ໃນຕອນເຊົ້າວານນີ້, ກະຊວງອຸດສາຫະກຳ ແລະ ການຄ້າ (ອຄ) ໄດ້ຈັດຕັ້ງໂຄສະນາ-ປາຖະກຳຖາລະນຶກວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 60 ປີ (22.03.1955-22.03.2015) ທີ່ກະຊວງ ໂດຍການປາຖະກະຖາຂອງ ທ່ານ ສີປະເສີດ ແສນສະຫວັດ ຮອງຫົວໜ້າຄະນະໂຄສະນາອົບຮົມສູນກາງພັກ, ມີ ທ່ານ ປະເສີດ ໃຈຫວັງໝັ້ນ ຄະນະພັກກະຊວງ, ຫົວໜ້າກົມຈັດຕັ້ງພະນັກງານ ພ້ອມດ້ວຍຄະນະບໍລິຫານພັກກະຊວງ, ຮອງເລຂາໜ່ວຍພັກ, ຫົວໜ້າກົມ, ຮອງຫົວໜ້າກົມ, ຫົວໜ້າສະຖາບັນ, ອຳນວຍການວິສາຫະກິດ ແລະ ພະນັກງານວິຊາການອ້ອມຂ້າງກະຊວງເຂົ້າຮ່ວມຈຳນວນ 250 ທ່ານ.
ໃນພິທີ, ທ່ານຮອງຫົວໜ້າຄະນະໂຄສະນາອົບຮົມສູນກາງພັກໄດ້ຍົກໃຫ້ເຫັນ 3 ບັນຫາໃຫຍ່ ຄື: ຕົ້ນກຳເນີດຂອງພັກປະຊາຊົນປະຕິວັດລາວ, 60 ປີ ແຫ່ງການຊີ້ນຳ-ນຳພາຂອງພັກປະຊາຊົນປະຕິວັດລາວ ແລະ ເສີມຂະຫຍາຍມູນເຊື້ອທາດແທ້ຂອງພັກປະຊາຊົນປະຕິວັດລາວ.
ທ່ານກ່າວວ່າ: ວັນທີ 03 ກຸມພາ 1930, ພັກກອມມູນິດອິນດູຈີນໄດ້ຮັບການສ້າງຕັ້ງຂຶ້ນພາຍໃຕ້ການຊີ້ນຳໂດຍກົງຂອງ ທ່ານ ປະທານ ໂຮ່ຈີມິນ. ປີ 1951 ກອງປະຊຸມໃຫຍ່ ຄັ້ງທີ 2 ຂອງພັກກອມມູນິດອິນໂດຈີນ ໄດ້ມີມະຕິຕົກລົງໃຫ້ແຕ່ລະປະເທດສ້າງຕັ້ງພັກຂອງໃຜມັນຂຶ້ນ. ສະນັ້ນ, ບັນດາສະຫາຍສະມາຊິກພັກກອມມູນິດອິນໂດຈີນທີ່ເປັນຄົນລາວໄດ້ຈັດຕັ້ງ ຄະນະກຳມະການປະຊາຊົນລາວຂຶ້ນ ເພື່ອສືບຕໍ່ນຳພາການປະຕິວັດຢູ່ລາວ ແລະ ໄດ້ກະກຽມຄວາມພ້ອມດ້ານຕ່າງໆຢ່າງລະອຽດເປັນເວລາ 4 ປີ ຈຶ່ງໄດ້ດຳເນີນກອງປະຊຸມໃຫຍ່ຄັ້ງທຳອິດຂອງຕົນຂຶ້ນໃນວັນທີ 22 ມີນາ 1955 ທີ່ບ້ານນາແມວ; ເມືອງວຽງໄຊ; ແຂວງຫົວພັນ ແລະ ໄດ້ຕັ້ງຊື່ວ່າ: “ພັກປະຊາຊົນລາວ” ໂດຍແມ່ນ ທ່ານ ປະທານ ໄກສອນ ພົມວິຫານ ເປັນເລຂາທິການໃຫຍ່ຂອງຄະນະບໍລິຫານງານສູນກາງພັກ.
ທ່ານຍັງກ່າວຕື່ມວ່າ: ໄລຍະ 60 ປີແຫ່ງການຊີ້ນຳນຳພາຂອງພັກປະຊາຊົນປະຕິວັດລາວ ພາຍຫຼັງທີ່ພັກປະຊາຊົນປະຕິວັດລາວໄດ້ຮັບການສ້າງຕັ້ງຂຶ້ນກໍ່ໄດ້ປະເຊີນໜ້າກັບຈັກກະພັດອາເມຣິກາ, ເຊິ່ງເປັນຈັກກະພັດໂຕໃຫຍ່ ແຕ່ພັກເຮົາກໍ່ໄດ້ແບກຫາບເອົາພາລະກຳອັນໜັກໜ່ວງ ເພື່ອຊີ້ນຳໆພາປວງຊົນລາວທັງຊາດຕໍ່ສູ້ຕ້ານການຮຸກຮານຂອງຈັກກະພັດ ແລະ ລູກແລ້ງມືປະຕິການຂາຍຊາດຢ່າງດຸເດືອດຂ້ຽວຂາດ ຈົນກ້າວໄປສູ່ການປົດປ່ອຍປະເທດຊາດຢ່າງສົມບູນ ແລະ ພັດທະນາຢ່າງມີໝາກຜົນເປັນແຕ່ໄລຍະປະຫວັດສາດຄື: ໄລຍະທີ 1 ແມ່ນ 20 ປີ ໄລຍະຕໍ່ສູ້ປົດປ່ອຍຊາດຕ້ານຈັກກະພັດອາເມຣິກາ (1955-1975), ໄລຍະທີ 2 ແມ່ນ 10 ປີ ໄລຍະປົກປັກຮັກສາອຳນາດ ອະທິປະໄຕ ແລະ ຜືນແຜ່ນດິນໄວ້ໄດ້ຢ່າງໝັ້ນຄົງ (1975-1985), ໄລຍະທີ 3 ແມ່ນ 30 ປີ ປົກປັກຮັກສາ ແລະ ພັດທະນາປະເທດຊາດຕາມແນວທາງປ່ຽນແປງໃໝ່ (1985-2015).
[ຂ່າວ: ໜັງສືພິມເສດຖະກິດ-ການຄ້າ]
