ໃນຕອນເຊົ້າຂອງວັນທີ 15 ມີຖຸນາ 2015 ຜ່ານມານີ້ຢູ່ທີ່ຫ້ອງປະຊຸມຊັ້ນ 3 ຂອງຫ້ອງວ່າການປົກຄອງແຂວງອຸດົມໄຊໄດ້ມີກອງປະຊຸມປຶກສາຫາລືເພື່ອກະກຽມ ແລະ ເຂົ້າຮ່ວມງານວາງສະແດງ ຈີນ-ອາຊຽນ ຄັ້ງທີ 12 ທີ່ນະຄອນໝານໜິ່ງ ສປ ຈີນ ໂດຍການເປັນປະທານຂອງ ທ່ານ ຄຳຫຼ້າ ລີ້ງນະສອນ ກຳມະການສູນກາງພັກ ເລຂາພັກແຂວງເຈົ້າແຂວງໆອຸດົມໄຊ, ເຂົ້າຮ່ວມໃນຄັ້ງນີ້ມີ ທ່ານ ສົມຈິດ ອິນທະມິດ ລັດຖະມົນຕີ ຊ່ວຍວ່າການກະຊວງອຸດສາຫະກຳ ແລະ ການຄ້າ ແລະ ມີບັນດາທ່ານຄະນະປະຈຳພັກແຂວງ, ກຳມະການພັກແຂວງ, ຄະນະຮັບຜິດຊອບກອງເລຂາ CAEXPO ຂັ້ນສູນກາງ ແລະ ຄະນະຮັບຜິດຊອບງານຂັ້ນແຂວງ ແລະ ກອງເລຂາກະກຽມ ເຂົ້າຮ່ວມທັງໝົດຈຳນວນ 24 ທ່ານ, ຍິງ 3 ທ່ານ. ຈຸດປະສົງຂອງກອງປະຊຸມໃນຄັ້ງນີ້ມີຄື:
- ຮັບຮອງເອົາແບບຮ້ານວາງສະແດງແຫ່ງຊາດໃນຂັ້ນແຂວງ.
- ຮັບຮອງເອົາບັນດາຮູບພາບພ້ອມທັງເນື້ອໃນ ທີ່ປະກອບເຂົ້າໃນຮ້ານວາງສະແດງແຫ່ງຊາດ ( ຖ້າຮູບໃດບໍ່ໄດ້ຂະໜາດມາດຕະຖານແມ່ນຕ້ອງໄດ້ຖ່າຍທຳຄືນໃໝ່)
- ຮັບຟັງລາຍງານຄວາມຄືບໜ້າໃນການກະກຽມສ້າງສາລະຄະດີເມືອງແຫ່ງສະເໜ່ ເພື່ອນຳສະເໜີບັນດາທ່າແຮງຕ່າງທີ່ບົມຊ້ອນພາຍໃນແຂວງ.
- ກະກຽມສ້າງແຜ່ນພັບໂຄສະນາເມືອງແຫ່ງສະເໜ່.
ຈາກນັ້ນບັນດາກຸ່ມບໍລິສັດອອກແບບບຸກຣາດ ກໍ່ໄດ້ຂື້ນນຳສະເໜີສາຍວິດີໂອ ແລະ ສາລະຄະດີຂອງແຂວງອຸດົມໄຊໃຫ້ຜູ້ເຂົ້າຮ່ວມໄດ້ຮັບຊົມ ພ້ອມທັງປະກອບຄຳເຫັນຕໍ່ຮູບພາບ ແລະ ເນື້ອໃນຄຳເວົ້າເພື່ອໃຫ້ມັນສອດຄ່ອງເພື່ອກຽມຄວາມພ້ອມເຂົ້າຮ່ວມງານດັ່ງກ່າວ
ໃນຕອນທ້າຍປະທານກອງປະຊຸມກໍ່ໄດ້ມີຄຳເຫັນຕໍ່ກອງປະຊຸມເຊີ່ງທ່ານໄດ້ກ່າວສະແດງຄວາມຊົມເຊີຍຕໍ່ກັບຜົນງານທີ່ບັນດາທ່ານໄດ້ຍົກມາເຊີ່ງໄດ້ສະແດງໃຫ້ເຫັນເຖິງການພັດທະນາພັດທະນາທາງດ້ານເສດຖະກິດ – ສັງຄົມຢູ່ພາຍໃນແຂວງອຸດົມໄຊ.
ກອງປະຊຸມໄດ້ດຳເນີນໄປເປັນເວລາ 1 ຕອນກໍ່ປິດລົງດ້ວຍຜົນສຳເລັດ.
ໂດຍ: ຄຳຝັ້ນ ພາວິວົງກອນ
