ໃນຕອນເຊົ້າຂອງວັນທີ 19 ມີນາ 2015 ທີ່ຜ່ານມາ, ກົມການຄ້າພາຍໃນ ກະຊວງອຸດສາຫະກຳ ແລະ ການຄ້າ ໄດ້ເປີດກອງປະຊຸມ ຖອດຖອນບົດຮຽນການຄຸ້ມຄອງການຜະລິດ ແລະ ຈຳໜ່າຍຊີມັງພາຍໃນປະເທດ ແລະ ວາງແຜນນະໂຍບາຍກຽມຕົວເຊື່ອມໂຍງ AEC ຂຶ້ນທີ່ຫ້ອງປະຊຸມສ່ອງແສງ ກະຊວງອຸດສາຫະກຳ ແລະ ການຄ້າ ພາຍໃຕ້ການເປັນປະທານໂດຍ ທ່ານ ບຸນມີ ມະນີວົງ ລັດຖະມົນຕີຊ່ວຍວ່າ ການກະຊວງອຸດສາຫະກຳ ແລະ ການຄ້າ.
ຈຸດປະສົງຂອງກອງປະຊຸມຄັ້ງນີ້ ແມ່ນເປັນການພົບປະກັນລະຫວ່າງພາກລັດ ກໍ່ຄື ກະຊວງທີ່ກ່ຽວຂ້ອງ ແລະ ພາກເອກະຊົນ ຫົວໜ່ວຍທຸລະກິດຜູ້ຜະລິດຊີມັງ ຢູ່ ສປປ ລາວ ເພື່ອຮັບຟັງການລາຍງານການຈັດຕັ້ງປະຕິບັດຂໍ້ສະດວກ-ຂໍ້ຫຍຸ້ງຍາກທີ່ຜ່ານມາ ແລະ ແຜນການຂອງບັນດາບໍລິສັດຜູ້ຜະລິດຊີມັງ ທັງເປັນການປະກອບຄຳຄິດເຫັນ, ຖອດຖອນບົດຮຽນຂອງບັນດາຂະແໜງການທີ່ກ່ຽວຂ້ອງຂອງພາກລັດໃນການຄຸ້ມຄອງອຸດສາຫະກຳຊີມັງ ແນໃສ່ສ້າງ ແລະ ປັງປຸງບັນດານະໂຍບາຍ, ນິຕິກຳ ໃນການຄຸ້ມຄອງ ແລະ ສົ່ງເສີມ ບັນດາຫົວໜ່ວຍທຸລະກິດທີ່ຕິດພັນກັບອຸດສາຫະກຳຊີມັງ ສາມາດຂະຫຍາຍຕົວ ທັງເຊື່ອມໂຍງກັບ AEC ແລະ ສາກົນໄດ້ ແລະ ຍັງເປັນການປະກອບສ່ວນໃນການສ້າງສາພັດທະນາປະເທດເຮົາໃຫ້ຄຽງຄູ່ກັບປະເທດໃນຂົງເຂດເພື່ອນບ້ານ.
ທີ່ກອງປະຊຸມ ບັນດາພາກເອກະຊົນ ກໍ່ຄືບັນດາຫົວໜ່ວຍທຸລະກິດຜູ້ຜະລິດຊີມັງ ຢູ່ ສປປ ລາວ ໄດ້ຮ່ວມກັນປະກອບຄຳຄິດຄຳເຫັນຢ່າງກົງໄປກົງມາ ເພື່ອໃຫ້ເຂົ້າໃຈເຖິງບັນຫາ ແລະ ສະພາບການໃນປັດຈຸບັນທີ່ບັນດາຫົວໜ່ວຍທຸລະກິດຜູ້ຜະລິດຊີມັງ ຢູ່ ສປປ ລາວ ກຳລັງປະເຊີນໜ້າຢູ່ ເຊັ່ນ: ປະລິມານບໍ່ຖານຫີນພາຍໃນປະເທດບໍ່ພຽງພໍ ເຮັດໃຫ້ຫຼາຍບໍລິສັດຈຳເປັນຕ້ອງໄດ້ນຳເຂົ້າຈາກປະເທດເພື່ອນບ້ານ, ບັນຫາໂລໂກ້ຂອງຜະລິດຕະພັນມີການຊ້ຳກັນ ສົ່ງຜົນສະທ້ອນໃຫ້ຜູ້ຊົມໃຊ້ເກີດຄວາມສັບສົນ, ການອະນຸຍາດໂກຕ້ານຳເຂົ້າຊີມັງຈາກປະເທດເພື່ອນບ້ານ ເຮັດໃຫ້ຫົວໜ່ວຍທຸລະກິດຜູ້ຜະລິດຊີມັງ ມີຄວາມກັງວົນເລື່ອງກຳນົດລາຄາ, ການສະໜອງໄຟຟ້າຂອງບໍລິສັດໄຟຟ້າລາວ ຍັງຕອບສະໜອງບໍ່ທັນພຽງພໍກັບຄວາມຕ້ອງການ ຈຶ່ງເຮັດໃຫ້ຫຼາຍບໍລິສັດຈຳເປັນຕ້ອງໄດ້ນຳເຂົ້າໄຟຟ້າຈາກປະເທດເພື່ອນບ້ານທີ່ມີລາຄາສູງ, ບັນຫາການເກັບພາສີອາກອນ, ບັນຫາການອະນຸຍາດເຂດສຳປະທານບໍ່ຫີນກາວຂອງພາກລັດ, ແລະ ບັນຫາໜີ້ສິນຂອງບໍລິສັດ ເປັນຕົ້ນ; ສ່ວນທາງຫົວໜ້າກຸ່ມຜູ້ຜະລິດຊີມັງລາວ ກໍ່ຍັງໄດ້ສະເໜີໃຫ້ພາກລັດ ເກັບກຳສະຖິຕິການນຳເຂົ້າຊີມັງຈາກຕ່າງປະເທດ, ເກັບກຳສະຖິຕິຄວາມຕ້ອງການຊົມໃຊ້ພາຍໃນ, ແກ້ໄຂບັນຫາໄຟຟ້າ ແລະ ຖ່ານຫີນ ທີ່ບໍ່ພຽງພໍກັບຄວາມຕ້ອງການ, ບັນຫາເສັ້ນທາງທີ່ມີຜົນກະທົບຕໍ່ການຂົນສົ່ງ ແລະ ສົ່ງເສີມໃຫ້ນຳໃຊ້ຜະລິດຕະພັນພາຍໃນ.
ນອກຈາກນັ້ນ ທາງພາກລັດ ກໍຄືບັນດາກະຊວງທີ່ກ່ຽວຂ້ອງ ຍັງໄດ້ສະເໜີໃຫ້ບັນດາພາກເອກະຊົນ ຫົວໜ່ວຍທຸລະກິດຜູ້ຜະລິດຊີມັງ ຢູ່ ສປປ ລາວ ຕ້ອງໄດ້ສູ້ຊົນໃຫ້ໄດ້ມາດຕະຖານຄຸນນະພາບທຽບເທົ່າກັບສາກົນ ກໍ່ຄືມາດຕະຖານ ISO ເພື່ອກຽມຕົວເຊື່ອມໂຍງ AEC ແລະ ສະເໜີໃຫ້ກະຊວງອຸດສາຫະກຳ ແລະ ການຄ້າ ສະໜັບສະໜູນໃຫ້ສ້າງຫ້ອງທົດລອງ ໃວ້ຄົ້ນຄວ້າ ແລະ ເກັບກຳຕົວຢ່າງຜະລິດຕະພັນຊີມັງລາວ ເພື່ອພັດທະນາ ແລະ ປັງປຸງຜະລິດຕະພັນຊີມັງລາວ ໃຫ້ໄດ້ມາດຕະຖານສາກົນ.
ທີ່ກອງປະຊຸມ ທ່ານ ບຸນທຽນ ແກ້ວສີພາ ຮັກສາການຫົວໜ້າກົມການຄ້າພາຍໃນ ກະຊວງອຸດສາຫະກຳ ແລະ ການຄ້າ ຍັງໄດ້ກ່າວສະເໜີທີ່ກອງປະຊຸມວ່າ: ຕໍ່ເບື້ອງກຸ່ມທຸລະກິດຜູ້ຜະລິດຊີມັງ ຕ້ອງປັບປຸງການເຄື່ອນໄຫວຂອງກຸ່ມ ໃຫ້ມີການຈັດປະຊຸມກັນເປັນປະຈຳ ແລ້ວຮ່ວມກັນແກ້ໄຂບັນຫາ ເພື່ອບໍ່ໃຫ້ເກີດມີບັນຫາຊຳເຮື້ອ; ຕໍ່ເບື້ອງລັດ ໃຫ້ບັນດາກົມກອງພາກສ່ວນທີ່ກ່ຽວຂ້ອງ ແຕ່ງຕັ້ງພະນັກງານປະສານງານເປັນຢ່າງດີ ເພື່ອຊີ້ແຈງບັນຫາໃຫ້ເປັນເອກະພາບກັນ ແລ້ວສະເໜີຕໍ່ລັດຖະບານແກ້ໄຂ; ແລະ ຕໍ່ກັບມາດຕະຖານ ກໍ່ຕ້ອງໄດ້ກຳນົດມາດຕະຖານແຫ່ງຊາດ ໃຫ້ທຽບເທົ່າກັບ ASEAN.
ໃນຕອນທ້າຍຂອງກອງປະຊຸມ ທ່ານ ບຸນມີ ມະນີວົງ ລັດຖະມົນຕີຊ່ວຍວ່າ ການກະຊວງອຸດສາຫະກຳ ແລະ ການຄ້າ ຍັງໄດ້ຮຽກຮ້ອງມາຍັງບັນດາຜູ້ເຂົ້າຮ່ວມປະຊຸມໃນຄັ້ງນີ້ ບໍ່ວ່າໃນຂະແໜງອຸດສາຫະກຳ ແລະ ການຄ້າ ກໍ່ຄືຂະແໜງການທີ່ກ່ຽວຂ້ອງ ຈົ່ງໄດ້ຮ່ວມມືກັນໃນການຈັດຕັ້ງປະຕິບັດການຄຸ້ມຄອງຂອງລັດ ແລະ ຊຸກຍູ້ສົ່ງເສີມການຜະລິດພາຍໃນ ໃຫ້ເຂັ້ມແຂງ, ສາມາດເຊື່ອມໂຍງກັບຂົງເຂດ ແລະ ສາກົນ ຕາມລະບຽບກົດໝາຍ. ນອກນັ້ນ, ບັນດາຫົວໜ່ວຍທຸລະກິດຜູ້ຜະລິດຊີມັງ ຕ້ອງເປັນເຈົ້າການ ແລະ ໃຫ້ຄວາມຮ່ວມມືແກ່ພາກລັດ ສະໜອງຂໍ້ມູນທີ່ຈຳເປັນ ແລະ ລາຍງານຢ່າງປົກກະຕິ ກ່ຽວກັບ ການຜະລິດ, ການຈຳໜ່າຍຊີມັງ, ໃນການຄຸ້ມຄອງຕິດຕາມ, ກວດກາການເຄື່ອນໄຫວຂອງບັນດາບໍລິສັດຜູ້ຜະລິດຊີມັງ ພ້ອມທັງຕອບສະໜອງໄດ້ຄວາມຮຽກຮ້ອງຕ້ອງການຂອງຜູ້ຊົມໃຊ້ທາງດ້ານປະລິມານ ແລະ ຄຸນນະພາບ, ກຸ່ມ ຫຼື ສະມາຄົມຜູ້ຜະລິດຊີມັງລາວ ຕ້ອງມີຄວາມສາມັກຄີ ເຂັ້ມແຂງ ນອກນັ້ນ ຕ້ອງປະກອບສ່ວນເສຍພັນທະໃຫ້ລັດ ແລະ ຊຸກຍູ້ຊ່ວຍເຫຼືອສັງຄົມ ຄຽງຄູ່ກັນໄປ.
ກອງປະຊຸມດັ່ງກ່າວ ມີຜູ້ເຂົ້າຮ່ວມຈາກບັນດາກົມທີ່ກ່ຽວຂ້ອງ ກະຊວງອຸດສາຫະກຳ ແລະ ການຄ້າ 2 ກົມ, ຈາກກົມບໍ່ແຮ່ ກະຊວງພະລັງງານ ແລະ ບໍ່ແຮ່, ຈາກສູນຢັ້ງຢືນມາດຕະຖານ ແລະ ກວດກາຄຸນນະພາບແຫ່ງຊາດ ກະຊວງວິທະຍາສາດ ແລະ ເຕັກໂນໂລຊີ, ຈາກກົມຊັບສິນທາງປັນຍາ ກະຊວງວິທະຍາສາດ ແລະ ເຕັກໂນໂລຊີ, ຈາກກົມພາສີ ກະຊວງການເງິນ, ຈາກກົມສ່ວຍສາອາການ ກະຊວງການເງິນ, ຈາກກົມສິ່ງແວດລ້ອມ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ຈາກພະແນກອຸດສາຫະກຳ ແລະ ການຄ້າ ນະຄອນຫຼວງ, ແລະ ຈາກພາກເອກະຊົນ ຫົວໜ່ວຍທຸລະກິດຜູ້ຜະລິດຊີມັງ ຢູ່ ສປປ ລາວ ຈຳນວນ 12 ບໍລິສັດ ພ້ອມດ້ວຍປະທານ ແລະ ຮອງປະທານ ກຸ່ມຜູ້ຜະລິດຊີມັງລາວ ເຂົ້າຮ່ວມ.
[ຂ່າວ: ສູນສະຖິຕິ ແລະ ຂ່າວສານ]
