ລັດຖະມົນຕີວ່າການກະຊວງ ອຸດສາຫະກຳ ແລະ ການຄ້າ ໄດ້ເຂົ້າຮ່ວມ ກອງປະຊຸມວົງແຄບ ASEAN ຄັ້ງທີ 20 ທີ່ປະເທດສິງກະໂປ ຈຸດປະສົງຂອງກອງປະຊຸມດັ່ງກ່າວ ແມ່ນເພື່ອປຶກສາຫາລື ກ່ຽວກັບຫລັກການການເຊື່ຶອມໂຍງກອງປະຊຸມ ລັດຖະມົນຕີເສດຖະກິດອາຊຽນ ບໍ່ເປັນທາງການ ຄັ້ງທີ 20 ຜ່ານມາ ທີ່ປະເທດສິງກະໂປ ໃນລະຫວ່າງວັນທີ 26-27 ກຸມພາ 2014 ໄດ້ເນັ້ນໃຫ້ປະເທດສະມາຊິກອາຊຽນ ຕ້ອງປັບປຸງຫລາຍບັນຫາ ສ້າງຄວາມພ້ອມກ່ອນການເຂົ້າຮ່ວມປະຊາຄົມເສດຖະກິດອາຊຽນ ຫລື ເອອີຊີໃນທ້າຍປີ 2015 ເພື່ອໃຫ້ໄດ້ຜົນປະໂຫຍດໂດຍລວມຕໍ່ເສດຖະກິດມະຫາພາກຫວັງຫລຸດຜ່ອນຄວາມແຕກຕ່າງດ້ານການພັດທະນາ ພາຍໃນປະເທດສະມາຊິກ
ທ່ານ ດຣ. ນາມ ວິຍະເກດ ລັດຖະມົນຕີວ່າການກະຊວງອຸດສາຫະກຳ ແລະ ການຄ້າ ໄດ້ຖະແຫລງຜົນສຳເລັດຂອງກອງປະຊຸມ ລັດຖະມົນຕີເສດຖະກິດຊຽນບໍ່ເປັນທາງການ ຄັ້ງທີ 20 ທີ່ປະເທດສິງກະໂປ ວ່າ: ໃນກອງປະຊຸມໄດ້ຍົກບັນຫາການເພີ່ມທະວີ ຄວາມຮັບຮູ້ ແລະ ປູກຈິດສຳນຶກກ່ຽວກັບປະຊາຄົມເສດຖະກິດອາຊຽນໃຫ້ແກ່ປະຊາຊົນທົ່ວໄປ ຢ່າງເລິກເຊີ່ງ, ປະຕິບັດແຜນງານ, ຄວາມມີສິດເທົ່າທຽມດ້ານການພັດທະນາຂອງອາຊຽນ ໃຫ້ເກີດຜົນເປັນຈິງ, ຮັດແນ້ນການຮ່ວມມືດ້ານການພັດທະນາທຸລະກິດ ຂະຫນາດນ້ອຍ ແລະ ກາງ (SMEs), ບັນດາສັນຍາການບໍລິການ ແລະ ການລົງທຶນ ລະຫວ່າງອາຊຽນ-ຢິປຸ່ນ, ອາຊຽນ-ອິນເດຍ ທີ່ຈະຖືກລົງນາມໃນປີນີ້ ເຊິ່ງຈະເປັນແຮງຍູ້ຫນູນ ໃຫ້ແກ່ການເຊື່ອມໂຍງຕະຫລາດ ໃນຂົງເຂດ ໃຫ້ຍັບໃກ້ກັນຫລາຍຂຶ້ນ, ເປັນເງື່ອນໄຂອຳນວຍໃຫ້ແກ່ການຄ້າ ແລະ ການລົງທຶນ.
ໃນກອງປະຊຸມ: ສະມາຊິກອາຊຽນຍັງຫາລືການຈັດຕັ້ງແຜນແມ່ບົດປະຊາຄົມເສດຖະກິດອາຊຽນ ແລະ ການແກ້ໄຂສິ່ງກີດກັ້ນທາງດ້ານການຄ້າທີ່ບໍ່ແມ່ນອັດຕາພາສີ. ການເຈລະຈາ ອາຊຽນບວກ 6 ຫລືເອີ້ນວ່າ ຄວາມເປັນຮຸ້ນສ່ວນທາງດ້ານເສດຖະກິດຮອບດ້ານຂອງພາກພື້ນ (Regional Comprehensive Economic Partnership) ທີ່ໄດ້ດຳເນີນມາ 3 ຮອບ ນັບແຕ່ເດືອນພຶດສະພາ 2013 ເປັນຕົ້ນມາ ແລະ ຄາດວ່າຈະສຳເລັດໃນປີ 2015 ນີ້ ເປັນກາລະໂອກາດອັນດີໃຫ້ແກ່ອາຊຽນ ແລະ ປະເທດຄູ່ເຈລະຈາ ຈະໄດ້ຜົນປະໂຫຍດສູງສຸດຈາກການເຈລະຈາຄັ້ງນີ້ ໃນລັກສະນະຕ່າງຝ່າຍ ຕ່າງມີຜົນປະໂຫຍດ.
ໃນໂອກາດນີ້ ທ່ານ ລັດຖະມົນຕີ ຍັງໄດ້ພົບປະແບບສອງຝ່າຍ ກັບ ລັດຖະມົນຕີວ່າການກະຊວງອຸດສາຫະກຳ ແລະ ການຄ້າ ສສຫວຽດນາມ ເພື່ອປຶກສາຫາລືກ່ຽວກັບ ບັນຫາການຂົນສົ່ງ, ການຄ້າຊາຍແດນ, ສ່ວນພົບປະແບບກັບ ລັດຖະມົນຕີການຄ້າ ປະເທດກຳປູເຈຍ ກ່ຽວກັບການແກ້ໄຂ ການນຳໄມ້ຜ່ານ ສປປລາວ.
ໂດຍ: ທິລາວັນ
ຄັດຈາກ: ນສພ ເສດຖະກິດ-ການຄ້າ
