ໃນຕອນເຊົ້າ ເວລາ 8 : 00 ໂມງ ຂອງວັນທີ່ 31 ຕຸລາ 2013 ທີ່ຜ່ານມາຢູ່ຫ້ອງປະຊຸມໂຮງແຮມມິດຕະພາບແຂວງອຸດົມໄຊ ໄດ້ເປີດກອງປະຊຸມສະຫຼຸບຖອດຖອນບົດຮຽນກ່ຽວກັບວຽກງານກວດກາການຄ້າ 9 ແຂວງຂື້ນ ໂດຍການເປັນປະທານຮ່ວມຂອງທ່ານ ບຸນທັນ ວັນນະໄຈ ກຳມະການປະຈຳພັກແຂວງ ຫົວໜ້າໜ້າພະແນກອຸດສາຫະກຳ ແລະ ການຄ້າແຂວງອຸດົມໄຊ ແລະ ທ່ານ ເຫຼືອມ ຍົງວົງສິດທິ ຫົວໜ້າກົມການຄ້າພາຍໃນ ກະຊວງອຸດສາຫະກຳ ແລະ ການຄ້າ, ມີຜູ້ເຂົ້າຮ່ວມທັງໝົດຈຳນວນ 96 ທ່ານ, ຍິງ 4 ທ່ານ ມາຈາກ 9 ແຂວງຄື: ອຸດົມໄຊ, ຫຼວງນໍ້າທາ, ບໍ່ແກ້ວ, ຜົ້ງສາລີ, ຫຼວງພະບາງ, ຈຳປາສັກ, ໄຊຍະບູລີ, ຊຽງຂວາງ, ສາລະວັນ ແລະ ບັນດາເມືອງ ພ້ອມດ້ວຍແຂກເຊີນມາຈາກບັນດາພາກສ່ວນທີ່ກ່ຽວຂ້ອງຂອງແຂວງອຸດົມໄຊ ເຂົ້າຮ່ວມຢ່າງພ້ອມພຽງ ໃນພິທີເປີດກອງປະຊຸມທ່ານ ບຸນທັນ ວັນນະໄຈ ກຳມະການປະຈຳພັກແຂວງຫົວໜ້າພະແນກອຸດສາຫະກຳ ແລະ ການຄ້າ ໄດ້ມີຄຳເຫັນກ່າວເປີດກອງປະຊຸມເຊີ່ງທ່ານ ໄດ້ສະແດງຄວາມຍິນດີຕ້ອນຮັບທຸກໆ ທ່ານໂດຍສະເພາະຄະນະນຳພ້ອມດ້ວຍທິມງານວິຊາການທີ່ເດີນທາງມາຈາກນະຄອນຫຼວງວຽງຈັນ ແລະ ບັນດາທ່ານ ຕາງໜ້າພະແນກອຸດສາຫະກຳ ແລະ ການຄ້າ ທີ່ມາຈາກ 9 ແຂວງ ແລະ ບັນດາເມືອງ ແລະ ທ່ານ ເຫຼືອມ ຍົງວົງສິດທິ ຫົວໜ້າກົມການຄ້າພາຍໃນກະຊວງອຸດສາຫະກຳ ແລະ ການຄ້າ ກໍ່ໄດ້ມີຄຳເຫັນຕໍ່ກອງປະຊຸມ ເຊີ່ງທ່ານໄດ້ແນະນຳບັນດາວຽກງານໃນການຈັດຕັ້ງປະຕິບັດວຽກງານກວດກາການຄ້າໃນໄລຍະຜ່ານມາ ແລະ ວິທີການຈັດຕັ້ງປະຕິບັດວຽກງານໃນຕໍ່ໜ້າ, ທ່ານ ຍັງໄດ້ເນັ້ນໃຫ້ບັນດາເຈົ້າໜ້າທີ່ກວດກາການຄ້າໃຫ້ເປັນເຈົ້າການໃນການກວດກາໃຫ້ເຂັ້ມງວດ ແລະ ຖືກຕ້ອງກັບນະໂຍບາຍຂອງກົດລະບຽບວາງອອກ ຈາກນັ້ນທ່ານ ສຸລິຍົນ ພິລາວົງ ຮອງຫົວໜ້າກົມການຄ້າພາຍໃນ ກໍ່ໄດ້ຂື້ນຜ່ານບົດສະຫຼຸບການຈັດຕັ້ງປະຕິບັດວຽກງານການຄ້າໃນໄລຍະ 1 ປີຜ່ານມາໃນຂອບເຂດທົ່ວປະເທດ. ບັນດາຜູ້ແທນຕ່າງໜ້າ ແຕ່ລະແຂວງ ແລະ ເມືອງກໍ່ໄດ້ຂື້ນຜ່ານບົດສະຫຼຸບການຈັດຕັ້ງປະຕິບັດວຽກງານການຄ້າ ແລະ ສະເໜີບັນຫາທີ່ຈະແກ້ໄຂໃນຕໍ່ໜ້າ. ເພື່ອເຮັດໃຫ້ກອງປະຊຸມມີຄວາມໝາຍ ແລະ ຄວາມສຳຄັນນັ້ນບັນດາຜູ້ແທນແຕ່ລະແຂວງ, ແຕ່ລະເມືອງ, ແຕ່ລະພາກສ່ວນກໍ່ໄດ້ປະກອບຄຳຄິດ, ຄຳເຫັນຕໍ່ກອງປະຊຸມຢ່າງເປັນຂະບວນຟົດຟື້ນ ເພື່ອແລກປ່ຽນບົດຮຽນເຊີ່ງກັນ ແລະ ກັນຢ່າງກົງໄປກົງມາ ຕາມທິດຊີ້ນຳຂອງທ່ານ ຫົວໜ້າກົມການຄ້າພາຍໃນດ້ວຍບັນຍາກາດອັນຟົດຟື້ນ ແລະ ມີຄວາມໝາຍ ຄວາມສຳຄັນຕໍ່ກັບວຽກງານກວດກາການຄ້າໃນຂອບເຂດທົ່ວປະເທດ ເວົ້າລວມ, ເວົ້າສະເພາະແມ່ນຢູ່ບັນດາແຂວງພາກເໜືອຂອງລາວ. ພິເສດກອງປະຊຸມໃນຄັ້ງນີ້ຍັງໄດ້ຮັບຟັງບົດຮຽນໃນການແກ້ໄຂບັນຫາຊາວຕ່າງປະເທດທີ່ເຂົ້າທຳມາຫາກິນ, ຄ້າຂາຍ ແລະອອກແຮງງານທີ່ບໍ່ຖືກຕ້ອງຢູ່ແຂວງຈຳປາສັກ ແລະ ບົດຮຽນການຈັດຕັ້ງປະຕິບັດວຽກງານກວດກາການຄ້າຂອງແຂວງສາລະວັນ ແລະ ຊຽງຂວາງ. ບຸນທັນ ວັນນະໄຈ ຍັງໄດ້ຮຽກຮ້ອງໃຫ້ຜູ້ເຂົ້າຮ່ວມກອງປະຊຸມໄດ້ນຳເອົາເນື້ອໃນຈິດໃຈຂອງກອງປະຊຸມໃນຄັ້ງນີ້ໄປຜັນຂະຫຍາຍຈັດຕັ້ງປະຕິບັດໃນໜ້າທີ່ວຽກງານຕາມພາລະບົດບາດໃຫ້ໄດ້ຮັບຜົນດີ.
ກອງປະຊຸມໄດ້ດໍາເນີນໄປເປັນເວລາ 1 ວັນເຕັມຈຶງໄດ້ອັດລົງດ້ວຍຜົນສຳເລັດອັນຈົບງາມ.
ຂຽນໂດຍ: ຄຳຝັ້ນ ພາວິວົງກອນ
