ນາຍົກລັດຖະມົນຕີແຫ່ງ ສປປ ລາວ ອອກດຳລັດເລກທີ 359/ນຍ, ນະຄອນຫຼວງວຽງຈັນ ລົງວັນທີ 2 ຕຸລາ 2014 ວ່າດ້ວຍການແຕ່ງຕັ້ງລັດຖະມົນຕີຊ່ວຍວ່າການ ອີງໃສ່ຄວາມຮຽກຮ້ອງຕ້ອງການຂອງໜ້າທີ່ວຽກງານ ຢູ່ກະຊວງອຸດສາຫະກຳ ແລະ ການຄ້າ, ອີງຕາມກົດໝາຍວ່າດ້ວຍລັດຖະບານ ສປປ ລາວ ສະບັບເລກທີ 02/ສພຊ, ລົງວັນທີ 6 ພືດສະພາ 2003 ແລະ ອີງຕາມການຕົກລົງໃນກອງປະຊຸມຄະນະເລຂາທິການສູນກາງພັກຄັ້ງວັນທີ 04/09/2014.
ນາຍົກລັດຖະມົນຕີອອກດຳລັດ, ມາດຕາ 1 ແຕ່ງຕັ້ງ ທ່ານ ສົມຈິດ ອິນທະມິດ ເປັນລັດຖະມົນຕີຊ່ວຍວ່າການກະຊວງອຸດສາຫະກຳ ແລະ ການຄ້າ (ອຄ). ມາດຕາ 2 ຫ້ອງວ່າການລັດຖະບານ, ຄະນະຈັດຕັ້ງສູນກາງພັກ, ກະຊວງ, ອົງການ ແລະ ອົງການຈັດຕັ້ງຂັ້ນທ້ອງຖິ່ນ ພ້ອມດ້ວຍທ່ານທີ່ໄດ້ຮັບການແຕ່ງຕັ້ງຈົ່ງຮັບຮູ້ ແລະ ປະຕິບັດຕາມດຳລັດສະບັບນີ້ເປັນຢ່າງດີ.
ໃນພິທີ ທ່ານ ນາງ ເຂັມມະນີ ລັດຖະມົນຕີວ່າການກະຊວງ ອຄ ໄດ້ມີຄຳເປັນວ່າ: ການເຂົ້າມາຮັບຕຳແໜ່ງຂອງ ທ່ານລັດຖະມົນຕີຊ່ວຍວ່າການຄັ້ງນີ້ ໄດ້ເພີ່ມກຳລັງແຮງໃຫ້ກະຊວງ ອຄ ໃນການປະຕິບັດໜ້າທີ່ວຽກງານໃຫ້ດີຂຶ້ນກວ່າເກົ່າ ໂດຍສະເພາະ ຈາກບົດຮຽນ ແລະ ປະສົບການຂອງ ທ່ານ ສົມຈິດ ອິນທະມິດ ທີ່ໄດ້ເຄີຍຮ່ວມງານກັບກະຊວງ ອຄ ມາແລ້ວຫຼາຍຄັ້ງ ເຊື່ອວ່າຈະເຮັດໃຫ້ທຸກໆວຽກງານທີ່ທ່ານໄດ້ຮັບຜິດຊອບມີຜົນສຳເລັດເປັນຢ່າງດີ.
ທ່ານລັດຖະມົນຕີ ຍັງໄດ້ຮຽກຮ້ອງເຖິງພະນັກງານທົ່ວກະຊວງ ຈົ່ງໄດ້ພ້ອມກັນເຕົ້າໂຮມຄວາມສາມັກຄີລວມສູນປະຊາທິປະໄຕ, ພ້ອມກັນເຮັດໜ້າທີ່ວຽກງານຂອງຕົນຮັບຜິດຊອບຫຼ້ອນໜ້າທີ່, ມີຜົນສຳເລັດໃຫ້ເດີນແລ່ນສະດວກ.
ທ່ານ ສົມຈິດ ອິນທະມິດ ລັດຖະມົນຕີຊ່ວຍວ່າການກະຊວງ ອຄ ຜູ້ໃໝ່ກໍ່ໄດ້ຂຶ້ນກ່າວໃນພິທີວ່າ: ວຽກງານອຸດສາຫະກຳ ແລະ ການຄ້າເປັນວຽກງານທີ່ສຳຄັນ ຕັດສິນວຽກງານການຄ້າ ເຮັດແນວໃດເພື່ອໃຫ້ເສດຖະກິດຂອງຊາດມີຄວາມກ້າວໜ້າ. ສະນັ້ນແລ້ວ ໃນການເຂົ້າຮັບຕຳແໜ່ງໃໝ່ນີ້ຈະໄດ້ຮ່ວມກັບພະນັກງານຂອງກະຊວງ, ເຮັດໜ້າທີ່ດ້ວຍຄວາມຮັບຜິດຊອບສູງ ແລະ ຈະສູ້ຊົນເຮັດໃຫ້ປະສົບຜົນສຳເລັດເປັນຢ່າງດີ.
ພິທີໄດ້ຈັດຂຶ້ນຕອນແລງ ຂອງວັນທີ 28 ຕຸລາ 2014 ທີ່ກະຊວງ ອຄ ພາຍໃຕ້ການເປັນປະທານຂອງ ທ່ານ ນາງ ເຂັມມະນີ ພົນເສນາ ລັດຖະມົນຕີວ່າການກະຊວງ ອຄ, ທ່ານ ນາງ ບຸດສະດີ ທະນະເມືອງ ຫົວໜ້າກົມຄຸ້ມຄອງພະນັກງານຄະນະພັກກະຊວງ, ຫົວໜ້າກົມ-ຮອງກົມ, ຫົວໜ້າພະແນກ-ຮອງພະແນກ, ລວງທັງພະນັກງານອ້ອມຂ້າງກະຊວງ ອຄ ເຂົ້າຮ່ວມ.
[ພາບ ແລະ ຂ່າວຈາກ ໜັງສືພິມເສດຖະກິດ-ການຄ້າ]
