ພາຍຫຼັງທີ່ກະຊວງການເງີິນໄດ້ສະເໜີຕໍ່ສະພາແຫ່ງຊາດກ່ຽວກັບກົດໝາຍວ່າດ້ວຍອາກອນມູນຄ່າເພີ່ມເຄື່ອງຈັກ, ວັດຖຸອຸປະກອນ ແລະ ພາຫະນະການຜະລິດ ທີ່ເປັນຜະລິດຕະພັນພາຍໃນ ແລະ ນໍາເຂົ້າຈາກຕ່າງປະເທດເຊິ່ງຈະເຮັດໃຫ້ຕົ້ນທຶນການຜະລິດໃນຂະແໜງການຕ່າງໆຕໍ່າລົງ
ໃນຕອນເຊົ້າ ວັນທີ23 ກໍລະກົດ 2014 ຜ່ານມາ ທ່ານ ບຸນໂຈມ ອຸບົນປະເສີດ ລັດຖະມົນຕີວ່າການກະຊວງການເງິນໄດ້ ສະເໜີຮ່າງກົດໝາຍວ່າດ້ວຍອາກອນມູນຄ່າເພີ່ມສະບັບປັບປຸງຕໍ່ກອງປະຊຸມສະໄໝສາມັນເທື່ອທີ່ 7 ຂອງສະພາແຫ່ງຊາດຊຸດທີ່ VII ເພື່ອໃຫ້ສອດຄ່ອງກັບສະພາບການປ່ຽນແປງຂອງເສດຖະກິດພາຍໃນ, ຫຼຸດຜ່ອນການເກັບອາກອນມູນຄ່າເພີ່ມ, ລາຍການບັນຊີທີ່ພົວພັນເຖີງຂະບວນການຜະລິດ ເພື່ອຫຼຸດຕົ້ນທຶນລົງ ພ້ອມທັງໃຫ້ສອດຄ່ອງກັບລະບຽບການຂອງອົງການການຄ້າໂລກ ແລະ ເປັນການກຽມຄວາມພ້ອມເຂົ້າ ປະຊາຄົມເສດຖະກິດອາຊຽນໃນທ້າຍປີ 2015 ທີ່ຈະມາເຖິງນີ້
ຮ່າງກົດໝາຍສະບັບປັບປຸງໃໝ່ ໃນມາດຕາ 16 ມີການປັບປຸງຄື: ໄດ້ລະບຸໄວ້ຊັດເຈນກ່ຽວກັບການກຳຈັດອັດຕາການເກັບອາກອນມູນຄ່າເພີ່ມໃນບາງລາຍການສີນຄ້າໃຫ້ເຫຼືອ 0% ໄດ້ແກ່: ວັດຖຸອຸປະກອນ, ເຄຶ່ອງຈັກ ແລະ ພາຫະນະ ການຜະລິດ ທີ່ເປັນຜະລິດຕະພັນພາຍໃນ ແລະ ນຳເຂົ້າຈາກຕ່າງປະເທດ ເຊີ່ງພາຍໃນບໍ່ສາມາດຜະລິດໄດ້ ຫຼື ຜະລິດໄດ້ແຕ່ບໍ່ພຽງພໍ ເພື່ອນຳໃຊ້ເຂົ້າໃນການຜະລິດ ແລະ ການລົງທຶນທີ່ເປັນຊັບສົມບັດຄົງທີ່.
ໃນມາດຕາດັ່ງກ່າວຍັງໄດ້ລະບຸຕື່ມອີກວ່າ: ອັດຕາການເກັບອາກອນມູນຄ່າເພີ່ມ ສຳລັບສິນຄ້າ ແລະ ການບໍລິການທີ່ນຳເຂົ້າ, ທີ່ຜະລິດ ແລະ ຊົມໃຊ້ຢູ່ພາຍໃນ ສ.ປ.ປ ລາວ ການສົ່ງອອກຊັບພະຍາກອນທຳມະຊາດທີ່ບໍ່ແມ່ນຜະລິດຕະພັນສຳເລັດຮູບແມ່ນ 10%
ທ່ານໄດ້ກ່າວຕື່ມອີກວ່າ: ສຳລັບເຫດຜົນ ແລະ ຄວາມຈຳເປັນໃນການປັບປຸງກົດໝາຍວ່າດ້ວຍອາກອນມູນຄ່າເພີ່ມແມ່ນເພື່ອໃຫ້ກົດໝາຍດັ່ງກ່າວມີເນຶ້ອໃນສົມບູນ, ຈະແຈ້ງ, ລະອຽດ ສອດຄ່ອງກັບກົດໝາຍການສົ່ງເສີມການລົງທຶນ, ການຂະຫຍາຍຕົວຂອງເສດຖະກິດ-ສັງຄົມໃນປັດຈຸບັນກໍ່ຄືອະນາຄົດໃນຕໍ່ໜ້າ, ເພື່ອໃຫ້ກົດໝາຍສະບັບດັ່ງກ່າວຮັບປະກັນເປັນເຄຶ່ອງມືທີ່ສຳຄັນໃນການຂຸດຄົ້ນແລ່ງລາຍຮັບງົບປະມານແຫ່ງລັດໃຫ້ໄດ້ຢ່າງໝັ້ນຄົງ, ເພື່ອແກ້ໄຂບັນຫາກ່ຽວກັບການເກັບອາກອນຈາກຊັບພະຍາກອນທຳມະຊາດ ການຫັກການສົ່ງຄືນເພື່ອໃຫ້ສອດຄ່ອງກັບການເຊື່ອມໂຍງເຂົ້າກັບເສດຖະກິດສາກົນ ໂດຍສະເພາະແມ່ນລະບຽບການຂອງອົງການການຄ້າໂລກ ແລະ ເພື່ອຮອງຮັບໃຫ້ແກ່ການເຂົ້າເປັນສະມາຊິກປະຊາຄົມເສດຖະກິດອາຊຽນ
ກົດໝາຍອາກອນມູນຄ່າເພີ່ມສະບັບເກົ່າມີ 7 ພາກ 13 ໝວດ ແລະ 55 ມາດຕາ, ສ່ວນສະບັບປັບປຸງໃໝ່ມີ 10 ພາກ 12 ໝວດ 66 ມາດຕາ, ມາດຕາທີ່ຮັກສາໄວ້ເດີມມີ 22 ມາດຕາ, ມາດຕາທີ່ມີການປັບປຸງໃໝ່ມີ 24 ມາດຕາ, ມາດຕາທີ່ເພີ່ມເຂົ້າໃໝ່ມີ20 ມາດຕາ
