ໃນລະຫວ່າງວັນທີ 28-30 ມັງກອນ 2014 ຜ່ານມານີ້, ຢູ່ທີ່ ໂຮງແຮມລ່ອງງື່ມວິວຣີສອດ ແຂວງວຽງຈັນ, ກົມການຄ້າພາຍໃນ ກະຊວງ ອຸດສາຫະກຳ ແລະ ການຄ້າ ໄດ້ຈັດກອງປະຊຸມປັບປຸງຮ່າງກົດໝາຍວ່າດ້ວຍການແຂ່ງຂັນການຄ້າຂື້ນ ໂດຍການສະໜັບສະໜູນຈາກ ອົງການ GIZ ລັດຖະບານເຢຍລະມັນ, ກອງປະຊຸມດັ່ງກ່າວມີ ທ່ານ ເຫລື່ອມ ຍົງວົງສິດທິ ຫົວໜ້າກົມການຄ້າພາຍໃນ, ຮອງຫົວໜ້າຄະນະຮັບຜິດຊອບສ້າງຮ່າງກົດໝາຍວ່າດ້ວຍການແຂ່ງຂັນການຄ້າ ເຂົ້າຮ່ວມເປັນປະທານ ແລະ ມີຜູ້ຕາງໜ້າຈາກພາກສ່ວນຕ່າງໆທີ່ກ່ຽວຂ້ອງທີ່ຖືກແຕ່ງຕັ້ງເປັນຄະນະຮັບຜິດຊອບສ້າງຮ່າງກົດໝາຍວ່າດ້ວຍການແຂ່ງຂັນການຄ້າ ເຊັ່ນ: ສະພາແຫ່ງຊາດ, ຫ້ອງການລັດຖະບານ, ສານປະຊາຊົນສູງສຸດ, ກະຊວງ ຍຸຕິທຳ, ກະຊວງ ພາຍໃນ ແລະ ກົມກ່ຽວຂ້ອງພາຍໃນກະຊວງອຸດສາຫະກຳ ແລະ ການຄ້າເຂົ້າຮ່ວມ, ຊຶ່ງມີຜູ້ເຂົ້າຮ່ວມທັງໝົດ ຈຳນວນ 13 ທ່ານ.
ໃນວາລະກອງປະຊຸມ, ທ່ານຫົວໜ້າກົມ ໄດ້ກ່າວເປີດພິທີພ້ອມທັງອອກຄຳເຫັນຕໍ່ກອງປະຊຸມ ເພື່ອຊີ້ທິດເຍືອງທາງໃຫ້ກອງປະຊຸມໃນຄັ້ງນີ້ດຳເນີນໄປດ້ວຍບັນຍາກາດ ແລະ ຄວາມໝາຍອັນເລິກເຊິງ ໃນທ່າມກາງບັນຍາກາດທີ່ທົ່ວພັກ, ທົ່ວກອງທັບ ແລະ ທົ່ວປວງຊົນ ພວມຫ້າວຫັນຟົດຟື້ນ ສະເຫລີມສະຫລອງວັນສ້າງຕັ້ງກອງທັບຄົບຮອບ 65 ປີ. ຈາກນັ້ນທ່ານ ກໍ່ໄດ້ຂຶ້ນກ່າວຕໍ່ກອງປະຊຸມອີກວ່າ: ກອງປະຊຸມໃນຄັ້ງນີ້ ແມ່ນກອງປະຊຸມວິຊາການ ເພື່ອປັບປຸງໃຫ້ຮ່າງກົດໝາຍດັ່ງກ່າວ ໃຫ້ມີເນື້ອໃນ ສົມບູນ ແລະ ຄົບຖ້ວນຫຼາຍຂຶ້ນ, ເພາະວຽກແຂ່ງຂັນການຄ້າແມ່ນວຽກງານທີ່ສຳຄັນ ແລະ ເປັນວຽກໃໝ່, ຈາກນັ້ນກອງປະຊຸມໄດ້ພາກັນລົງເລິກຄົ້ນຄວ້າ ແລະ ປະກອບຄຳຄິດຄຳເຫັນໃສ່ຮ່າງກົດໝາຍວ່າດ້ວຍການແຂ່ງຂັນການຄ້າ ຂອງ ສປປ ລາວ ຊຶ່ງຕາມແຜນການແມ່ນຈະຕ້ອງໄດ້ໃຫ້ເຂົ້າຜ່ານກອງປະຊຸມສະພາແຫ່ງຊາດ ໃນປີ 2015 ທີ່ຈະມາເຖິງນີ້, ເພາະວຽກນີ້ຫຼາຍປະເທດໃນໂລກກໍ່ຄືພາກພື້ນແມ່ນກຳລັງປະເຊີນໜ້າກັບສິ່ງທ້າທ້າຍຫຼາຍຢ່າງທີ່ແຕກຕ່າງກັນ ເຊັ່ນ: ການຜູກຂາດທາງດ້ານການຄ້າ, ການແຂ່ງຂັນທີ່ບໍ່ເປັນທຳ, ການທຸ້ມຕະຫຼາດ, ການລອກຮຽນແບບ ແລະ ປອມແປງສິນຄ້າ, ການສວຍໂອກາດຂຶ້ນລາຄາສິນຄ້າ, ສິ່ງເຫຼົ່ານັ້ນ ລ້ວນແຕ່ສົ່ງຜົນກະທົບໂດຍກົງຕໍ່ການຜະລິດ, ການຈຳໜ່າຍ, ການສົ່ງອອກສິນຄ້າ ເຮັດໃຫ້ຜູ້ປະກອບການ ແລະ ຜູ້ບໍລິ ໂພກ ໄດ້ຮັບຜົນປະໂຫຍດທີ່ບໍ່ສົມເຫດສົມຜົນ.
ຕອນທ້າຍຂອງກອງປະຊຸມ ທ່ານຫົວໜ້າກົມການຄ້າພາຍໃນ ຍັງໄດ້ຮຽກຮ້ອງໃຫ້ຜູ້ເຂົ້າຮ່ວມກອງປະຊຸມໃນຄັ້ງນີ້ ຈົ່ງໄດ້ເອົາໃຈໃສ່ຕິດຕາມ, ຄົ້ນຄ້ວາ, ປະກອບຄຳເຫັນຢ່າງສ້າງສັນ ແລະ ພ້ອມກັນກຳໃຫ້ໄດ້ບັນຫາຕ່າງໆ ເພື່ອເຮັດໃຫ້ຮ່າງກົດໝາຍສະບັບນີ້ມີເນື້ອໃນ ຖືກຕ້ອງ ແລະ ສົມບູນ ບໍ່ຄັດກັບນິຕິກຳອື່ນ ສາມາດນຳໄປຈັດຕັ້ງປະຕິບັດໄດ້ ໃນອະນາຄົດ ກຽມພ້ອມໃຫ້ລາວ ໃນການເຊື່ອມໂຍງປະຊາຄົມເສດຖະກິດອາຊຽນ AEC ໃນປີ 2015.
