ກະຊວງອຸດສາຫະກຳ ແລະ ການຄ້າ ແລະ ຄະນະກຳມາທິການກົດໝາຍ, ຄະນະກຳມາທິການເສດຖະກິດ ແຜນການ ແລະ ການເງິນ, ສະພາແຫ່ງຊາດ ຮ່ວມກັນຈັດກອງປະຊຸມປຶກສາຫາລື ແລະ ປະກອບຄຳເຫັນໃສ່ ຮ່າງກົດໝາຍວ່າດ້ວຍ ການແຂ່ງຂັນທາງທຸລະກິດ ໂດຍພາຍໃຕ້ການເປັນປະທານຮ່ວມ ລະຫວ່າງ ທ່ານ ບຸນມີ ມະນີວົງ ລົດຖະມົນຕີຊ່ວຍວ່າການ ກະຊວງ ອຸດສາຫະກຳ ແລະ ການຄ້າ ແລະ ທ່ານ ສຈ ດາວອນ ຫວ່າງວິຈິດ ປະທານກຳມາທິການ ກົດໝາຍ ສະພາແຫ່ງຊາດ.
ຈຸດປະສົງຂອງກອງປະຊຸມຄັ້ງນີ້ ເພື່ອເປັນການກະກຽມໃຫ້ແກ່ ກອງປະຊຸມກາງສະໄໝ ຂອງສະພາແຫ່ງຊາດ ຊຶ່ງຈະຈັດຂຶ້ນໃນເດືອນ ມີຖຸນາ 2015 ແລະ ຄາດວ່າຈະເອົາເຂົ້າກອງປະຊຸມ ສະໄໝສາມັນສະພາແຫ່ງຊາດ ເທື່ອທີ 9 ຊຸດທີ VII.
ທີ່ປະຊຸມໄດ້ຄົ້ນຄວ້າ ປຶກສາຫາລື ປະກອບຄຳຄິດເຫັນໃສ່ຮ່າງກົດໝາຍວ່າດ້ວຍ ການແຂ່ງຂັນທາງທຸລະກິດຢ່າງກົງໄປກົງມາ ເພື່ອໃຫ້ມີເນື້ອໃນຄວາມໝາຍທີ່ຊັດເຈນ, ຈະແຈ້ງ ແລະ ສາມາດຈັດຕັ້ງປະຕິບັດໄດ້, ທີ່ປະຊຸມຍັງໄດ້ເຫັນດີເປັນເອກະພາບກັນໃນການປັບປຸງ, ຕັດອອກ ແລະ ເພີ່ມຕື່ມ ໝວດ, ມາດຕາ ແລະ ເນື້ອໃນ ທີ່ເຫັນວ່າບໍ່ມີຄວາມເໝາະສົມ ແລະ ສອດຄ່ອງ ຕໍ່ກັບສະພາບການພັດທະນາ ເສດຖະກິດ-ສັງຄົມ ຂອງລາວເຮົາ ທັງສາມາດເຊື່ອມໂຍງເສດຖະກິດພາກພື້ນ ແລະ ສາກົນໄດ້.
ກອງປະຊຸມໃນຄັ້ງນີ້ຈັດຂຶ້ນເມື່ອວັນທີ 09-10 ພຶດສະພາ 2015 ທີ່ແຂວງບໍລິຄຳໄຊ ໂດຍມີຜູ້ເຂົ້າຮ່ວມຈາກຂະແໜງການກ່ຽວຂ້ອງເຊັ່ນ: ຈາກສະພາແຫ່ງຊາດ, ສະມາຊິກສະພາປະຈຳເຂດ 11 ແຂວງບໍລິຄຳໄຊ, ຕ່າງໜ້າຈາກຫ້ອງວ່າການປະທານປະເທດ, ຫ້ອງວ່າການລັດຖະບານ, ກະຊວງຍຸດຕິທຳ, ກະຊວງການເງິນ, ອົງການກວດສອບແຫ່ງລັດ, ພະແນກອຸດສາຫະກຳ ແລະ ການຄ້າ ແຂວງບໍລິຄຳໄຊ, ສະພາການຄ້າ ແລະ ອຸດສາຫະກຳແຫ່ງຊາດ, ພ້ອມດ້ວຍຄະນະຮັບຜິດຊອບສ້າງຮ່າງກົດໝາຍ ແລະ ຜູ້ປະສານງານໂຄງການ GIZ ເຂົ້າຮ່ວມ ທັງໝົດ 50 ກວ່າທ່ານ.
[ສູນສະຖິຕິ ແລະ ຂ່າວສານ]
