ກອງປະຊຸມຝຶກອົບຮົມ ວຽກງານແຂ່ງຂັນການຄ້າ ແລະ ວຽກງານປົກປ້ອງຜູ້ຊົມໃຊ້ ແມ່ນໄດ້ຈັດຂຶ້ນພາຍໃຕ້ໂຄງການຮ່ວມມືລະຫວ່າງກົມການຄ້າພາຍໃນ ແລະ ອົງການ GIZ ທີ່ເປັນຜູ້ສະໜັບສະໜູນດ້ານທຶນຮອນກ່ຽວກັບວຽກງານແຂ່ງຂັນການຄ້າ ໂດຍແມ່ນອາຈານຜູ້ຊ່ຽວຊານທາງດ້ານເສດຖະສາດ ແລະ ກົດໝາຍ ຈາກມະຫາວິທະຍາໄລຊຽງໃໝ່ ເປັນຜູ້ບັນລະຍາຍ ເຊີ່ງການຝຶກອົບຮົມດັ່ງກ່າວໄດ້ຈັດຂຶ້ນເປັນສອງໄລຍະຄື:
ໄລຍະທີ I ຈັດຂື້ນ ໃນລະຫວ່າງວັນທີ 7 -11 ກໍລະກົດ 2014 ທີ່ ສະຖາບັນຄົ້ນຄ້ວາເສດຖະກິດການຄ້າ ບ້ານ ໂພນທັນ ເມືອງ ສີສັດຕະນາກ ນະຄອນຫລວງວຽງຈັນ ສປປ ລາວ ພາຍໃຕ້ການເປັນປະທານຂອງ ທ່ານ ເຫລື່ອມ ຍົງວົງສິດທິ ຫົວໜ້າກົມການຄ້າພາຍໃນ ກະຊວງອຸດສາຫະກຳ ແລະ ການຄ້າ ທັງເປັນຮອງຫົວໜ້າຄະນະຮັບຜິດຊອບສ້າງຮ່າງກົດໝາຍ ວ່າດ້ວຍການແຂ່ງຂັນການຄ້າ, ເຂົ້າຮ່ວມການຝຶກອົບຮົມຄັ້ງນີ້ມີ ຮອງຫົວໜ້າກົມການຄ້າພາຍໃນ, ທ່ານ ນ. Sita Zimpel ຜູ້ຕິດຕາມໂຄງການ GIZ ແລະ ມີຜູ້ຕາງໜ້າຈາກຂະແໜງການກ່ຽວຂ້ອງ ອ້ອມຂ້າງສູນກາງ ແລະ ບັນດາແຂວງ ພ້ອມດ້ວຍ ຄະນະຮັບຜິດຊອບສ້າງຮ່າງກົດໝາຍດັ່ງກ່າວເຊັ່ນ: ຈາກສະພາແຫ່ງຊາດ, ຫ້ອງວ່າການລັດຖະບານ, ສານປະຊາຊົນສູງສຸດ, ກະຊວງຍຸຕິທຳ, ກະຊວງພາຍໃນ, ຜູ້ຕາງໜ້າຈາກກົມກ່ຽວຂ້ອງ ພາຍໃນກະຊວງອຸດສາຫະກຳ ແລະ ການຄ້າ ແລະ ຜູ້ປະສານງານໂຄງການ GIZ ເຂົ້າຮ່ວມ , ເຊິ່ງມີຜູ້ເຂົ້າຮ່ວມທັງໝົດ ຈຳນວນ 35 ທ່ານ. ການຝຶກອົບຮົມໃນຄັ້ງນີ້ແມ່ນໄດ້ຮຽນຮູ້ພື້ນຖານຄວາມກ່ຽວພັນລະຫວ່າງເສດຖະສາດ ແລະ ວຽກງານແຂ່ງຂັນການຄ້າ ແລະ ບົດຮຽນກ່ຽວກັບການຈັດຕັ້ງປະຕິວຽກງານປົກປ້ອງຜູ້ຊົມໃຊ້ຂອງໄທ.
ໄລຍະທີ 2 ແມ່ນໄດ້ຈັດຂຶ້ນໃນລະຫວ່າງວັນທີ 21 – 25 ກໍລະກົດ 2014 ທີ່ ມະຫາວິທະຍາໄລຊຽງໃຫມ່ ປະເທດ ໄທ ໃຫ້ກຽດກ່າວເປີດພິທີໂດຍ ທ່ານ ນ. ກັນຍາ ຮິລັນວັດທະນະ ຜູ້ຊ່ວຍຄະນະບໍດີ ຄະນະນິຕິສາດ ມະຫາວິທະຍາໄລຊຽງໃໝ່. ເຂົ້າຮ່ວມການຝຶກອົບຮົມຄັ້ງນີ້ມີ ທ່ານ ຮອງຫົວໜ້າກົມການຄ້າພາຍໃນ, ຜູ້ຕາງໜ້າຈາກສະພາແຫ່ງຊາດ, ຫ້ອງວ່າການລັດຖະບານ, ສານປະຊາຊົນສູງສຸດ, ກະຊວງ ພາຍໃນ ແລະ ບັນດາຄະນະວິຊາການ ຈາກກະຊວງອຸດສາຫະກໍາ ແລະ ການຄ້າ ທີ່ຖືກແຕ່ງຕັ້ງເປັນຄະນະຮັບຜິດຊອບສ້າງຮ່າງກົດໝາຍວ່າດ້ວຍການແຂ່ງຂັນການຄ້າເຂົ້າຮ່ວມ, ນອກນີ້ຍັງມີທ່ານ ນ. Sita Zimpel ທີ່ປຶກສາໂຄງການ GIZ ພ້ອມດ້ວຍຜູ້ປະສານງານໂຄງການ GIZ ເຂົ້າຮ່ວມ , ເຊິ່ງມີຜູ້ເຂົ້າຮ່ວມທັງໝົດ ຈຳນວນ 17 ທ່ານ. ການຝຶກອົບຮົມຄັ້ງນີ້ແມ່ນນັກສຳມະນາກອນໄດ້ລົງເລິກຮຽນຮູ້ກ່ຽວກັບ: ໜ້າທີ່, ຄວາມໝາຍສໍາຄັນຂອງກົດໝາຍວ່າດ້ວຍການແຂ່ງຂັນການຄ້າ, ການຄອບຕອງຕະຫລາດ, ການຕົກລົງຮ່ວມກັນໃນການປະມູນ, ການຕ້ານການຮ່ວມຕົວ, ການຮ່ວມກັນກຳນົດລາຄາ ແລະ ກໍລະນີອື່ນໆທີ່ກ່ຽວກັບການແຂ່ງຂັນການຄ້າ.
