ນາຍົກລັດຖະມົນຕີ ອອກດຳລັດສະບັບເລກທີ 104/ນຍ, ລົງວັນທີ 22 ເມສາ 2015 ວ່າດ້ວຍການແຕ່ງຕັ້ງ ທ່ານ ພັນທອງ ພິດທຸມມາ ອະດີດຮອງເຈົ້າແຂວງຫຼວງນ້ຳທາ ເປັນລັດຖະມົນຕີຊ່ວຍວ່າການກະຊວງອຸດສາຫະກຳ ແລະ ການຄ້າ (ລມຕ ຊ່ວຍ ກະຊວງ ອຄ).
ພິທີການປະກາດການແຕ່ງຕັ້ງ ລັດຖະມົນຕີຊ່ວຍວ່າການຜູ້ໃໝ່ມີຂຶ້ນໃນວັນທີ 21 ພຶດສະພາ ທີ່ກະຊວງ ອຄ ໂດຍການເປັນປະທານຂອງ ທ່ານ ນາງ ເຂັມມະນີ ພົນເສນາ ລັດຖະມົນຕີວ່າການກະຊວງ ອຄ, ມີ ທ່ານ ລມຕ ຊ່ວຍ, ຫົວໜ້າຫ້ອງການ, ຫົວໜ້າກົມ, ຕ່າງໜ້າຈາກລັດວິສາຫະກິດທີ່ຂຶ້ນກັບ ແລະ ພະນັກງານຂອງກະຊວງເຂົ້າຮ່ວມ.
ທ່ານ ນາງ ເຂັມມະນີ ພົນເສນາ ກ່າວຕໍ່ພິທີວ່າ: ກະຊວງ ອຄ ແມ່ນມີພາລະບົດບາດໜ້າທີ່ໃນການສ້າງ ແລະ ຄຸ້ມຄອງເສດຖະກິດຂອງຊາດໃຫ້ມີຄວາມເຂັ້ມແຂງ, ມື້ນີ້ຄະນະນຳ ແລະ ພະນັກງານຂອງກະຊວງພວກເຮົາມີຄວາມຍິນດີຕ້ອນຮັບທ່ານລັດຖະມົນຕີຊ່ວຍວ່າການຜູ້ໃໝ່ ທີ່ຈະມາເຮັດວຽກຮ່ວມກັບພວກເຮົາ ເຊິ່ງທ່ານໄດ້ມີບົດຮຽນ ແລະ ປະສົບການດ້ານວຽກງານການຄ້າ, ການພົວພັນ, ເສດຖະກິດມາກ່ອນ.
ທ່ານກ່າວອີກວ່າ: ມີຄວາມເຊື່ອໝັ້ນວ່າການມາຮັບໜ້າທີ່ໃໝ່ຂອງ ລມຕ ຊ່ວຍຜູ້ໃໝ່ ຈະເປັນແຮງຍູ້ໃນການເສີມຂະຫຍາຍວຽກງານຂອງພວກເຮົາໃຫ້ມີຄວາມເຂັ້ມແຂງຂຶ້ນກວ່າເກົ່າ ພ້ອມທັງຮຽກຮ້ອງໃຫ້ພະນັກງານທົ່ວກະຊວງ ໄດ້ພ້ອມກັນປະສານງານໃຫ້ແໜ້ນຂຶ້ນຕື່ມ ເພື່ອເຮັດໃຫ້ວຽກງານການຄ້າພາຍໃນ, ການເຊື່ອມໂຍງເສດຖະກິດອາຊຽນ, ກັບອົງການການໆຄ້າໂລກ ແລະ ການເປັນປະທານອາຊຽນຕົ້ນປີໜ້າ ມີຄວາມສຳເລັດຕາມເປົ້າໝາຍທີ່ວາງໄວ້.
ໂອກາດດຽວກັນ ທ່ານ ພັນທອງ ພິດທຸມມາ ກໍ່ໄດ້ກ່າວວ່າ: ຕະຫຼອດໄລຍະຜ່ານມາ ນັບແຕ່ຢູ່ສູນກາງ ແລະ ຖືກສັບຊ້ອນລົງພັດທະນາທ້ອງຖິ່ນ ຕົນເອງໄດ້ມີຄວາມພະຍາຍາມສູງໃນການປະຕິບັດໜ້າທີ່ໆລັດຖະບານມອບໝາຍໃຫ້. ໃນການຮັບໜ້າທີ່ໃໝ່ນີ້ ກໍ່ຈະຕັ້ງໜ້າພະຍາຍາມສຸມທຸກສະຕິປັນຍາຂອງຕົນເພື່ອປະກອບສ່ວນປະຕິບັດໜ້າທີ່ໃໝ່ ຮ່ວມກັບການນຳ ແລະ ພະນັກງານທົ່ວກະຊວງ ໃຫ້ມີຄວາມສຳເລັດຕາມເປົ້າໝາຍ.
[ບົດຂ່າວ: ໜັງສືພິມເສດຖະກິດ-ການຄ້າ]
