ກົມນະໂຍບາຍການຄ້າຕ່າງປະເທດ ກະຊວງອຸດສາຫະກຳ ແລະ ການຄ້າ ໄດ້ຈັດກອງປະຊຸມຄະນະກຳມະການປະສານງານລະດັບຊາດ ວ່າດ້ວຍການເຊື່ອມໂຍງເສດຖະກິດກັບສາກົນ (ຄປຊ) ຄັ້ງທີ 12 ຂຶ້ນ ທີ່ກະຊວງອຸດສາຫະກຳ ແລະ ການຄ້າ ໂດຍການເປັນປະທານຂອງ ທ່ານ ດຣ. ທອງລຸນ ສີສຸລິດ ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ທັງເປັນປະທານ ຄປຊ.
ທ່ານ ນາງ ເຂັມມະນີ ພົນເສນາ ລັດຖະມົນຕີວ່າການກະຊວງອຸດສາຫະກຳ ແລະ ການຄ້າ ໄດ້ລາຍງານຕໍ່ກອງປະຊຸມວ່າ: ຜົນງານອັນພົ້ນເດັ່ນຂອງ ສປປ ລາວ ຫຼັງເຂົ້າເປັນສະມາຊິກອົງການການຄ້າໂລກສອງປີຜ່ານມາ ແມ່ນການປັບປຸງດຳລັດນາຍົກລັດຖະມົນຕີວ່າດ້ວຍການຈັດຕັ້ງປະຕິບັດ ແລະ ການເຄື່ອນໄຫວຂອງຄະນະກຳມະການປະສານງານລະດັບຊາດວ່າດ້ວຍການເຊື່ອມໂຍງເສດຖະກິດ ກັບ ສາກົນ ຄປຊ ເພື່ອຮັບປະກັນວຽກງານການເຊື່ອມໂຍງເສດຖະກິດກັບສາກົນໃນໄລຍະໃໝ່ໃຫ້ມີປະສິດທິຜົນຂຶ້ນກວ່າເກົ່າ ໂດຍການປັບປຸງກົນໄກການປະສານງານພາຍໃນໃຫ້ຮັດກຸມ, ສະດວກ ແລະ ວ່ອງໄວ. ການສ້າງໜ່ວຍງານແຈ້ງຂໍ້ມູນ ແລະ ສູນສອບຖາມຂໍ້ມູນສຸຂະນາໄມ ແລະ ສຸຂະນາໄມພືດ ທີ່ກະຊວງກະສິກຳ ແລະ ປ່າໄມ້ ຮ່ວມມື ກັບ ກະຊວງສາທາລະນະສຸກ ແລະ ສູນສອບຖາມຂໍ້ມູນສິ່ງກີດຂວາງທາງດ້ານການຄ້າ ທີ່ກະຊວງວິທະຍາສາດ ແລະ ເຕັກໂນໂລຊີ. ນອກນັ້ນ, ກະຊວງອຸດສາຫະກຳ ແລະ ການຄ້າ ກໍ່ໄດ້ສ້າງເວບໄຊ ເພື່ອອຳນວຍຄວາມສະດວກໃນການສະໜອງຂໍ້ມູນໃຫ້ກັບພາກທຸລະກິດທີ່ກ່ຽວຂ້ອງກັບລະບຽບການນຳຂົ້າ-ສົ່ງອອກສິນຄ້າ.
ຄຽງຄູ່ກັນນັ້ນ ກະຊວງອຸດສາຫະກຳ ແລະ ການຄ້າ ກຳລັງຂຸ້ນຂ້ຽວສ້າງສູນຂໍ້ມູນ-ຂ່າວສານການຄ້າ ດ້ານການບໍລິການຂອງ ສປປ ລາວ ເພື່ອໃຫ້ຜູ້ລົງທຶນ ຫຼື ຜູ້ທີ່ສົນໃຈລົງທຶນ ສາມາດເຂົ້າເຖິງລະບຽບການທີ່ກ່ຽວຂ້ອງກັບຂະແໜງການບໍລິການທີ່ເປີດກວ້າງໃນການລົງທຶນ, ໃນວຽກງານພາສີ ກະຊວງການເງິນ ກໍ່ໄດ້ພັດທະນາລະບົບການແຈ້ງພາສີເພື່ອໃຫ້ກະທັດຮັດ, ງ່າຍດາຍ ແລະ ທັນສະໄໝ ຜ່ານການສ້າງລະບົບການບໍລິການປະຕູດຽວແຫ່ງຊາດ ເພື່ອກ່າວເຂົ້າສູ່ປະຊາຄົມເສດຖະກິດອາຊຽນໃນທ້າຍປີນີ້.
ທ່ານກ່າວຕື່ມວ່າ: ຄຽງຄູ່ກັບຜົນງານທີ່ພົ້ນເດັ່ນນັ້ນກໍ່ຍັງມີຫຼາຍບັນຫາທີ່ເຄັ່ງຮ້ອນທີ່ຍັງຄ້າງຄາ ແລະ ຕ້ອງໄດ້ຈັດຕັ້ງປະຕິບັດໂດຍໄວ ເພື່ອສອດຄ່ອງກັບພັນທະຂອງອົງການການຄ້າໂລກ ແລະ ພັນທະສັນຍາພາຍໃຕ້ຂອບການຮ່ວມມືເສດຖະກິດອາຊຽນ ເວົ້າລວມ ເວົ້າສະເພາະແມ່ນສ້າງສະພາບແວດລ້ອມທີ່ເອື້ອອຳນວຍຄວາມສະດວກໃນການດຳເນີນທູລະກິດ ເຊັ່ນ: ການອອກລະບຽບການທີ່ຕິດພັນກັບການຄ້າ ໂດຍສະເພາະການນຳເຂົ້າ-ສົ່ງອອກຂອງຂະແໜງການຕ້ອງໄດ້ໃຫ້ຄວາມສຳຄັນ ແລະ ເອົາໃຈໃສ່ຕໍ່ກັບພັນທະສັນຍາຂອງອົງການການຄ້າໂລກ ແລະ ພາຍໃຕ້ຂອບສັນຍາອາຊຽນ.
ນອກນີ້, ຍັງໄດ້ກະກຽມການເຈລະຈາໃນຮອບການພັດທະນາໂດຮາ ແລະ ຜົນປະໂຫຍດຂອງລາວໃນຖານະເປັນປະເທດໃນກຸ່ມດ້ອຍພັດທະນາ ພາຍໃຕ້ຂອບວຽກຂອງອົງການການຄ້າໂລກ, ພ້ອມນີ້ກໍ່ໄດ້ຍາດແຍ່ງເອົາຜົນປະໂຫຍດຈາກການເຂົ້າຮ່ວມເປັນປະຊາຄົມເສດຖະກິດອາຊຽນ ຫຼື ເອອີຊີ ແລະ ການຮ່ວມມືລະຫວ່າງອາຊຽນ ກັບ ຄູ່ເຈລະຈາ 6 ປະເທດ ພາຍໃຕ້ຂອບການຮ່ວມມືຮອບດ້ານພາກພື້ນ ເພື່ອສອດຄ່ອງກັບແຜນພັດທະນາເສດຖະກິດ-ສັງຄົມແຫ່ງຊາດ 5 ປີ, 2016-2020 ຂອງ ສປປ ລາວ ເພື່ອກ່າວໄປສູ່ການຫຼຸດພົ້ນອອກຈາກສະຖານະພາບປະເທດດ້ອຍພັດທະນາ.
[ບົດຂ່າວ: ໜັງສືພິມເສດຖະກິດ-ການຄ້າ]
