ກະຊວງອຸດສາຫະກໍາ ແລະ ການຄ້າ (ອຄ) ໄດ້ຈັດກອງປະຊຸມ ຄົບຄະນະສະໄໝສາມັນ ຄັ້ງທີ 10 ຂອງຄະນະບໍລິຫານງານພັກກະຊວງອຸດສາຫະກໍາ ແລະ ການຄ້າ ສະໄໝທີ V, ຂຶ້ນໃນວັນທີ 8 ມັງກອນ 2025 ທີ່ຫ້ອງປະຊຸມທາງໄກ ຊັ້ນ 3 ໂດຍການເປັນປະທານຂອງ ສະຫາຍ ມະໄລທອງ ກົມມະສິດ ກໍາມະການສໍາຮອງສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີກະຊວງອຸດສາຫະກຳ ແລະ ການຄ້າ (ອຄ) ເຂົ້າຮ່ວມມີ ຮອງເລຂາຄະນະບໍລິຫານງານພັກ, ຄະນະປະຈຳພັກ, ກໍາມະການຄະນະພັກກະຊວງ, ປະທານ/ເລຂາ 3 ອົງການຈັດຕັ້ງມະຫາຊົນຂອງກະຊວງ ພ້ອມດ້ວຍບັນດາສະຫາຍ ຄະນະພັກຮາກຖານ, ຄະນະໜ່ວຍພັກ ອ້ອມຂ້າງອົງຄະນະພັກ ກະຊວງອຸດສາຫະກໍາ ແລະ ການຄ້າ ເຂົ້າຮ່ວມ.

ສະຫາຍ ມະໄລທອງ ກົມມະສິດ ກ່າວວ່າ: ປີນີ້ເປັນປີມ້ວນທ້າຍການຈັດຕັ້ງປະຕິບັດ ມະຕິ XI ຂອງພັກ, ມະຕິ V ຂອງອົງຄະນະພັກ ກະຊວງອຸດສາຫະກໍາ ແລະ ການຄ້າ ໂດຍສະເພາະແມ່ນການສ້າງການຫັນປ່ຽນ ແລະ ແຜນພັດທະນາຂະແໜງອຸດສາຫະກໍາປຸງແຕ່ງ ແລະ ການຄ້າ 5 ປີ (2021-2025).

ຈຸດປະສົງຂອງກອງປະຊຸມ ເພື່ອພິຈາລະນາ ແລະ ຮັບຮອງເອົາ ບົດສະຫຼຸບຕີລາຄາການນຳພາຊີ້ນຳ ໃນ 1 ປີຜ່ານມາ, ພິຈາລະນາ ປະກອບຄຳເຫັນຕໍ່ການຈັດຕັ້ງຜັນຂະຫຍາຍ ມະຕິ 19 /ກມພ  ແລະ ມະຕິ ເສດຖະກິດເອກະລາດເປັນເຈົ້າຕົນເອງ ແລະ ການສ້າງແຜນພັດທະນາຂະແໜງອຸດສາຫະກໍາປຸງແຕ່ງ ແລະ ການຄ້າ 5 ປີ (2026-2030), ຄົ້ນຄວ້າມີຄຳເຫັນ ແລະ ຮັບຮອງເອົາ ຮ່າງ ແຜນບູລິມະສິດ ສາຍພັກ-ສາຍລັດ ປີ 2025, ພິຈາລະນາ ແລະ ມີທິດຊີ້ນຳ ຕໍ່ບາງບັນຫາຂໍ້ສະເໜີ ທີ່ຕິດພັນກັບ ການກະກຽມດຳເນີນກອງປະຊຸມໃຫຍ່ພັກ 2 ຂັ້ນ ແລະ ຂອງ 3 ອົງການຈັດຕັ້ງມະຫາ ຊົນຂອງກະຊວງ.

ທ່ານ ຍັງໄດ້ຮຽກຮ້ອງໃຫ້ ສະຫາຍທີ່ເຂົ້າຮ່ວມກອງປະຊຸມ  ເອົາໃຈໃສ່ຕິດຕາມ, ຄົ້ນຄວ້າ ແລະ ມີຄຳເຫັນ ດ້ວຍຄວາມເປັນເຈົ້າການ ແລະ ຄວາມຮັບຜິດຊອບ, ໂດຍສະເພາະບັນຫາທີ່ນອນໃນຄວາມຮັບຜິດຊອບຂອງຕົນ.

ຂ່າວ-ພາບ: ສູນທອງ ສູນສະຖິຕິ ແລະ ຂໍ້ມູນຂ່າວສານ