ກອງປະຊຸມ ເຜີຍແຜ່ກ່ຽວກັບການພັດທະນາການເຈລະຈາໃນຮອບໂດຮາ (DOHA) ພາຍໃຕ້ຂອບຂອງອົງການໆຄ້າໂລກ ຫຼື WTO, ເຊິ່ງຈັດຂຶ້ນໃນຕອນເຊົ້າວັນທີ 27 ມັງກອນຜ່ານມາ ທີ່ກະຊວງອຸດສາຫະກຳ ແລະ ການຄ້າ (ອຄ) ໂດຍການເປັນປະທານ ຂອງ ທ່ານ ດຣ. ລາວຮົວ ເຈີຈິງ ຮອງຫົວໜ້າກົມນະໂຍບາຍການຄ້າຕ່າງປະເທດ ກະຊວງ ອຄ, ໂດຍມີ ທ່ານ ນາງ ກິ່ງສະດອນ ເພັດດາວເຮືອງ ຫົວໜ້າພະແນກກົມນະໂຍບາຍການຄ້າຕ່າງປະເທດ, ທ່ານ ພົມມາ ອິນທະນາມ ຫົວໜ້າພະແນກກົມການຄ້າພາຍໃນ, ທ່ານ ມີໄຊ ດວງພະຈັກ ຫົວໜ້າພະແນກກົມທະບຽນ ແລະ ຄຸ້ມຄອງວິສາຫະກິດ, ມີບັນດາພະນັກງານພາຍໃນຂອງກະຊວງ ມາຈາກກົມອ້ອມຂ້າງເຂົ້າຮ່ວມ.
ຈຸດປະສົງຂອງກອງປະຊຸມ ເພື່ອເຜີຍແຜ່ໃຫ້ແກ່ພະນັກງານຫຼັກແຫຼ່ງພາຍໃນກົມນະໂຍບາຍການຄ້າຕ່າງປະເທດ ແລະ ກົມກອງອ້ອມຂ້າງກະຊວງ ອຄ ໄດ້ຮູ້ເຂົ້າໃຈກ່ຽວກັບຄວາມເປັນມາ ຂອງກອງປະຊຸມໂດຮາ ໃນແຕ່ລະຮອບການເຈລະຈາ ລວມທັງຮອບໂດຮາສຸດທ້າຍຂອງເດືອນທັນວາ 2013.
ໃນໂອກາດດັ່ງກ່າວ ທ່ານ ດຣ. ລາວເຮີ ເຈີຈິງ ໄດ້ສະເໜີຫຍໍ້ເຖິງປະຫວັດຄວາມເປັນມາຂອງການເຈລະຈາກ່ອນຮອບໂດຮາ ໃນຂອບອົງການໆຄ້າໂລກ ໄດ້ດຳເນີນມາແລ້ວ 8 ຄັ້ງ, ກ່ອນຈະມີການເຈລະຈາຂອງຮອບໂດຮາ. ໃນປັດຈຸບັນ ເຊິ່ງຄັ້ງທຳອິດແມ່ນເຈລະຈາກັນໃນເດືອນເມສາ ປີ 1947, ທີ່ນະຄອນຫຼວງເຈນີວາ ປະເທດສະວິດ, ຮອບທີ 2 ຈັດຂຶ້ນໃນເດືອນເມສາ ປີ 1949 ທີ່ເມືອງອານຊີ ປະເທດຝຣັ່ງ, ຮອບທີ 3 ຈັດຂຶ້ນໃນເດືອນພະຈິກ ປີ 1950 ທີ່ເມືອງ Torquay ປະເທດອົດສະຕຣາລີ, ຮອບທີ 4 ຈັດຂຶ້ນໃນເດືອນມັງກອນ ປີ 1956 ທີ່ນະຄອນຫຼວງເຈນີວາ ປະເທດສະວິດ, ຮອບທີ 5 (Dillon Round) ຈັດຂຶ້ນໃນເດືອນພະຈິກ ປີ 1960, ຮອບທີ 6 (Kennedy Round) ແມ່ນຈັດຂຶ້ນໃນເດືອນພຶດສະພາ ປີ 1964, ຮອບທີ 7 (Tokyo Round) ຈັດຂຶ້ນໃນເດືອນພະຈິກ ປີ 1973 ແລະ ຮອບທີ 8 (Uruguay Round) ຈັດຂຶ້ນໃນເດືອນພະຈິກ ປີ 1986.
ໃນການເຈລະຈາຄັ້ງທີ 8 ເປັນການເຈລະຈາຮອບອູຣູກວາຍ ເຊິ່ງເປັນຮອບການເຈລະຈາທີ່ມີຄວາມຫຍຸ້ງຍາກກວ່າທຸດໆຮອບທີ່ຜ່ານມາ ເຊິ່ງກິນເວລາໃນການເຈລະຈາກັນເຖິງ 7 ປີ, ເພາະວ່າການເຈລະຈາມີຫຼາຍໆປະເດັນໃໝ່ທີ່ປະເທດສະມາຊິກຕ້ອງເຈລະຈາກັນ ເຊັ່ນ: ການຄ້າບໍລິການ, ການຄ້າສິນຄ້າກະສິກຳ, ການຄ້າແຜ່ນແພ, ການປົກປ້ອງຊັລສິນທາງປັນຍາ, ການປັບປຸງລະບຽບດ້ານການຄ້າ ແລະ ການສ້າງຕັ້ງອົງການໆຄ້າໂລກຂຶ້ນ ເພື່ອປ່ຽນສັນຍາທົ່ວໄປ ວ່າດ້ວຍພາສີອາກອນ ແລະ ການຄ້າ.
ການເຈລະຈາຮອບໂດຮາ ໃນກອງປະຊຸມລັດຖະມົນຕີອົງການໆຄ້າໂລກຄັ້ງທີ IV ໃນເດືອນພະຈິກ ປີ 2011 ທີ່ເມືອງໂດຮາ ປະເທດຈາກາຕາ ເຫັນດີກັນໃຫ້ດຳເນີນການຄ້າຫຼາຍຝ່າຍຮອບໃໝ່ ເຊິ່ງເອີ້ນວ່າ ການເຈລະຈາຮອບໂດຮາ.
ກອງປະຊຸມໄດ້ກຳນົດວາລະໃນການເຈລະຈາ ໂດຍໃສ່ຊື່: ວາລະແຫ່ງການພັດທະນາໂດຮາ (Doha Development Agenda: DDA) ການຕື່ມຄຳວ່າ ການພັດທະນາເປັນສ່ວນໜຶ່ງຂອງຊື່ເພື່ອສະແດງໃຫ້ເຫັນວ່າເປົ້າໝາຍຂອງການເຈລະຈາຮອບນີ້ບໍ່ແມ່ນເພື່ອເຮັດໃຫ້ການຄ້າໂລກເສລີຫຼາຍຂຶ້ນຢ່າງດຽວ ແຕ່ເພື່ອໃຫ້ຄວາມສຳຄັນແກ່ການພັດທະນາເສດຖະກິດ ແລະ ສັງຄົມຂອງປະເທດກຳລັງພັດທະນາ ໂດຍສະເພາະແມ່ນບັນດາປະເທດດ້ອຍພັດທະນາ.
ຈຸດຢືນຂອງ ສປປ ລາວ ໃນການເຈລະຈາຮອບໂດຮາ ໃນຖານະເປັນປະເທດດ້ອຍພັດທະນາລາວ ໃຫ້ການສະໜັບສະໜູນສຸດຂີດຕໍ່ການເຈລະຈາການຄ້າຫຼາຍຝ່າຍໃນຂອບຂອງອົງການໆຄ້າໂລກ ເພາະ ມັນເປັນຜົນປະໂຫຍດອັນໃຫຍ່ຫຼວງຕໍ່ການພັດທະນາປະເທດໃນໄລຍະຍາວ ເຊັ່ນ: ເລື່ອງການອຳນວນຄວາມສະດວກທາງດ້ານການຄ້າ, ການໃຫ້ສິດທິພິເສດຕ່າງໆໃຫ້ແກ່ປະເທດດ້ອຍພັດທະນາ ແລະ ກຳລັງພັດທະນາ ໂດຍສະເພາະແມ່ນການເຂົ້າເຖິງຕະຫຼາດທີ່ບໍ່ມີໂຄຕ້າ ແລະ ບໍ່ມີອັດຕາພາສີສຳລັບປະເທດກຳລັງພັດທະນາ.
[ຂ່າວ: ໜັງສືພິມເສດຖະກິດ-ການຄ້າ, ພາບ: ສູນສະຖິຕິ ແລະ ຂ່າວສານ]
