ຕອນເຊົ້າວັນທີ 21 ຕຸລາ 2014 ຜ່ານມາກະຊວງອຸດສາຫະກຳ ແລະ ການຄ້າ (ອຄ) ໄດ້ເປີດກອງປະຊຸມໃຫຍ່ຂອງຄະນະບໍລິຫານງານກຳມະບານກະຊວງ ອຄ ຄັ້ງທີ IV ເພື່ອຕີລາຄາຜົນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ III ແລະ ທິດທາງໜ້າທີ່ວຽກງານ 5 ປີຕໍ່ໜ້າ ແຕ່ປີ 2014-2019.
ເຂົ້າຮ່ວມເປັນປະທານໂດຍ ທ່ານ ຄຳຫຼ້າ ລໍລອນສີ ປະທານສູນກາງສະຫະພັນກຳມະບານລາວ, ທ່ານ ນາງ ເຂັມມະນີ ພົນເສນາ ລັດຖະມົນຕີວ່າການກະຊວງອຸດສາຫະກຳ ແລະ ການຄ້າ ມີຄະນະຊາວໜຸ່ມກະຊວງ, ຄະນະສະຫະພັນແມ່ຍິງກະຊວງ ພ້ອມດ້ວຍແຂກທີ່ມາຈາກລັດວິສາຫະກິດອ້ອມຂ້າງກະຊວງ, ສະພາການຄ້າ ແລະ ອຸດສາຫະກຳແຫ່ງຊາດ ພ້ອມດ້ວຍສະມາຊິກກຳມະບານອ້ອມຂ້າງກະຊວງເຂົ້າຮ່ວມ.
ທ່ານ ສັນຕິສຸກ ວິໄລຈະເລີນ ປະທານສະຫະພັນກຳມະບານກະຊວງ ອຄ ໄດ້ກ່າວວ່າ: ອົງການຈັດຕັ້ງສະຫະພັນກຳມະບານກະຊວງ ອຄ ເປັນການຈັດຕັ້ງມະຫາຊົນເປັນອົງກອນທີ່ຢູ່ພາຍໃຕ້ການຊີ້ນຳຄຸ້ມຄອງຂອງອົງຄະນະພັກກະຊວງ ອຄ ແລະ ເປັນພາກສ່ວນໜຶ່ງປະກອບສ່ວນສຳຄັນເຂົ້າໃນການປຸກລະດົມພະນັກງານ, ລັດຖະກອນ, ກຳມະກອນ ແລະ ຜູ້ອອກແຮງງານປະຕິບັດໜ້າທີ່ໃນຂົງເຂດອຸດສາຫະກຳ ແລະ ການຄ້າ.
ຕະຫຼອດ 5 ປີຜ່ານມາ ສະຫະພັນກຳມະບານໃນແຕ່ລະຂັ້ນໄດ້ພ້ອມກັນເປັນເຈົ້າການຈັດຕັ້ງປະຕິບັດເຜີຍແຜ່ມູນເຊື້ອ, ມະຕິຕ່າງໆຂອງພັກ-ລັດ ເພື່ອຍົກລະດັບທິດສະດີການເມືອງ, ແນວທາງນະໂຍບາຍຂອງພັກ, ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VI ແລະ ຄັ້ງທີ VIII, ກົດໝາຍລັດ ແລະ ປະຕິບັດໜ້າທີ່ຕາມພາລະບົດບາດ ພ້ອມກັນນີ້ຍັງເຮັດໜ້າທີ່ໃນການປົກປ້ອງຜົນປະໂຫຍດຂອງສະມາຊິກກຳມະບານ ແລະ ຊາວຜູ້ອອກແຮງງານ.
ວຽກງານການຈັດຕັ້ງພະນັກງານ-ລັດຖະກອນ ແລະ ກຳມະກອນທັງໝົດ ມີ 3.265 ສະຫາຍ, ຍິງ 912 ສະຫາຍ. ໃນນັ້ນ, ມີສະມາຊິກກຳມະບານທັງໝົດ 2.202 ສະຫາຍ, ຍິງ 573 ສະຫາຍ, ຂະຫຍາຍໃໝ່ 658 ສະຫາຍ, ຍິງ 89 ສະຫາຍ ນັບແຕ່ກອງປະຊຸມໃຫຍ່ຄັ້ງທີ III ເປັນຕົ້ນມາການຈັດຕັ້ງກຳມະບານ ໄດ້ມີສະຫະພັນເພີ່ມຂຶ້ນ ເຊັ້ນ: ສະຫະພັນກຳມະບານລັດວິສາຫະກິດ ນ້ຳມັນເຊື້ອໄຟລາວ, ສະຫະພັນກຳມະບານ ບໍລິສັດ ເບຍລາວ ເຫຼືອນັ້ນເປັນຮາກຖານ ແລະ ໜ່ວຍກຳມະບານມີ 16 ໜ່ວຍ, ຄະນະຮາກຖານມີ 84 ສະຫາຍ, ຍິງ 17 ສະຫາຍ ເວົ້າລວມກຳມະບານມີການຂະຫຍາຍຕົວຕໍ່ເນືອງ.
ທ່ານກກ່າວຕື່ມອີກວ່າ: ສຳລັບທິດທາງໃນ 5 ປີຕໍ່ໜ້າແຕ່ປີ 2015-2019 ມີຄື: ຕ້ອງໄດ້ເຊີດຊູບົດບາດຄວາມສາມາດໃນການຈັດຕັ້ງເຕົ້າໂຮມຄວາມສາມັກຄີ, ສຶກສາອົບຮົມ ແລະ ປຸກລະດົມສະມາຊິກກຳມະບານ, ພະນັກງານ ແລະ ກຳມະກອນ ທົ່ວກະຊວງເຂົ້າຮ່ວມການປະຕິບັດແຜນການ 5 ປີ ຄັ້ງທີ VIII ຢ່າງແຂງແຮງ.
ຍົກສູງວຽກງານການສຶກສາອົບຮົມ ແລະ ກໍ່ສ້າງອົງການກຳມະບານຂັ້ນຕ່າງໆ ແນ່ໃສ່ເຮັດໃຫ້ເປັນພະນັກງານດີ ມີລະບຽບວິໄນ ມີຄວາມຕື່ນຕົວທາງດ້ານການເມືອງ ມີຄວາມຮູ້ຄວາມສາມາດກຳແໜ້ນແນວທາງ ແລະ ຜັນຂະຫຍາຍແນວທາງມາເປັນແຜນວຽກປະຕິບັດຂອງຕົນ ພ້ອມທັງເພີ່ມທະວີຄວາມຮັບຜິດຊອບຂອງກຳມະບານຂັ້ນຕ່າງໆ ເພື່ອຮ່ວມໃນການສ້າງແຜນນະໂຍບາຍ, ກົດໝາຍ ແບະ ການປະຕິບັດສິດທິການຕິດຕາມ, ການກວດກາເຄື່ອນໄຫວປະຕິບັດຄຸ້ມຄອງລັດ ຄຸ້ມຄອງເສດຖະກິດສັງຄົມ ແລະ ອົງການກຳມະບານຂັ້ນຕົ້ນໃຫ້ຖືກຕ້ອງຕາມກົດໝາຍຂອງສະຫະພັນກຳມະບານລາວ.
ທີປະຊຸມຍັງໄດ້ປ່ອນບັດເລືອກຕັ້ງເອົາ ທ່ານ ສົມຫວັງ ນິນທະວົງ ຫົວໜ້າຫ້ອງການກະຊວງອຸດສາຫະກຳ ແລະ ການຄ້າ ເປັນປະທານສະຫະພັນກຳມະບານກະຊວງ ອຄ, ທ່ານ ອະນຸສິນ ພົນເສນາ, ທ່ານ ດຣ. ແກ້ວມໍລະກົດ ສິດລາກອນ ເປັນຮອງປະທານສະຫະພັນກຳມະບານກະຊວງ ແລະ ທ່ານ ນາງ ສອນຈັນ ພຸດທະວົງ ເປັນປະທານກວດກາສະຫະພັນກຳມະບານກະຊວງ ອຄ.
[ຂ່າວຈາກ ໜັງສືພິມເສດຖະກິດ-ການຄ້າ]
