ການສົ່ງເສີມວິສາຫະກິດຂະໜາດນ້ອຍ ແລະ ກາງ ກະຊວງອຸດສາຫະກຳ ແລະ ການຄ້າ ໄດ້ເປີດໂຄງການຕົວແບບດ້ານການນຳໃຊ້ພະລັງງານແສງຕາເວັນ ເພື່ອສົ່ງເສີມການນຳໃຊ້ພະລັງງານທົດແທນຂຶ້ນໃນມືວັນນີ້ ທີ່ກະຊວງອຸດສາຫະກຳ ແລະ ການຄ້າ.
ທ່ານ ດຣ. ແກ້ວມໍລະກົດ ສິດລາກອນ ຮອງຫົວໜ້າກົມສົ່ງເສີມວິສາຫະກິດຂະໜາດນ້ອຍ ແລະ ກາງ ກະຊວງອຸດສາຫະກຳ ແລະ ການຄ້າ ກ່າວວ່າ: ການຈັດກອງປະຊຸມນີ້ແມ່ນເພື່ອເປັນການເຜີຍແຜ່ແຜນການຈັດຕັ້ງປະຕິບັດ ແລະ ເປີດໂຄງການຕົວແບບກຽ່ວກັບການນຳໃຊ້ພະລັງງານທົດແທນ ແລະ ສົ່ງເສີມວຽກງານຜະລິດຕະພາບຂຽວ ໂດຍການຮ່ວມມືກັບສະຖາບັນສົ່ງເສີມພະລັງງານທົດແທນກະຊວງພະລັງງານ ແລະ ບໍ່ແຮ່ ແລະ ສະຖາບັນຄົ້ນຄວ້າເຕັກໂນໂລຊີອຸດສາຫະກຳໄຕ້ຫວັນ ( Industrial technology Research Institute – ITRI ) ເຊິ່ງເປັນສູນທີ່ດີເລີດໃນດ້ານຜະລິດຕະພັນຂຽວໃນການທົດລອງໃນການຕິດຕັ້ງລະບົບແສງຕາເວັນຂະໜາດ 10 KW ໃຫ້ແກ່ໂຮງງານອຸດສາຫະກຳ ແລະ ການຄ້າ ເພື່ອເປັນຕົວແບບໃຫ້ແກ່ພາກສ່ວນເອກະຊົນ, ໂຮງງານອຸດສາຫະກຳ ແລະ ວິສາຫະກິດຂະໜາດນ້ອຍ ແລະ ກາງ ທີ່ສົນໃຈໃນການນຳໃຊ້ພະລັງງານທົດແທນໄດ້ສຶກສາ ເພື່ອເພີ່ມປະສິດທິພາບຂອງການນຳໃຊ້ພະລັງງານ.
ທ່ານ ຈັນໂທ ມີລັດຕະນະແພງ ຮອງຫົວໜ້າສະຖາບັນສົ່ງເສີມພະລັງງານທົດແທນ ກະຊວງພະລັງງານ ແລະ ບໍ່ແຮ່ ກ່າວວ່າ: ໃນ ສປປ ລາວ ມີພະລັງງານທາງເລືອກຫຼາຍຊະນິດ ເຊິ່ງຜ່ານມາພັກ ແລະ ລັດຖະບານເຮົາແມ່ນໄດ້ແນໃສ່ໄຟຟ້ານ້ຳຕົກ, ມາຮອດເດືອນ 10 ປີ 2011 ພວກເຮົາໄດ້ຮ່າງນະໂຍບາຍພະລັງງານທົດແທນເພື່ອກຽມສະເໜີໃຫ້ລັດຖະບານຮັບຮອງ, ພວກເຮົາໄດ້ພະຍາຍາມຊອກທາງເລືອກອື່ນທີ່ສາມາດສ້າງກະແສໄຟຟ້າ ເພາະຕາມແຜນຍຸດທະສາດການພັດທະນາເສດຖະກິດ - ສັງຄົມ ຂອງລັດຖະບານ ແມ່ນຈະສ້າງ ສປປ ລາວ ໃຫ້ກາຍເປັນປະເທດໝໍ້ໄຟຂອງອາຊຽນໃນປີ 2025.
ທ່ານ Khanendra D Bhardwaj (K.D) Program officer of APOF ກ່າວວ່າ: ສປປ ລາວ ໄດ້ຮັບການສະໜັບສະໜູນຊ່ວຍເຫຼືອດ້ານທຶນຮອນ ແລະ ວິຊາການ ຈາກອົງການຜະລິດຕະພາບແຫ່ງອາຊີ ໃນການເຄື່ອນໄຫວວຽກງານຜະລິດຕະພາບທັງພາຍໃນ ແລະ ຕ່າງປະເທດ. ສະນັ້ນ, ວຽກງານການເພີ່ມຜະລິດຕະພາບຂັ້ນພື້ນຖານ, ວຽກງານການສົ່ງເສີມຜະລິດຕະພາບສີຂຽວ ກໍ່ເປັນອີກວຽກງານໜຶ່ງທີ່ສຳຄັນ ແລະ ໄດ້ເຄື່ອນໄຫວກິດຈະກຳສົ່ງເສີມຢ່າງຕໍ່ເນືອງ ເປັນຕົ້ນແມ່ນການສ້າງປຶ້ມຄູ່ມືກ່ຽວກັບພະລັງງານຈາກ BioMass ຂອງລາວກ່ຽວກັບການຫຼຸດຜ່ອນສິ່ງເສດເຫຼືອໃນໂຮງງານ, ການຜະລິດທີ່ສະອາດເພື່ອຫຼຸດຕົ້ນທຶນການຜະລິດ ແລະ ການນຳໃຊ້ພະລັງງານຢ່າງມີປະສິດທິພາບ ແລະ ການນຳໃຊ້ພະລັງງານທົດແທນໃນປີ 2014 ເພື່ອສ້າງຈິດສຳນຶກກ່ຽວກັບຜະລິດຕະພັນຂຽວ ແລະ ພະລັງງານທົດແທນ.
[ບົດຂ່າວ: ໜັງສືພິມເສດຖະກິດ-ການຄ້າ]
