວວ່າ: ຜົນສໍາຂອງງານເດີນແບບການກຸສົນ: ງານເດີນແບບການກຸສົນ ໃນໂຄງການ ຫ່ວງໄຍໄປເຖິງ ໃນປີ 2024 ເປັນຄັ້ງທີ 4 ໄດ້ຈັດຂຶ້ນ ຢ່າງເປັນທາງການ ເລີ່ມແຕ່ເວລາ 18:00 ໂມງ ຫາ 21:00 ໂມງ ໃນຄໍ່າຄືນວັນທີ 31/10/2024 ທີ່ສູນການຄ້າ ລາວ-ໄອເຕັກ, ໂດຍມີຈຸດປະສົງ ເພື່ອປຸກລະດົມມວນຊົນ ໃຫ້ມີນໍ້າໃຈອະນຸລັກ ຮັກຫອມ ຖະນຸຖະໜອມ ແລະ ສົ່ງເສີມ ເຄື່ອງນຸ່ງຂອງຖື ເຄື່ອງປະດັບເອ້ແຕ່ງກາຍແບບພື້ນເມືອງລາວໄວ້ໃຫ້ຕົງຢູ່ຄູ່ກັບຊາດລາວເຮົາ ພ້ອມນີ້ແມ່ນເພື່ອລະດົມທຶນໄປຊ່ວຍເຫລືອ ແມ່ຍິງ ແລະເດັກນ້ອຍ ຜູ້ຍາກຈົນ ຢູ່ເຂດຫ່າງໄກສອກຫຼີກ. ງານເດີນແບບເພື່ອການກຸສົນຄັ້ງນີ້ ໄດ້ຮັບການສະໜັບສະໜູນເປັນໃຈ ໂດຍການເປັນກຽດເຂົ້າຮ່ວມຊົມຮ່ວມເຊຍ, ຮ່ວມປະກອບສ່ວນດ້ານທຶນຮອນ ຈາກການນໍາພັກ-ລັດ, ບັນດາພັນລະຍາການນໍາ, ປ້າອະວຸໂສ, ຜູ້ຊົງຄຸນວຸດທິ, ຕົວແທນຈາກສະມາຄົມ ແລະ ມູນນິທິຕ່າງໆ, ຜູ້ຕາງໜ້າຈາກສະຖານທູດ, ອົງການຈັດຕັ້ງສາກົນ ໃນ ສປປ ລາວ, ນັກທຸລະກິດ, ເຈົ້າຂອງຫົວໜ່ວຍທຸລະກິດ, ຜູ້ປະກອບການ ຍິງ-ຊາຍ ລວມປະມານ 600 ທ່ານ
ການເດີນແບບອາພອນບັນດາເຜົ່າຄັ້ງນີ້ ມີບັນດາທ່ານປະກອບສ່ວນເປັນນາງແບບ-ນາຍແບບ ທັງໝົດ 84 ທ່ານ, ໃນນັ້ນ: ນາງ ແບບ-ນາຍແບບ ກິດຕິມະສັກ ຈາກຄະນະນໍາອະວຸໂສຂອງສະມາຄົມຫັດຖະກໍາລາວ, ຈໍານວນ 14 ຄູ່ ມີ 28 ທ່ານ, ນາງ ແບບ-ນາຍແບບ ໂດຍແມ່ນທ່ານທູດ, ທູຕາຕານຸທູດ ແລະ ອົງການຈັດຕັ້ງສາກົນຕ່າງໆ ປະຈໍາ ສປປ ລາວ ຈໍານວນ 14 ຮອບ (ເດີນຄູ່ ແລະ ດ່ຽວ) ມີ 28 ທ່ານ ແລະ ນາງແບບ-ນາຍແບບ ໂດຍແມ່ນນັກທຸລະກິດ (ຍິງ-ຊາຍ) ຈໍານວນ: 14 ຄູ່ ມີ 28 ທ່ານ, ທຶນດັ່ງກ່າວ ຈະໄດ້ນໍາໄປຊ່ວຍເຫຼືອແມ່ຍິງແລະເດັກນ້ອຍ ຢູ່ຕາມແຕ່ລະໂຮງຮຽນ ຂອງບັນດາແຂວງທີ່ຖືກກະທົບຈາກໄພນໍ້າຖ້ວມ, ນໍາໄປຊ່ວຍສ້ອມແປງຫ້ອງນໍ້າ, ສຸກສາລາ ແລະ ສິ່ງຈໍາເປັນໃຫ້ແກອບເຂດນະຄອນຫຼວງວຽງຈັນ ແລະ ໃກ້ຄຽງຕົວເມືອງ ແລະ ຈໍານວນໜຶ່ງ ຈະໄດ້ມອບເປັນທຶນການສຶກສາໃຫ້ນັກຮຽນເກັ່ງ ທີ່ມາຈາກຄອບຄົວທຸກຍາກ.
ທ່ານກ່າວວ່າ: ຜົນສໍາເລັດຂອງການຈັດວາງສະແດງແຜ່ນແພພື້ນເມືອງລາວ ຢູ່ທີ່ຕໍານັກຜ້າໄໝລາວບູຮານ ເປັນສະຖານທີ່ສໍາລັບຈັດວາງສະແດງເຄື່ອງຫັດຖະກໍາ ແລະ ຜ້າແພພື້ນເມືອງລາວ ເພື່ອ ເພື່ອເປັນບ່ອນທ້ອນໂຮມ, ອະນຸລັກຮັກສາ ແລະ ເປັນບ່ອນຈັດວາງສະແດງ ຜ້າແພພື້ນເມືອງລາວ ໃນລະດັບທົ່ວປະເທດ ການຈັດວາງສະແດງ ໄດ້ແບ່ງເປັນ 3 ພາກສ່ວນ ດັ່ງນີ້: 1. ພາກສ່ວນວາງສະແດງ ແຜ່ນແພ, ເຄື່ອງນຸ່ງ ແບບພື້ນເມືອງ ທີ່ມີອາຍຸ 70 ປີຂຶ້ນໄປ, ບາງຜືນ ມີອາຍຸ ປະມານ 300 ປີ, ຊຶ່ງມີຈໍານວນ 100 ກວ່າຜືນ, 2. ພາກສ່ວນສາທິດ ຫຼື ສະແດງໃຫ້ເຫັນ ແບບຢ່າງການຜະລິດຕົວຈິງ ເຊັ່ນ ການຕໍ່ຫູກ, ສາວໄໝ, ອິ້ວຝ້າຍ ແລະ ອື່ນໆ, 3. ພາກສ່ວນຂາຍຜະລິດຕະພັນຫັດຖະກຳ ຊຶ່ງເປັນຜະລິດຕະພັນຈາກຊາວບ້ານ.
ນັບແຕ່ມື້ເປີດງານຢ່າງເປັນທາງການ ໃນວັນທີ 23/10/2024 ມີແຂກກິດຕິມະສັກ, ນັກຄົ້ນຄວ້າ, ນັກ ຮຽນນັກສຶກສາ, ນັກທ່ອງທ່ຽວຈາກພາຍໃນ ແລະ ຕ່າງປະເທດ ເຂົ້າມາຢ້ຽມຢາມ ແລະ ທັດສະນະສຶກສາ ຫຼາຍຄະນະ ເປັນຕົ້ນແມ່ນ: ຄະນະຄູ່ສົມຣົດບັນດາປະມຸກລັດ ແລະ ຫົວໜ້າລັດຖະບານ ທີ່ມາຮ່ວມກອງປະຊຸມສຸດຍອດອາຊຽນ ຄັ້ງທີ 44-45. ຄະນະພັນລະຍາປະທານສະພາແຫ່ງຊາດ ທີ່ມາຮ່ວມກອງປະຊຸມສະມັດຊາໃຫຍ່ລັດຖະສະພາອາຊຽນ (ຫຼື ໄອປາ-AIPA) ຄັ້ງທີ 45. ຄະນະຜູ້ແທນກອງປະຊຸມແຜ່ນແພພື້ນເມືອງອາຊຽນຄັ້ງທີ 9, ປະມານ 500 ທ່ານ, ຄະນະນັກສຶກສາຈາກສະຖາບັນລັດຕະນະ 2 ຄັ້ງ 100 ກວ່າຄົນ ແລະ ນັກທ່ອງທ່ຽວເຂົ້າມາໃນແຕ່ລະວັນບໍ່ໄດ້ຂາດ.
ທ່ານກ່າວວ່າ: ຜົນສໍາເລັດ ກອງປະຊຸມແຜ່ນແພພື້ນເມືອງອາຊຽນ ຄັ້ງທີ9 ປີ 2024 ອີງຕາມການຕົກລົງເຫັນດີຂອງ ລັດຖະມົນຕີກະຊວງອຸດສາຫະກໍາ ແລະ ການຄ້າ ສະບັບເລກທີ: 0149/ອຄ, ລົງວັນທີ 01 ກຸມພາ 2024, ວ່າດ້ວຍການອະນຸມັດໃຫ້ສາມາຄົມຫັດຖະກໍາລາວ ຮ່ວມກັບ ກະຊວງອຸດສາຫະກໍາ ແລະ ການຄ້າ, ກະຊວງການຕ່າງປະເທດ, ສະພາການຄ້າ ແລະ ອຸດສາຫະກໍາແຫ່ງຊາດລາວ ເປັນເຈົ້າພາບຈັດກອງປະຊຸມຜ້າແພພື້ນເມືອງ ອາຊຽນ ຄັ້ງທີ 9 ປີ 2024, ໃນລະຫວ່າງວັນທີ 4 ຫາວັນທີ 6 ພະຈິກ 2024 ໄດ້ຮັບຜົນສໍາເລັດຕາມຈຸດປະສົງ ແລະ ລະດັບຄາດໝາຍ ດັ່ງນີ້:ພິທີເປີດງານຢ່າງເປັນທາງການ (Opening Ceremony) ໃນວັນທີ 4 / 11 / 2024 ທີ່ໂຮງແຮມແລນມາກ ໃນພິທີ ໄດ້ຮັບກຽດຈາກການນໍາພັກ-ລັດຖະບານ ສປປ ລາວ, ສະຖານທູດ, ອົງການຈັດຕັ້ງສາກົນ ແລະ ບຸກຄົນສໍາຄັນ ເຂົ້າຮ່ວມ 340 ກວ່າທ່ານ ເຊັ່ນ: ມີບຸກຄົນໃນຕໍາແໜ່ງສໍາຄັນຈາກຕ່າງປະເທດເຂົ້າຮ່ວມ ຄື: ພັນລະຍາ ທ່ານ ເລຂາທິການໃຫຍ່ພັກຄອມມຸຍນິດ ສສ ຫວຽດນາມ, ພຣະຣາຊີນີ ແຫ່ງປະເທດມາເລເຊຍ, ປະທານສະມາຄົມສິລະປະແຜ່ນແພພື້ນເມືອງຂອງອາຊີຕາເວັນອອກສຽງໃຕ້ (TTASSEA), ຜູ້ເຂົ້າຮ່ວມຈາກປະ ເທດ ມາເລເຊຍ 60 ທ່ານ, ນອກຈາກຜູ້ແທນກອງປະຊຸມທີ່ມາຈາກບັນດາປະເທດອາຊຽນແລ້ວ ຍັງມີຜູ້ສົນໃຈຈາກປະເທດອື່ນໆ ມາເຂົ້າຮ່ວມ ເຊັ່ນ: ຈາກປະເທດ ເອສໂຕເນຍ, ຣັດເຊຍ, ເຢຍລະມັນ, ຝຣັ່ງ, ອັງກິດ, ອົສຕຣາລີ, ສະ ຫະລັດອາເມລິກາ, ສາທາລະນະລັດເກົາຫຼີ, ຍີ່ປຸ່ນ, ການາດາ, ຈີນ.
ໃນລະຫວ່າງການປະຊຸມ ໄດ້ມີຕົວແທນຈາກຫຼາຍປະເທດ ສົນໃຈຕັ້ງຮ້ານ (ບຸດ) ວາງສະແດງຜະລິດຕະພັນແຜ່ນແພພື້ນເມືອງປະເທດຕົນ ທັງໝົດ 40 ຮ້ານ/ບຸດ, ກອງປະຊຸມແຜ່ນແພພື້ນເມືອງອາຊຽນໄດ້ພິສູດໃຫ້ເຫັນວ່າເປັນວິທີທີ່ດີເພື່ອໃຫ້ຜູ້ສົນໃຈຮ່ວມກັນປົກປັກຮັກສາມໍລະດົກວັດທະນະທຳທີ່ສຳຄັນນີ້. ກອງປະຊຸມຄັ້ງທີ 9 ແມ່ນໄດ້ຮັບຜົນສໍາເລັດຫຼາຍທີ່ສຸດເທົ່າທີ່ເຄີຍຈັດມາ. ສະມາຄົມພາກພື້ນ, ສະມາຄົມສິລະປະແຜ່ນແພພື້ນເມືອງອາຊີຕາເວັນອອກສຽງໃຕ້ໄດ້ສ້າງຕັ້ງກອງປະຊຸມດັ່ງກ່າວ ແລະ ແມ່ນອົງການທີ່ເໝາະສົມເພື່ອໃຫ້ບັນດາຜູ້ມີຄວາມສົນໃຈເຂົ້າຮ່ວມ ເພື່ອສືບຕໍ່ດຳເນີນການສົນທະນາເພື່ອຮັກສາການຜະລິດແຜ່ນແພພື້ນເມືອງ ແລະ ຮັກສາໄວ້ໃນຫໍພິພິທະພັນ ແລະ ດ້ວຍວິທີອື່ນໆ, ດັ່ງນັ້ນພວກເຮົາທຸກຄົນຄວນພິຈາລະນາເປັນສະມາຊິກ.
ໃນພິທີ ຍັງໄດ້ມີການມອບໃບຍ້ອງຍໍຈາກ ກະຊວງອຸດສາຫະກໍາ ແລະ ການຄ້າ ໃຫ້ຜູ້ທີ່ມີຜົນງານປະກອບສ່ວນ ຈັດງານສໍາຄັນ ໃນ 4 ກິດຈະກໍາ ໂດຍການມອບຂອງ ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ແລະ ການຄ້າ.
ສູນສະຖິຕິ ແລະ ຂໍ້ມູນຂ່າວສານ
