ໃນຕອນເຊົ້າຂອງວັນທີ 28 ມັງກອນ 2025, ສປປ ລາວ ໄດ້ເປັນເຈົ້າພາບຈັດກອງປະຊຸມຄັ້ງທີ 2 ຂອງຄະນະກຳມະການຮ່ວມດ້ານການຄ້າ (2nd Joint Trade Committee: JTC) ລະຫວ່າງ ສປປ ລາວ ແລະ ຣາຊະອານາຈັກກຳປູເຈຍ ທີ່ ນະຄອນຫຼວງວຽງຈັນ ສປປ ລາວ. ພາຍໃຕ້ການເປັນປະທານຮ່ວມຂອງທ່ານ ມະໄລທອງ ກົມມະສິດ, ລັດຖະມົນຕີ ກະຊວງອຸດສາຫະກຳ ແລະ ການຄ້າ ແຫ່ງ ສປປ ລາວ ແລະ ທ່ານ ນ. ຈອມ ນິມົນ, ລັດຖະມົນຕີກະຊວງການຄ້າ ແຫ່ງຣາຊະອານາຈັກກຳປູເຈຍ ແລະ ໄດ້ມີຕາງຫນ້າຈາກບັນດາຂະແຫນງການຂອງທັງສອງຝ່າຍເຂົ້າຮ່ວມ.
ກອງປະຊຸມໃນຄັ້ງນີ້ ໄດ້ດຳເນີນໄປໃນທາມກາງບັນຍາກາດອັນອົບອຸ່ນ ແລະ ເຂົ້າອົກເຂົ້້າໃຈ ເພື່ອເພີ່ມທະວີການແລກປ່ຽນການຢ້ຽມຢາມຂອງຜູ້ນຳສອງປະເທດໃນຫຼາຍລະດັບ ລວມທັງການຢ້ຽມຢາມຢ່າງເປັນທາງການ ແລະ ການເຂົ້າຮ່ວມກອງປະຊຸມພາກພື້ນ ແລະ ສາກົນ.
ຈຸດປະສົງກອງປະຊຸມຄັ້ງນີ້ 2 ປະເທດ, ສປປ ລາວ ແລະ ຣາຊາອານາຈັກ ກຳປູເຈຍ ໄດ້ທົບທວນຄືນຜົນຂອງການຢ້ຽມຢາມທີ່ຜ່ານມາ ພ້ອມທັງການຈັດຕັ້ງປະຕິບັດບັນດາຫນ້າວຽກທີ່ໄດ້ວາງແຜນຮ່ວມກັນໃນກອງປະຊຸມ JTC ຄັ້ງທີ 1 ໃນປີ 2013 ແລະ ໄດ້ຮ່ວມກັນປຶກສາຫາລື, ແລກປ່ຽນແນວຄວາມຄິດຕໍ່ທິດທາງໃນການຮ່ວມມືດ້ານການຄ້າຂອງ ສອງປະເທດ ໃນຕໍ່ໜ້າ.
ກອງປະຊຸມໃນຄັ້ງນີ້ ໄດ້ຕົກລົງບັນຫາສຳຄັນທີ່ຕິດພັນກັບການພັດທະນາ ແລະ ສົ່ງເສີມການຄ້າ ແລະ ຂົງເຂດອື່ນໆ ທີ່ສະໜັບສະໜູນໃຫ້ມີການຂະຫຍາຍຕົວເພີ່ມຂື້ນ, ກອງປະຊຸມໄດ້ປືກສາຫາລືກ່ຽວກັບຂົງເຂດການຮ່ວມມືທີ່ສຳຄັນ ເປັນຕົ້ນ 1. ເປົ້າໝາຍເພີ່ມມູນຄ່າການຄ້າສອງຝ່າຍ ແຕ່ນີ້ຮອດປີ 2030, 2. ການຮ່ວມມືເຂດການຄ້າເສລີ, 3. ການພັດທະນາຕະຫລາດຊາຍແດນ, ສັນຍາວ່າດ້ວຍການຄ້າຊາຍແດນ ແລະ ສັນຍາວ່າດ້ວຍສິນຄ້າຜ່ານແດນ, 4. ການສ້າງກົນໄກການຮ່ວມມືໂດຍຜ່ານກອງປະຊຸມປະຈຳປີຂອງອົງການປົກຄອງແຂວງຊາຍແດນ ແລະ ຂະແໜງອຸດສາຫະກຳ ແລະ ການຄ້າ, 5. ການວາງສະແດງສີນຄ້າ/ຕະຫລາດນັດ, ສົ່ງເສີມພາກທຸລະກິດ ແລະ ການລົງທືນ, 6. ການທ່ອງທ່ຽວ ແລະ ການຂົນສົ່ງ ແລະ 7. ການຮ່ວມມືຂອງສະພາການຄ້າ ແລະ ອຸດສາຫະກຳ ຂອງ ສປປ ລາວ ແລະ ຣາຊະອານາຈັກ ກຳປູເຈຍ.
ສປປ ລາວ ເຫັນດີເປັນຢ່າງຍິ່ງ ເພື່ອຊຸກຍູ້ການຮ່ວມມືສອງຝ່າຍໃນທຸກຂົງເຂດ ແລະ ສືບຕໍ່ແກ້ໄຂສິ່ງທ້າທາຍຮ່ວມກັນ, ກຳນົດກາລະໂອກາດໃນຕໍ່ໜ້າ ເພື່ອເພີ້ມທະວີການຮ່ວມມືດ້ານເສດຖະກິດ ແລະ ການຄ້າ ຂອງສອງປະເທດ ໃຫ້ນັບມື້ນັບເຂັ້ມແຂງ ແລະ ຂະຫຍາຍຕົວຂື້ນ.
ຂ່າວ: ໄພວັນ ແລະ ພາບ: ສູນທອງ
