ໃນຕອນເຊົ້າຂອງວັນທີ 15 ມັງກອນ ທີ່ກະຊວງອຸດສາຫະກຳ ແລະ ການຄ້າ (ອຄ) ໄດ້ມີພິທີມອບ-ຮັບໜ້າທີ່ຫົວໜ້າກົມການຄ້າພາຍໃນ ລະຫວ່າງ ທ່ານ ເລື່ອມ ຍົງວົງສິດທີ ຫົວໜ້າກົມຜູ້ເກົ່າ (ອອກພັກຜ່ອນຮັບເບ້ຍບຳນານ) ແລະ ທ່ານ ບຸນທຽນ ແກ້ວສີພາ ຮັກສາການຫົວໜ້າກົມຜູ້ໃໝ່ ໂດຍການເຂົ້າຮ່ວມຂອງທ່ານ ນາງ ເຂັມມະນີ ພົນເສນາ ລັດຖະມົນຕີວ່າການກະຊວງອຸດສາຫະກຳ ແລະ ການຄ້າ.
ໃນພິທີ ທ່ານ ເລື່ອມ ຍົງວົງສິດທິ ຫົວໜ້າກົມການຄ້າພາຍໃນຜູ້ເກົ່າ ໄດ້ກ່າວອຳລາໜ້າທີ່ວ່າ: ຕະຫຼອດໄລຍະປະຕິບັດໜ້າທີ່ຂອງຕົນເອງຜ່ານມາ ເຫັນວ່າ ກະຊວງອຸດສາຫະກຳ ແລະ ການຄ້າໄດ້ມີການປ່ຽນແປງ ແລະ ພັດທະນາໃນດ້ານທີ່ຕັ້ງໜ້າຂຶ້ນເລື້ອຍໆ. ສຳລັບກົມການຄ້າພາຍໃນກໍ່ໄດ້ມີການຊີ້ນຳໆພາ ເຮັດຫຼ້ອນຫຼາຍໜ້າທີ່ໃນດ້ານກົງຈັກການຈັດຕັ້ງລັດ, ພະນັກງານ, ວຽກງານສະມາຊິກພັກ ແລະ ອື່ນໆ.
ທ່ານ ຍັງໄດ້ກ່າວຝາກເຖິງຮັກສາການຫົວໜ້າກົມຜູ້ໃໝ່ ແລະ ພະນັກງານວິຊາການຂອງກົມການຄ້າພາຍໃນ ຈົ່ງສືບຕໍ່ປະຕິບັດພາລະໜ້າທີ່ຂອງຕົນ ຄົ້ນຄວ້າວຽກງານການຄ້າພາຍໃນ, ການຄຸ້ມຄອງລາຄາສິນຄ້າ, ການປົກປ້ອງຜູ້ຊົມໃຊ້ ແລະ ອື່ນໆ. ພ້ອມປະສານສົມທົບກັບຂະແໜງການທີ່ກ່ຽວຂ້ອງປະຕິບັດໜ້າທີ່ໃຫ້ເຂັ້ມແຂງຂຶ້ນເລື້ອຍໆ ການອອກໄປແລ້ວກໍ່ບໍ່ໝາຍວ່າຈະຕັດຂາດກັນ ຄວາມສາມັກຄີການຮັກແພງກໍ່ຍັງຄືເກົ່າ, ຕົນເອງກໍ່ພ້ອມທີ່ຈະໃຫ້ຄຳປຶກສາກັບກົມກໍ່ຄືກະຊວງອຸດສາຫະກຳ ແລະ ການຄ້າຕໍ່ໄປ.
ໂອກາດດຽວກັນ ທ່ານ ບຸນທຽນ ແກ້ວສີພາ ຮັກສາການຫົວໜ້າກົມການຄ້າພາຍໃນ ກໍ່ໄດ້ກ່າວຮັບເອົາໜ້າທີ່ໃໝ່ວ່າ: ຕົນເອງກໍ່ຈະສຸມສະຕິປັນຍາ ທຸ່ມເທເຮື່ອແຮງຄວາມສາມາດທີ່ມີ ພ້ອມເສີມຂະຫຍາຍມູນເຊື້ອຂອງຫົວໜ້າກົມຜູ້ເກົ່າທີ່ໄດ້ຊີ້ນຳໆພາວຽກງານໄດ້ດີມາຕະຫຼອດ. ພ້ອມນັ້ນ, ກໍ່ຈະປັບປຸງໜ້າທີ່ວຽກງານໃຫ້ດີຂຶ້ນເລື້ອຍໆ ປະກອບສ່ວນໃນການເຊື້ອມໂຍງເສດຖະກິດກັບພາກພື້ນ ແລະ ສາກົນ.
ໃນຕອນທ້າຍ ທ່ານລັດຖະມົນຕີວ່າການກະຊວງອຸດສາຫະກຳ ແລະ ການຄ້າ ໄດ້ກ່າວສະແດງຄວາມຍ້ອງຍໍຊົມເຊີຍຜົນງານການປະກອບສ່ວນຂອງທ່ານຫົວໜ້າກົມຜູ້ເກົ່າ ພ້ອມດຽວກັນກໍ່ໄດ້ໃຫ້ທິດຊີ້ນຳແກ່ທ່ານຫົວໜ້າກົມຜູ້ໃໝ່ໃນການປະກອບສ່ວນ ເຮັດໃຫ້ວຽກງານການຄ້າພາຍໃນມີຄວາມສະດວກ ເພື່ອປະກອບສ່ວນເຂົ້າໃນວຽກງານເສດຖະກິດຂອງຊາດເຮົາ.
ທ່ານ ລັດຖະມົນຕີ ຍັງໄດ້ເນັ້ນໃຫ້ພະນັກງານກະຊວງອຸດສາຫະກຳ ແລະ ການຄ້າ ຈົ່ງພ້ອມກັນສືບຕໍ່ວຽກງານວິຊາສະເພາະຂອງຕົນໃຫ້ມີຄວາມຮັບຜິດຊອບສູງ, ວຽກງານການສ້າງພະນັກງານສືບທອດ, ການສ້າງບຸກຄະລາກອນທີ່ມີຄວາມຮູ້ຄວາມສາມາດໃຫ້ທ່ວງທັນກັບສະພາບປ່ຽນແປງເສດຖະກິດ ແລະ ການເຊື່ອມໂຍງກັບສາກົນ.
[ຂ່າວ: ໜັງສືພິມເສດພະກິດ-ການຄ້າ, ພາບ: ສູນສະຖິຕິ ແລະ ຂ່າວສານ]
