ໃນລະຫວ່າງ ວັນທີ 08-09 ມັງກອນ 2015 ທີ່ຜ່ານມາ, ກົມສົ່ງເສີມວິສາຫະກິດຂະໜາດນ້ອຍ ແລະ ກາງ, ກະຊວງອຸດສາຫະກຳ ແລະ ການຄ້າ ໃນນາມອົງການຜະລິດຕະພາບແຫ່ງຊາດລາວ ໄດ້ເປີດກອງປະຊຸມເຜີຍແຜ່ ໃນຫົວຂໍ້ ການຄຸ້ມຄອງຕ່ອງໂສ້ການສະໜອງອາຫານ ຂຶ້ນທີ່ໂຮງແຮງລ້ານຊ້າງ, ນະຄອນຫຼວງວຽງຈັນ
ຈຸດປະສົງຂອງການຈັດກອງປະຊຸມແມ່ນ ເພື່ອສົ່ງເສີມ ແລະ ສ້າງຄວາມຮັບຮູ້ ໃນ ສປປ ລາວ ກ່ຽວກັບຄວາມສຳຄັນຂອງທຸລະກິດກະສິກຳ ແລະ ປະສິດທິພາບຂອງການຄຸ້ມຄອງຕ່ອງໂສ້ການສະໜອງອາຫານ ເປັນຕົ້ນແມ່ນ ລະບົບການຄຸ້ມຄອງອາຫານປອດໄພທີ່ທັນສະໄໝ ເຊັ້ນ: ລະບົບວິເຄາະ ແລະ ຄວບຄຸມຈຸດວິກິດ HACCP ແລະ ລະບົບຄຸ້ມຄອງອາຫານປອດໄພຕາມມາດຕະຖານສາກົນ ISO 22000, ຈາກນັ້ນ ໄດ້ມີການແລກປ່ຽນປະສົບການ ແລະ ບົດຮຽນທີ່ໄດ້ຮັບຈາກການຈັດຕັ້ງປະຕິບັດໂຄງການຕົວແບບ HACCP ຂອງບັນດາບໍລິສັດຕົວແບບ ແລະ ຊ່ຽວຊານທີ່ປຶກສາຂອງກົມສົ່ງເສີມວິສາຫະກິດຂະໜາດນ້ອຍ ແລະ ກາງ, ແລະ ສຸດທ້າຍກໍ່ໄດ້ພິຈາລະນາຍຸດທະສາດການຄຸ້ມຄອງຕ່ອງໂສ້ການສະໜອງອາຫານໃນຂະແໜງປຸງແຕ່ງອາຫານໃນລາວ ແລະ ຂະແໜງຍ່ອຍໃນທຸລະກິດກະສິກຳ ໃນອະນາຄົດ. ເຊິ່ງ ບໍລິສັດຕົວແບບດ້ານ HACCP ທີ່ເຂົ້າຮ່ວມໃນໂຄງການນີ້ມີ 3 ໂຮງງານຄື: ໂຮງງານກາເຟເລີທຣີໂອ, ໂຮງງານປາແດກ ແລະ ໂຮງງານລູກຊີ້ນຮ່ອງເຕ້.
ການຈັດຕັ້ງປະຕິບັດໂຄງການດັ່ງກ່າວນີ້ ແມ່ນໄດ້ຮັບການສະໜັບສະໜູນຊ່ວຍເຫຼືອດ້ານທຶນຮອນ ແລະ ວິຊາການ ຈາກກະຊວງກະສິກຳ, ປ່າໄມ້ ແລະ ການປະມົງ ປະເທດຍີ່ປຸ່ນ ແລະ ອົງການຜະລິດຕະພາບແຫ່ງອາຊີ. ພາຍໃຕ້ໂຄງການດັ່ງກ່າວນີ້, ສປປ ລາວ ແມ່ນໄດ້ຈັດຕັ້ງປະຕິບັດຫຼາຍໂຄງການໃນໄລຍະທີ່ຜ່ານມາເຊັ່ນ: ໂຄງການຝຶກອົບຮົມລະດັບຊາດ ກ່ຽວກັບ ວິທະຍາການຫຼັງການເກັບກ່ຽວສຳລັບເຂົ້າ; ໂຄງການສ້າງບໍລິສັດຕົວແບບ ດ້ານ 5ສ ແລະ ຫຼັກການການຜະລິດທີ່ດີ; ໂຄງການຝຶກອົບຮົມຂັ້ນພື້ນຖານ ສຳລັບຄູຝຶກພາຍໃນ ກ່ຽວກັບ ຫຼັການ ການຜະລິດທີ່ດີ ແລະ ຫຼັກການການວິເຄາະ ແລະ ຄວບຄຸມຈຸດວິກິດ; ໂຄງການສ້າງບໍລິສັດຕົວແບບດ້ານ HACCP; ແລະ ການສ້າງປຶ້ມຄູ່ມື ການວິເຄາະ ແລະ ຄວບຄຸມຈຸດວິກິດສຳລັບ ວິສາຫະກິດຂະໜາດນ້ອຍ ແລະ ກາງ ໃນຂະແໜງອຸດສາຫະກຳອາຫານ.
[ສູນສະຖິຕິ ແລະ ຂ່າວສານ]
