ໜ່ວຍພັກຫ້ອງການກະຊວງ ອຸດສາຫະກຳ ແລະ ການຄ້າ (ອຄ) ໄດ້ເປີດກອງປະຊຸມໃຫຍ່ໜ່ວຍພັກຄັ້ງທີ V ຂອງຕົນຂຶ້ນ ເພື່ອເປັນການກວດກາ-ຕີລາຄາ ການຊີ້ນຳໆພາຜັນຂະຫຍາຍມະຕິກອງປະຊຸມໃຫຍ່ຄັ້ງທີ IV ຂອງໜ່ວຍພັກຫ້ອງການກະຊວງ ອຄ ແລະ ສືບຕໍ່ສູ້ຊົນຈັດຕັ້ງປະຕິບັດບັນດາທິດທາງແຜນການໃນໄລຍະ 3 ປີຕໍ່ໜ້າ (2015-2017).
ກອງປະຊຸມໄດ້ຈັດຂຶ້ນມື້ວານນີ້ ທີ່ກະຊວງ ອຄ ໂດຍການເປັນປະທານຂອງ ທ່ານ ນາງ ເຂັມມະນີ ພົນເສນາ ເລຂາຄະນະພັກກະຊວງ, ລັດຖະມົນຕີວ່າການກະຊວງ ອຄ, ທ່ານ ສົມຫວັງ ນິນທະວົງ ເລຂາໜ່ວຍພັກຫ້ອງການກະຊວງ ຫົວໜ້າຫ້ອງການກະຊວງ ອຄ. ເຂົ້າຮ່ວມມີບັນດາເລຂາໜ່ວຍພັກກົມອ້ອມຂ້າງກະຊວງ, ສະມາຊິກພັກຫ້ອງການ ແລະ ຜູ້ແທນກອງປະຊຸມທີ່ມາຈາກລັດວິສາຫະກິດຂຶ້ນກັບກະຊວງ ເຂົ້າຮ່ວມ.
ທ່ານ ສົມຫວັງ ນິນທະວົງ ກ່າວວ່າ: ໃນໄລຍະ 3 ປີຕໍ່ໜ້າໜ່ວຍພັກຫ້ອງການຈະສຸມໃສ່ເພີ່ມທະວີວຽກງານປັບປຸງ ແລະ ກໍ່ສ້າງພັກໃຫ້ມີຄວາມໜັກແໜ້ນທາງດ້ານການເມືອງ-ແນວຄິດ, ເຂັ້ມແຂງ ແລະ ປອດໃສທາງດ້ານການຈັດຕັ້ງ ແລະ ແບບແຜນວິທີເຮັດວຽກ, ມີຄວາມສາມາດນຳພາ ແລະ ເປັນແກນນຳໃນການຈັດຕັ້ງປະຕິບັດໜ້າທີ່ວຽກງານໃຫ້ປະສົບຜົນສຳເລັດ, ປັບປຸງພາລະບົດບາດ, ຍົກລະດັບຄວາມສາມາດໃນການເປັນເສນາທິການທີ່ດີ, ການປະສານງານທີ່ດີ, ການບໍລິຫານ ແລະ ຮັບໃຊ້ທີ່ດີ ເພື່ອຫັນເອົາວຽກງານຄຸ້ມຄອງ ແລະ ບໍລິຫານຫ້ອງການໄປຕາມທິດທັນສະໄໝ ແລະ ຫັນສູ່ມາດຕະຖານເທື່ອລະກ້າວ, ສືບຕໍ່ສ້າງບາດກ້າວບຸກທະລຸໃນວຽກງານການຄຸ້ມຄອງບໍລິຫານຫອງການ, ຕັ້ງໜ້າປະກອບສ່ວນໃນວຽກງານລວມຂອງກະຊວງ ໂດຍສະເພາະຊຸກຍູ້ການຈັດຕັ້ງປະຕິບັດແຜນງານ, ໂຄງການ ກໍ່ຄືແຜນງົບປະມານປະຈຳປີຂອງກະຊວງ, ຂະບວນການວຽກງານ 3 ສ້າງ ແລະ ວຽກງານກະກຽມສະເຫຼີມສະຫຼອງ 2 ວັນປະຫວັດສາດໃນປີ 2015 ແລະ ວຽກງານແຂ່ງຂັນຍ້ອງຍໍ (ຮັກຊາດ-ຮັກພັດທະນາ) ໃຫ້ໄດ້ຮັບໝາກຜົນຕົວຈິງ ແລະ ສ້າງໃຫ້ໄດ້ຕົວແບບທີ່ດີເພື່ອເສີມຂະຫຍາຍຕໍ່ໄປ.
ກອງປະຊຸມໄດ້ເລືອກເອົາຄະນະພັກຊຸດໃໝ່ ເຊິ່ງ ທ່ານ ສົມຫວັງ ນິນທະວົງ ຍັງໄດ້ຮັບຄວາມໃວ້ວາງໃຈໃຫ້ເປັນເລຂາໜ່ວຍພັກຫ້ອງການກະຊວງ ອຄ ອີກຄັ້ງ, ທ່ານ ພຸດທະວັນ ນັນທະວົງ ເປັນຮອງເລຂາໜ່ວຍພັກຫ້ອງການກະຊວງ ແລະ ທ່ານ ບຸນສີ ດວງສະຫວັນ ເປັນກຳມະການປະທານກວດກາໜ່ວຍພັກຊຸດໃໝ່.
ໃນຕອນທ້າຍຂອງກອງປະຊຸມ ທ່ານເລຂາຄະນະພັກກະຊວງ, ລັດຖະມົນຕີວ່າການກະຊວງ ອຄ ໄດ້ກ່າວໂອ້ລົມກອງປະຊຸມ ໂດຍທ່ານໄດ້ສະແດງຄວາມຍ້ອງຍໍຊົມເຊີຍຕໍ່ການຊີ້ນຳໆພາຂອງຄະນະພັກເຮັດຫຼ້ອນໜ້າທີ່ການເມືອງຂອງຕົນ, ຍາດໄດ້ຜົນສຳເລັດຫຼາຍດ້ານ. ພ້ອມດຽວກັນ ທ່ານຍັງໄດ້ເນັ້ນໜັກໃຫ້ຄະນະໜ່ວຍພັກຊຸດໃໝ່ເອົາໃຈໃສ່ໃນການປັບປຸງແບບແຜນການນຳພາ, ແບບແຜນວິທີເຮັດວຽກ, ປັບປຸງກົງຈັກການຈັດຕັ້ງ, ຈັດວາງສັບຊ້ອນພະນັກງານ, ເອົາໃຈໃສ່ສ້າງ ແລະ ຍົກລະດັບຄວາມຮູ້ຄວາມສາມາດຂອງສະມາຊິກພັກ-ພະນັກງານໃຫ້ສາມາດເປັນເສນາທິການ ເປັນຜູ້ປະສານ ແລະ ຜູ້ບໍລິການຮັບໃຊ້ຄະນະພັກ ຄະນະນຳກະຊວງໃຫ້ດີເປັນກ້າວໆ.
[ຂ່າວ: ໜັງສືພິມເສດຖະກິດ-ການຄ້າ]
