ໃນລະຫວ່າງ ວັນທີ 17-18 ກຸມພາ 2015 ທີ່ຜ່ານມາ, ກົມແຜນການ ແລະ ການຮ່ວມມື ຮ່ວມກັບ ສະຖາບັນຄົ້ນຄ້າເສດຖະກິດການຄ້າ, ກະຊວງ ອຸດສາຫະກຳ ແລະ ການຄ້າ ໄດ້ເປີດກອງປະຊຸມວິຊາການລະດົມຄວາມຄິດເຫັນ ເພື່ອປັບປຸງຮ່າງວິໄສທັດ ຮອດປີ 2030 ຍຸດທະສາດຮອດປີ 2025 ແລະ ແຜນພັດທະນາ 5 ປີ 2016-2020 ຂອງຂະແໜງອຸດສາຫະກຳ ແລະ ການຄ້າ (ພາກກາງ-ພາກໃຕ້) ຂຶ້ນທີ່ ເມືອງປາກຊັນ ແຂວງບໍລິຄຳໄຊ ໂດຍພາຍໃຕ້ການເປັນປະທານ ທ່ານ ດຣ ສຸວັນນີ ໄຊຊະນະ ຮອງເຈົ້າແຂວງ ຜູ້ຮັບຜິດຊອບວຽກງານເສດຖະກິດ ແຂວງບໍລິຄຳໄຊ.
ໃນທີ່ກອງປະຊຸມ ທ່ານ ດຣ ສຸວັນນີ ໄຊຊະນະ ໄດ້ກ່າວຕ້ອນຮັບບັນດາແຂກຈາກທຸກພາກສ່ວນທີ່ເຂົ້າຮ່ວມໃນກອງປະຊຸມຄັ້ງນີ້, ພ້ອມທັງກ່າວວ່າ: ການສ້າງວິໄສທັດຮອດປີ 2030, ຍຸດທະສາດຮອດປີ 2025 ແມ່ນມີຄວາມສຳຄັນທີ່ສຸດ ເພາະໄລຍະນີ້ ກະຊວງ ອຸດສາຫະກຳ ແລະ ການຄ້າ (ອຄ) ກຳລັງກະກຽມກອງປະຊຸມໃຫຍ່ ຄັ້ງທີ IV ຂອງອົງ ຄະນະພັກກະຊວງ ອຄ. ຄຽງຄູ່ກັນນັ້ນ, ແຜນພັດທະນາ 5 ປີ (2016-2020) ຂອງຂະແໜງການ ອຄ ກໍ່ເປັນແຜນສືບຕໍ່ບຸກທະລຸ ແລະ ເປັນການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ III ຂອງອົງຄະນະພັກ ກະຊວງ ອຄ ກໍ່ຄື ກອງປະຊຸມໃຫຍ່ ຄັ້ງທີ IX ຂອງສູນກາງພັກໃຫ້ປະກົດຜົນເປັນຈິງ; ແນ່ໃສ່ປະກອບສ່ວນແກ່ການນຳພາປະເທດຊາດຫຼຸດພົ້ນອອກຈາກສະຖານະພາບປະເທດດ້ອຍພັດທະນາ ໃນປີ 2020 ບົນເສັ້ນທາງຫັນປະເທດເປັນອຸດສາຫະກຳ ແລະ ທັນສະໄໝຕາມທິດສັງຄົນນິຍົມ ໂດຍສ້າງໃຫ້ໄດ້ການຫັນປ່ຽນຮູບແບບການພັດທະນາຕາມທິດເສີມຂະຫຍາຍຄວາມອາດສາມາດບົ່ມຊ້ອນ ແລະ ທ່າແຮງໄດ້ປຽບຂອງປະເທດເຮົາຕິດພັນກັບການເຊື່ອມໂຍງ ກັບ ພາກພື້ນ ແລະ ສາກົນ.
ທ່ານ ດຣ ສຸວັນນີ ໄຊຊະນະ ຍັງໄດ້ປະກອບຄຳຄິດເຫັນ ແລະ ຂໍ້ສະເໜີ ໃສ່ຮ່າງດັ່ງກ່າວວ່າ: (ໜຶ່ງ) ຮ່າງດັ່ງກ່າວຄວນມີການເກາະກ່າຍ ເຊື່ອມໂຍງກັບທຸກຂະແໜງການ ແລະ ແຜນຍຸດທະສາດ ການພັດທະນາ ຂອງປະເທດ, (ສອງ) ຄວນມີການສ້າງສະພາບແວດລ້ອມໃຫ້ແກ່ພາກທຸລະກິດ ເພື່ອອຳນວຍຄວາມສະດວກໄດ້ແກ່ເຂົາເຈົ້າ ເພາະປັດຈຸບັນ ພາກທຸລະກິດເປັນຕົວຂັບເຄື່ອນເສດຖະກິດຂອງປະເທດ ແລະ (ສາມ) ສ້າງຄວາມອາດສາມາດໃນການແຂ່ງຂັນ ກັບບັນດາປະເທດໃນພາກພື້ນ ແລະ ສາກົນ ໂດຍມີການສົ່ງເສີມ ແລະ ພັດທະນາຜະລິດຕະພັນພາຍໃນປະເທດ, ນອກນັ້ນ ທ່ານ ຍັງເນັ້ນຕື່ມໃຫ້ ທຸກບັນດາຂະແໜງການທີ່ກ່ຽວຂ້ອງຂອງລັດ ເພີ່ມທະວີຄວາມເອົາໃຈໃສ່ 2 ໂຄງການໃຫຍ່ຂອງລັດຖະບານ ກໍ່ຄື: ໂຄງການສ້າງທາງລົດໄຟ ແລະ ໂຄງການສົ່ງເສີມຜະລິດຕະພັນເປັນສິນຄ້າ.
ໃນລະຫວ່າງດຳເນີນກອງປະຊຸມ 1 ວັນເຄິ່ງ ຫຼາຍໆພາກສ່ວນ ໄດ້ຮ່ວມກັນຄົ້ນຄ້ວາ ແລະ ປະກອບຄຳຄິດຄຳເຫັນໃສ່ຮ່າງແຜນດັ່ງກ່າວຢ່າງພາສະວິໄສ ແລະ ຖືກຕ້ອງກັບຕົວຈິງ ເພື່ອເປັນພື້ນຖານໃນການກຳນົດທິດທາງການພັດທະນາ ໃນຊຸມປີຕໍ່ໜ້າ ໃຫ້ມີຄວາມຖືກຕ້ອງ, ມີເນື້ອໃນຄົບຖ້ວນ, ເລິກເຊິ່ງ ແລະ ສອດຄ່ອງກັບການພັດທະນາເສດຖະກິດ-ສັງຄົມ ຂອງປະເທດເຮົາ.
ກອງປະຊຸມດັ່ງກ່າວ ມີຜູ້ເຂົ້າຮ່ວມຈາກບັນດາກົມອ້ອມຂ້າງ ກະຊວງ ອຸດສາຫະກຳ ແລະ ການຄ້າ 10 ກົມ, ຈາກພະແນກ ອຸດສາຫະກຳ ແລະ ການຄ້າ ນະຄອນຫຼວງ, ຈາກບັນດາພະແນກ ອຸດສາຫະກຳ ແລະ ການຄ້າ 6 ແຂວງ ພາກກາງ ແລະ ພາກໃຕ້, ຈາກບັນດາກະຊວງອ້ອມຂ້າງ 10 ກະຊວງ ກໍ່ຄື: ກະຊວງ ການເງິນ, ກະຊວງ ສຶກສາທິການ ແລະ ກິລາ, ກະຊວງ ຖະແຫຼງຂ່າວ ວັດທະນາທຳ ແລະ ທ່ອງທ່ຽວ, ກະຊວງ ແຮງງານ ແລະ ສະຫວັດດີການສັງຄົມ, ກະຊວງ ແຜນການ ແລະ ການລົງທຶນ, ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ, ກະຊວງ ພະລັງງານ ແລະ ບໍ່ແຮ່, ກະຊວງ ກະສິກຳ ແລະ ປ່າໄມ້, ກະຊວງ ໂຍທາທິການ ແລະ ຂົນສົ່ງ, ກະຊວງ ວິທະຍາສາດ ແລະ ເຕັກໂນໂລຊີ, ຈາກຫ້ອງວ່າການລັດຖະບານ, ຫ້ອງວ່າການສູນກາງພັກ, ສະພາແຫ່ງຊາດ, ຄະນະພັດທະນາຊົນນະບົດ ແລະ ລຶບລ້າງຄວາມທຸກຍາກແຫ່ງຊາດ, ພ້ອມດ້ວຍບັນດາຫົວໜ້ວຍທຸລະກິດຈຳນວນໜຶ່ງ.
[ຂ່າວ: ສູນສະຖິຕິ ແລະ ຂ່າວສານ]
