ກອງປະຊຸມຂະແໜງການຄ້າ ແລະ ພາກທຸລະກິດ ຄັ້ງທີ 6 ຈັດຂື້ນໃນວັນທີ 15 ຕຸລາ 2014 ນີ້ ເພື່ອປຶກສາຫາລື ບັນດາຜົນສຳເລັດອັນຕົ້ນຕໍ ຕະຫຼອດໄລຍະ 1 ປີ ຜ່ານມາ ແລະ ບັນດາສິ່ງກີດຂວາງສະພາບແວດລ້ອມຂອງການລົງທຶນ ທີ່ກໍາລັງເປັນອຸປະສັກຕໍ່ການຂະຫຍາຍຕົວຂອງຂະແໜງການໂຮງຈັກໂຮງການ ແລະ ການບໍລິການ ໃນລາວ.
ກອງປະຊຸມຈັດຂື້ນເປັນເວລາເຄິ່ງມື້ ໂດຍກົມແຜນການ ແລະ ການຮ່ວມມື, ກະຊວງອຸດສາຫະກຳ ແລະ ການຄ້າ ຮ່ວມກັບ ບັນດາຄູ່ຮ່ວມພັດທະນາ, ຕາງໜ້າຈາກສະຖານທູດຕ່າງປະເທດປະຈຳລາວ, ຕາງໜ້າຈາກອົງການຈັດຕັ້ງສາກົນ ສະພາການຄ້າ ແລະ ອຸດສາຫະກຳແຫ່ງຊາດ ແລະ ສະມາຄົມທຸລະກິດທັງພາຍໃນ ແລະ ຕ່າງປະເທດ ໂດຍມີຜູ້ເຂົ້າຮ່ວມຈຳນວນ 100 ກ່ວາ ທ່ານ ຈາກກະຊວງອຸດສາຫະກໍາ ແລະ ການຄ້າ, ກະຊວງທີ່ກ່ຽວຂ້ອງ, ບັນດາຄູ່ຮ່ວມພັດທະນາ ແລະ ຜູ້ໃຫ້ທຶນ.
ໃນທີ່ປະຊຸມ, ພະນະທ່ານ ເຂັມມະນີ ພົນເສນາ, ລັດຖະມົນຕີວ່າການ ກະຊວງອຸດສາຫະກຳ ແລະ ການຄ້າ ທັງເປັນປະທານຂອງກອງປະຊຸມ ຮ່ວມກັບ ພະນະ ທ່ານ Michael Grau, ເອກອັກຄະລັດຖະທູດແຕ່ງຕັ້ງເຢຍລະມັນ ປະຈໍາ ສປປ ລາວ ແລະ ທ່ານ Mr. Michel Goffin ອຸປະທຸດ ສະຫະພາບເອີລົບ ປະຈໍາ ສປປ ລາວ ທ່ານໄດ້ກ່າວເຖິງຄວາມຈໍາເປັນໃນການສົ່ງເສີມບັນດາຂະແໜງການທີ່ບໍ່ແມ່ນຊັບພະຍາກອນທຳມະຊາດໃຫ້ກາຍເປັນຍຸດທະສາດ ເພື່ອສາມາດບັນລຸການເຕີບໂຕທີ່ດີ ແລະ ໜັ້ນທ່ຽງ. ໂດຍພະນະທ່ານ ເຂັມມະນີ ພົນເສນາໄດ້ກ່າວວ່າ “ການຂະຫຍາຍຕົວດ້ານການຂຸດຄົ້ນຊັບພະຍາກອນທຳມະຊາດ ໄດ້ສ້າງຜົນປະໂຫຍດອັນມາຫາສານມາສູ່ເສດຖະກິດຂອງ ລາວ ເຊິ່ງເຫັນໄດ້ຈາກອັດຕາການຂະຫຍາຍຕົວດ້ານເສດຖະກິດທີ່ສູງ, ລາຍຮັບໃນສົກງົບປະມານເພີ່ມຂື້ນ, ພື້ນຖານໂຄງລ່າງມີການພັດທະນາ ແລະ ມີການປັບປຸງໃນດ້ານລະບຽບການ ແລະ ກົດໝາຍສິ່ງແວດລ້ອມ. ໃນຄະນະດຽວກັນ, ການອາໄສຂະ ແໜງການຊັບພະຍາກອນທຳມະຊາດຫຼາຍເກີນໄປ ສຳລັບການຂະຫຍາຍຕົວທາງດ້ານເສດຖະກິດ ອາດກໍ່ໃຫ້ເກີດຄວາມສ່ຽງຢ່າງຮຸນແຮງ ໃນການພັດທະນາແບບຍືນຍົງໃນໄລຍະຍາວ ຂອງ ສປປ ລາວ. ໃນນີ້, ຈຸດປະສົງຫຼັກຂອງໂຄງການພັດທະນາການຄ້າ ແລະ ພາກທຸລະກິດຂອງພວກເຮົາ ແມ່ນສຸມໃສ່ ການອຳນວຍຄວາມສະດວກໃຫ້ກັບບັນດາຂະ
ແໜງການທີ່ບໍ່ນຳໃຊ້ຊັບພະຍາກອນທຳມະຊາດ ໂດຍລວມມີ: ກ) ສົ່ງເສີມຄວາມອາດສາມາດໃນການແຂ່ງຂັນທີ່ເປັນໄປໄດ້ທີ່ມີຢູ່, ຂ) ສົ່ງເສີມການເຂົ້າຮ່ວມຂອງຜູ້ທີ່ທຸກຍາກໃນວົງກ້ວາງ, ຄ) ຂົງເຂດທີ່ມີຄວາມສາມາດທີ່ຈະພັດທະນາເປັນຕະຫຼາດໄດ້.”
“ທ່ານ Mr. Michel Goffin ໄດ້ຢໍ້າໃຫ້ເຫັນເຖິງຄວາມສໍາຄັນຂອງການສະໜັບສະໜູນດ້ານການເງິນ ຂອງບັນດາ ຜູ້ໃຫ້ທຶນ ເພື່ອຊ່ວຍ ສປປ ລາວ ເພື່ອເພີ່ມທະວິ ບູລິມະສິດການພັດທະນາຂະແໜງການຄ້າ ແລະ ພາກທຸລະກິດ. ໂດຍຄາດຄະເນວ່າ ນັບແຕ່ປີ 2012 ເຖິງ 2018 ການຊ່ວຍເຫຼືອທາງດ້ານການເງິນແກ່ ສປປ ລາວ ຈະສູງເຖິງ 50 ລ້ານໂດລາສະຫະລັດ ເພື່ອໃຫ້ການຊ່ວຍເຫຼືອທາງດ້ານວິຊາການ ແກ່ລັດຖະບານລາວ ໃນການປັບປຸງປັນດານະໂຍບາຍ ທີ່ກ່ຽວຂ້ອງ, ສ້າງບັນດານິຕິກໍາ, ສ້າງສູນຂໍ້ມູນຂ່າວສານ ແລະ ໜ່ວຍງານຈັດຕັ້ງປະຕິບັດດ້ານວິຊາການ ໂດຍໃຫ້ ສອດຄ່ອງກັບມາດຕະຖານຄວາມຮຽກຮ້ອງຕ້ອງການ ຂອງອົງການ ການຄ້າໂລກ ແລະ ອາຊຽນ; ລວມທັງການສະໜັບ ສະໜູນທາງດ້ານການເງິນ ແລະ ເຕັກນິກໂດຍກົງ ໃຫ້ກັບ ບັນດາ SMEs ແລະ ອື່ນໆ. ເປັນຕົ້ນແມ່ນການ ເຂົ້າເຖິງແຫຼ່ງທຶນ, ທຶນສົມທົບເພື່ອສົ່ງເສີມພາກທຸລະກິດ ແລະ ການໃຫ້ຄໍາປຶກສາດ້ານທຸລະກິດ. ໃນນີ້, ທ່ານ Goffin ຍັງໄດ້ເນັ້ນໃຫ້ເຫັນ ຄວາມຈໍາເປັນ ຂອງການໃຫ້ການຊ່ວຍເຫຼືອຢ່າງມີປະສິດທິຜົນ ເພື່ອໄດ້ຮັບຜົນປະໂຫຍດອັນສູງສຸດ ແກ່ການພັດທະນາພາກທຸລະກິດ ເຊິ່ງແມ່ນ ພາກສ່ວນທີ່ສໍາຄັນໃນການສ້າງຄວາມຫຼາກຫຼາຍທາງດ້ານ ເສດຖະກິດ ແລະ ການຂະຫຍາຍຕົວທາງດ້ານເສດຖະກິດທີ່ໝັ້ນທ່ຽງ.”
ກອງປະຊຸມຍັງໄດ້ປຶກສາຫາລື ບັນດາຂໍ້ຄິດເຫັນຂອງໜ່ວຍງານທີ່ຈະປະກອບເຂົ້າໃຫ້ກັບກອງປະຊຸມໂຕະມົນ, ຂອບຂອງການກະກຽມສຳລັບແຜນພັດທະນາເສດຖະກິດ ແລະ ສັງຄົມ 5 ປີຕໍ່ໜ້າ, ການຊອກຫາຈຸດສຳຄັນ ແລະ ຂໍ້ສະເໜີແນະຕ່າງໆເພື່ອຮັບໃຊ້ໃນການປະເມີນຜົນວິສາຫະກິດ, ການປະເມີນຜົນການອຳນວຍຄວາມສະດວກທາງດ້ານການຄ້າ ແລະ ການຂົນສົ່ງ ທີ່ນຳສະເໜີໂດຍ ຕາງໜ້າຈາກອົງການ GIZ ແລະ ທະນາຄານໂລກ ຕາມລຳດັບ.
ໜ່ວຍງານ TPSWG ແມ່ນໜຶ່ງໃນສິບໜ່ວຍງານ ພາຍໃຕ້ຂະບວນການໂຕະມົນ ແລະ ເປັນເວທີຫຼັກ ສໍາລັບການປຶກສາຫາລື ດ້ານນະໂຍບາຍ ລະຫວ່າງພາກລັດ ແລະ ບັນດາຄູ່ຮ່ວມພັດທະນາ. ບັນດາຜູ້ທີ່ເຂົ້າຮ່ວມ ໃນກອງປະຊຸມ ແມ່ນມາຈາກພາກລັດ, ຄູ່ຮ່ວມພັດທະນາ, ພາກທຸລະກິດ ແລະ ອົງການຈັດຕັ້ງສັງຄົມ. ສ່ວນໜ່ວຍງານຂະແຫນງການອື່ນ ໃນ 10 ໜ່ວຍງານລວມມີ: ສາທາ; ສຶກສາ; ການປົກຄອງ; ເສດຖະກິດມະຫາພາກ; ໂຄງລ່າງພື້ນຖານ; ການຄວບຄຸມບັນຫາຢາເສບຕິດ; ລະເບີດບໍ່ທັນແຕກ; ກະສິກຳ ແລະ ພັດທະນາຊົນນະບົດ; ແລະ ການຄຸ້ມຄອງຊັບພະຍາກອນທຳມະຊາດ ແລະ ສິ່ງແວດລ້ອມ.
ງານມະຫະກຳສີມືຫັດຖະກຳລາວ ຄັ້ງທີ 13 ລະຫວ່າງ ວັນທີ (13-19 ຕຸລາ 2014) ໄດ້ເປີດຂຶ້ນຢ່າງຍິ່ງໃຫຍ່, ບັນດາຊາວຊ່າງຫັດຖະກຳຂອງລາວໄດ້ນຳເອົາຜະລິດຕະພັນຈາກທ້ອງຖິ່ນຂອງຕົນເຂົ້າວາງສະແດງຂາຍຢ່າງໜາແໜ້ນ ເຊິ່ງປີນີ້ມີຫ້ອງວາງສະແດງເຖິງ 255 ຫ້ອງ ຫຼາຍກວ່າ 100 ຫົວໜ່ວຍ ຜູ້ຜະລິດຫັດຖະກຳທົ່ວປະເທດ.
ງານມະຫະກຳສີມືຫັດຖະກຳລາວ ໄດ້ເປີດຂຶ້ນໃນຕອນບ່າຍວານນີ້ ທີ່ສູນການຄ້າລາວ-ໄອເຕັກ ພາຍໃຕ້ການເຂົ້າຮ່ວມຂອງ ທ່ານ ທອງສິງ ທຳມະວົງ ນາຍົກລັດຖະມົນຕີ ແຫ່ງ ສປປ ລາວ, ທ່ານ ນາງ ເຂັມມະນີ ພົນເສນາ ລັດຖະມົນຕີວ່າການກະຊວງອຸດສາຫະກຳ ແລະ ການຄ້າ, ທ່ານ ດຣ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ, ທ່ານ ສີສະຫວາດ ທິຣະວົງ ປະທານສະພາການຄ້າ ແລະ ອຸດສາຫະກຳແຫ່ງຊາດ ມີບັນດາທ່ານພະນັກງານຈາກພາກລັດ, ຜູ້ຕ່າງໜ້າຈາກອົງການຈັດຕັ້ງສາກົນ, ນັກທຸລະກິດ ແລະ ຊາວຊ່າງຫັດຖະກຳລາວເຂົ້າຮ່ວມ.
ຈຸດປະສົງຂອງການຈັດງານແມ່ນ ເພື່ອປະຕິບັດແຜນສົ່ງເສີມການວາງສະແດງທີ່ໄດ້ຈັດຂຶ້ນທຸກໆປີ ເຊິ່ງປີນີ້ເປັນປີທີ 13 ທີ່ໄດ້ຈັດຂຶ້ນ ທັງເປັນການເປີດໂອກາດໃຫ້ຊາວຊ່າງຫັດຖະກຳໄດ້ນຳຜະລິດຕະພັນຂອງຕົນອອກມາສູ່ຕະຫຼາດ ທັງເປັນເວທີພົບປະແລກປ່ຽນບົດຮຽນກັບລູກຄ້າໂດຍກົງ, ມີການຊື້-ຂາຍຜະລິດຕະພັນຢ່າງຍຸດຕິທຳ ແລະ ອາດຈະເຮັດຂໍ້ຜູກພັນສັ່ງຈອງສິນຄ້າຫັດຖະກຳກັນໃນຕໍ່ໜ້າ ພິເສດງານນີ້ ຜະລິດຕະພັນທີ່ເດັ່ນແມ່ນການປະຍຸກຜ້າຝ້າຍ ແລະ ຜ້າໄໝຂອງລາວໄດ້ໂດຍເດັ່ນ ໂດຍສະເພາະແມ່ນຕົບແຕ່ງໃສ່ກັບເຄື່ອງປະດັບ.
ທ່ານ ສີສະຫວາດ ທິຣະວົງ ປະທານສະພາການຄ້າ ແລະ ອຸດສາຫະກຳແຫ່ງຊາດ ກ່າວວ່າ: ງານມະຫະກໍາສີມືຫັດຖະກຳລາວຄັ້ງທີ 13 ເຊິ່ງເປັນການເອກອ້າງຜົນງານຂອງຊາວຊ່າງຫັດຖະກຳ ຕໍ່ສາຍຕາແຂກທັງພາຍໃນ ແລະ ຕ່າງປະເທດ ແຕ່ວ່າຊາວຊ່າງຫັດຖະກຳຍັງມີຄວາມຮູ້ຈຳກັດໃນຫຼາຍໆດ້ານທີ່ຕ້ອງໄດ້ຮຽນຮູ້ຕື່ມເພື່ອພັດທະນາສີມືຕົນໃຫ້ໄດ້ມາດຖານແຫ່ງຊາດ ແລະ ພາກພື້ນໃນອະນາຄົດອັນໃກ້ນີ້ ເຊິ່ງຍັງຈຳປັນຕ້ອງໄດ້ຮັບການສະໜັບສະໜູນ ແລະ ເອື້ອອຳນວຍຄວາມສະດວກຈາກອົງການມະຫາພາກຢ່າງເປັນຮູບປະທຳ ເພື່ອກຽມພ້ອມຜະລິດສິນຄ້າຫັດຖະກຳໃຫ້ຫຼາກຫຼາຍ, ຮັບໃຊ້ຕະຫຼາດພາຍໃນ ແລະ ສົ່ງອອກຕາມນະໂຍບາຍເປີດກວ້າງທາງດ້ານເສດຖະກິດຂອງພັກ ແລະ ລັດຖະບານ.
ທ່ານກ່າວຕື່ມວ່າ: ງານຫັດຖະກຳລາວຄັ້ງນີ້ ຈັດຂຶ້ນໃນທ່າມກາງບັນຍາກາດແຫ່ງການກະກຽມສະເຫຼີມສະຫຼອງຫຼາຍວັນປະຫວັດສາດຂອງຊາດເຮົາ. ໃນນັ້ນ, ພວກເຮົາກໍ່ກຳລັງກຽມຄວາມພ້ອມ ເພື່ອເຂົ້າຮ່ວມປະຊາຄົມເສດຖະກິດອາຊຽນໃນທ້າຍປີ 2015 ທີ່ຈະມາເຖິງ ເຊິ່ງທຸກພາກສ່ວນຈະຕ້ອງມີແຜນການລະອຽດຂອງຕົນລວມໄປຮອດຊາວຊ່າງຫັດຖະກຳຂອງພວກເຮົາ. ເຊື່ອໝັ້ນວ່າ: ສະມາຄົມຫັດຖະກຳລາວເປັນໜຶ່ງໃນສະມາຄົມຕົ້ນໆຂອງສະພາການຄ້າ ແລະ ອຸດສາຫະກຳແຫ່ງຊາດ ຈະມີໄຫວພິກ ແລະ ຫົວຄິດປະດິດສ້າງໃນການນຳພາຊາວຊ່າງຫັດຖະກຳກໍ່ຄືບັນດາສະມາຊິກຂອງສະມາຄົມກຽມພ້ອມເຂົ້າສູ່ປະຊາຄົມເສດຖະກິດອາຊຽນ.
ເປັນອີກບາດກ່າວໜຶ່ງໃນການເຕົ້າໂຮມເອົາບັນດາເຄື່ອງຫັດຖະກຳ ແລະ ນຳເອົາຊາວຊ່າງຫັດຖະກຳຂອງລາວເຮົາຫັນເຂົ້າສູ່ຕະຫຼາດ ສ້າງມູນຄ່າທາງການຄ້າ ແລະ ສົ່ງເສີມສີມື, ສ້າງວຽກເຮັດງານທຳໃຫ້ປະຊາຊົນລາວບັນດາເຜົ່າ, ສະມາຄົມຫັດຖະກຳລາວແມ່ນມີຄວາມພະຍາຍາມໃນການປຸກລະດົມເຕົ້າໂຮມເອົາຊາວຊ່າງຫັດຖະກຳລາວໃນທົ່ວປະເທດເຂົ້າຮ່ວມກິດຈະກຳຕ່າງໆ ບໍ່ວ່າຈະເປັນການພັດທະນາສິນຄ້າຫັດຖະກຳໃຫ້ມີຄຸນນະພາບສູງ ແລະ ເອົາໃຈໃສ່ອະນຸລັກຮັກສາວັດທະນະທຳສືບສານພູມປັນຍາ ແລະ ສິ່ງປະດິດຕ່າງໆຂອງບັນພຣະບຸລຸດລາວເຮົາ.
ທ່ານ ຫານຊະນະ ສີສານ ປະທານສະມາຄົມຫັດຖະກຳລາວ ກ່າວວ່າ: ສະເພາະປີນີ້ ກໍ່ເປັນຄັ້ງທີ 13 ເພື່ອສ້າງໂອກາດໃຫ້ຊາວຊ່າງຫັດຖະກຳລາວທົ່ວປະເທດ ໄດ້ນຳເອົາສິນຄ້າຫັດຖະກຳຂອງຕົນມາວາງສະແດງ ແລະ ຂາຍ. ພ້ອມນີ້ຍັງເປີດໂອກາດໃຫ້ເຂົາເຈົ້າໄດ້ມາພົບປະແລກປ່ຽນບົດຮຽນນຳກັນ ຊອກຫາຄູ່ຄ້າ ຫຼື ຄູ່ຮ່ວມທຶນ, ຮ່ວມທຸລະກິດນຳກັນ ຊາວຊ່າງຫັດຖະກຳທີ່ມາຈາກທ້ອງຖິ່ນ ບໍ່ວ່າຈະຢູ່ໃກ້ ຫຼື ໄກ ໃນເຂດຫ່າງໄກສອກຫຼີກທຸລະການດານ ຍັງໄດ້ເຂົ້າຮ່ວມສຳມະນາເພື່ອຫາຄວາມຮູ້ ແລະ ສິ່ງທີ່ເປັນປະໂຫຍດໃນງານນີ້.
ທ່ານກ່າວຕື່ມອີກວ່າ: ນອກຈາກຈະມີການສະແດງ ແລະ ຂາຍຜະລິດຕະພັນຫັດຖະກຳລາວແລ້ວ ພາຍໃນງານກໍ່ຍັງມີກິດຈະກຳສາທິດການປູກມອນລ້ຽງມ້ອນ, ສານກະຕ່າ, ຕ່ຳຜ້າພື້ນເມືອງ ແລະ ອື່ນໆ. ໃນຄ່ຳຄືນຂອງວັນທີ 15 ຕຸລາ ຈະມີການເດີນແບບຊຸດອາພອນລາວ ເພື່ອພ້ອມພຽງກັນອະນຸລັກວັດທະນະທຳຂອງຊາດ ແລະ ລາຍການສະແດງອື່ນໆ.
ສຳລັບປີນີ້, ຫົວຂໍ້ຂອງງານແມ່ນຫັດຖະກຳເຄື່ອງທີ່ລະນຶກ, ການເຂົ້າຫາແຫຼ່ງທຶນ SME ແລະ ການກຽມຕົວເຂົ້າເປັນປະຊາຄົມເສດຖະກິດອາຊຽນ ເຊິ່ງຈະມີຊ່ຽວຊານຈາກພາກລັດ ແລະ ອົງການຈັດຕັ້ງສາກົນມາບັນຍາຍ, ງານດັ່ງກ່າວ ມີຊາວຊ່າງຫັດຖະກຳມາເຂົ້າຮ່ວມງານຫຼາຍກວ່າ 100 ຫົວໜ່ວຍ ແລະ ມີຫ້ອງຂາຍສຳລັບຫັດຖະກຳລາວທັງໝົດ 225 ຫ້ອງ ນອກນັ້ນກໍ່ມີການຄ້າຂາຍສິນຄ້າທົ່ວໄປ.
ທ່ານ ນາງ ສົມເພັດ ໂຄດສີເມືອງ ຜູ້ອຳນວຍການຫັດຖະກຳປ້າແສນ ບ້ານໂພນໝີ ແຂວງວຽງຈັນ ໄດ້ກ່າວວ່າ: ງານດັ່ງກ່າວ ສຳລັບຮ້ານຂອງຕົນໄດ້ເຂົ້າຮ່ວມເກືອບທຸກຄັ້ງ ເຊິ່ງກໍ່ມີການຕອບຮັບຈາກລູກຄ້າເປັນຈຳນວນຫຼາຍ, ທັງເປັນໂອກາດໃຫ້ຜະລິດຕະພັນຂອງຕົນ ກໍ່ຄືບັນດາຮ້ານອື່ນໆໄດ້ອອກສູ່ສາຍຕາລູກຄ້າ ແລະ ເປັນເວທີໃນການສະແດງເຖິງຄວາມງົດງາມຂອງເຄື່ອງຫັດຖະກຳລາວເຮົາ, ທັງເປັນຈຸດເຊື່ອມຕໍ່ການຊື້-ຂາຍແບບມີສັນຍາການສັ່ງຈອງ. ນອກຈາກນັ້ນ, ກໍ່ຍັງເປັນການຮັບເອົາຄຳຕຳນິຕິຊົມຈາກລູກຄ້າເພື່ອນຳກັບຄືນເມືອປັບປຸງ ແລະ ສົ່ງເສີມຕາມຄວາມຕ້ອງການຂອງຜູ້ຊົມໃຊ້.
ຢ່າງໃດກໍ່ຕາມ ບັນດາຜູ້ປະກອບການຍັງຮຽກຮ້ອງໃຫ້ພາກລັດເບິ່ງຄືນໃນການສົ່ງເສີມ ໂດຍສະເພາະການສະໜອງເງິນທຶນ, ການເກັບພາສີອາກອນ, ການຊອກຫາຕະຫຼາດ, ບັນຫາການຂົນສົ່ງ ແລະ ອື່ນໆ ທີ່ຈະສ້າງຄວາມສະດວກໃນຜະລິດພັນມີການພັດທະນາ ແລະ ສາມາດແຂ່ງຂັນໄດ້ໃນການເຊື່ອມໂຍງປະຊາຄົມເສດຖະກິດອາຊຽນ.
[ພາບ ແລະ ຂ່າວຈາກ ໜ່ວຍງານຈັດຕັ້ງປະຕິບັດໂຄງການ, ກົມແຜນການ ແລະ ການຮ່ວມມື, ກະຊວງອຸດສາຫະກຳ ແລະ ການຄ້າ]
