ໃນລະຫວ່າງວັນທີ 4-8 ພະຈິກ 2013 ນີ໊ ຄະນະກະຊວງອຸດສາຫະກໍາ ແລະ ການຄ້າ ໄດ້ນໍາເງິນສົດທີ່ລະດົມໄດ້ຈາກພາກສ່ວນວິສາຫະກິດ ແລະ ຫົວໜ່ວຍທຸລະກິດຕ່າງໆຈໍານວນ 120,000,000 ກີບ ລົງໄປມອບໃຫ້ 4 ແຂວງພາກໃຕ້ ໂດຍແບ່ງມອບໃຫ້ແຂວງລະ 30,000,000 ກີບ, ເຊິ່ງປະກອບມີ ແຂວງ ສາລະວັນ, ເຊກອງ,ອັດຕະປື ແລະ ແຂວງ ຈໍາປາສັກ ທີ່ໄດ້ຮັບຜົນກະທົບຢ່າງໜັກຈາກໄພພິບັດນໍ້າຖ້ວມໂດຍສະເພາະແມ່ນໄດ້ຮັບຜົນກະທົບຢ່າງໜັກຈາກພະຍຸດີເພຼເຊິນ ທີ່ພັດຜ່ານເຂົ້າ 4 ແຂວງພາກໃຕ້ໃນລະຫວ່າງວັນທີ 17-24 ກັນຍາ2013. ຕາງໜ້າໃຫ້ຄະນະນໍາກະຊວງອຸດສາຫະກໍາ ແລະ ການຄ້າ ເພື່ອລົງໄປມອບເງິນຊ່ວຍເຫຼືອຄັ້ງນີ້ ນໍາໂດຍ ທ່ານ ບຸນມີ ມະນີວົງ ຄະນະພັກກະຊວງ ຫົວໜ້າຫ້ອງການກະຊວງ ອຄ ພ້ອມດ້ວຍຄະນະ ລົງໄປມອບໃຫ້ຄະນະກໍາມະການຄຸ້ມຄອງ ແລະ ແກ້ໄຂໄພພິບັດຂອງແຕ່ລະແຂວງ ຈຸດປະສົງຫຼັກຂອງການລົງມອບເງິນຄັ້ງນີ້ກໍ່ເພື່ອຊ່ວຍເຫຼືອບັນເທົາທຸກ ຍຽວຍາ ແລະ ຟື້ນຟູຜົນເສຍຫາຍໃຫ້ແກ່ປະຊາຊົນຜູ້ທີ່ໄດ້ຮັບຜົນກະທົບຢ່າງໜັກຈາກໄພນໍ້າຖ້ວມໃນຄັ້ງນີ້ ຢ່າງໃດກໍ່ຕາມ ທາງຄະນະກໍາມະການຮັບຜິດຊອບວຽກງານຄຸ້ມຄອງແລະ ແກ້ໄຂໄພພິບັດຂອງແຕ່ລະແຂວງກໍ່ໄດ້ກ່າວສະແດງຄວາມຂອບໃຈຢ່າງສູງມາຍັງຄະນະກະຊວງອຸດສາຫະກໍາ ແລະ ການຄ້າທີ່ຍາມໃດກໍ່ມີຄວາມເປັນຫວງເປັນໄຍ ແລະ ມີນໍ້າໃຈຊ່ວຍເຫຼືອປະຊາຊົນຜູ້ທີ່ໄດ້ຮັບຜົນເສຍຫາຍຈາກນໍ້າຖ້ວມບໍ່ວ່າຈະເປັນທາງດ້ານຈິດໃຈກໍ່ຄືທາງດ້ານຊັບສິນເຮືອນຊານ ແລະ ທຸລະກິດຕ່າງໆ ທັງນີ້ທາງຄະນະກໍາມະການຮັບຜິດຊອບວຽກງານຄຸ້ມຄອງ ແລະ ແກ້ໄຂໄພພິບັດຂອງແຕ່ລະແຂວງຍັງໄດ້ກ່າວຂໍຄວາມຊ່ວຍເຫຼືອຈາກພາກສ່ວນຕ່າງໆສືບຕໍ່ໃຫ້ການຊ່ວຍເຫຼືອບັນເທົາທຸກ ແລະ ແກ້ໄຂຟື້ນຟູຜົນກະທົບຈາກໄພພິບັດນໍ້າຖ້ວມຄັ້ງນີ້ທີ່ຍັງມີຄວາມຕ້ອງການວັດຖຸເງິນຄໍາເປັນຈໍານວນຫຼາຍເພື່ອແກ້ໄຂຟື້ນຟູບັນຫາດັ່ງກ່າວຕໍ່ໄປ.
ຂ່າວ: ໂດມ
