ໃນຕອນເຊົ້າຂອງວັນທີ 20 ມີຖຸນາ 2015 ຜ່ານມານີ້ ຢູ່ທີ່ຫ້ອງປະຊຸມພະແນກອຸດສາຫະກຳ ແລະ ການຄ້າແຂວງອຸດົມໄຊ ໄດ້ມີກອງປະຊຸມພົບປະປຶກສາຫາລືກ່ຽວກັບຜະລິດຕະພັນ ແລະ ສີມືແຮງງານກັບຕ່າງປະເທດ ລະຫວ່າງຄະນະຜູ້ແທນຈັງຫວັດພະເຍົາ ກັບຄະນະຜູ້ແທນຂອງແຂວງອຸດົມໄຊ. ຫົວໜ້າຄະນະຜູ້ແທນຝ່າຍລາວໂດຍແມ່ນ ທ່ານ ບຸນທັນ ວັນນະໄຈ ກໍາມະການປະຈຳພັກແຂວງ ຫົວພະແນກອຸດສາຫະກຳ ແລະ ການຄ້າແຂວງ ຝ່າຍໄທນຳໂດຍ ທ່ານ ນ. ພອນພິມົນ ອິນທິຍົດ ຜູ້ອຳນວຍການສູນພັດທະນາຝີມືແຮງງານຈັງຫວັດພະເຍົາພ້ອມດ້ວຍຄະນະ ແລະ ມີຜູ້ຕາງໜ້າຈາກພາກສ່ວນກ່ຽວຂ້ອງທັງສອງຝ່າຍ ເຂົ້າຮ່ວມທັງໝົດຈຳນວນ 23 ທ່ານ, ຍິງ 7 ທ່ານ. ກອງປະຊຸມໄດ້ທົບທວນຄືນກ່ຽວກັບສະພາບການພົວພັນຮ່ວມມືດ້ານການຄ້າ, ດ້ານການສົ່ງເສີມຜະລິດຕະພັນ ແລະ ສີມືແຮງງານ. ໂດຍສະເພາະການພັດທະນາສີມືແຮງງານຂອງບຸກຄະລະກອນ ແລະ ຜູ້ປະກອບການຂອງສອງແຂວງເພື່ອພັດທະນາບຸກຄະລາກອນ ແລະ ຜູ້ປະກອບການຮ່ວມກັນລາຍລະອຽດແມ່ນຈະໄດ້ເຂົ້າພົບປະແລະ ເຮັດວຽກກັບສູນພັດທະນາສີມືແຮງງານຂອງແຂວງອຸດົມໄຊ ເພື່ອດຳເນີນໂຄງການຮ່ວມກັນໃນຂັ້ນຕໍ່ໄປ.
ໂດຍ: ຄຳຝັ້ນ ພາວິວົງກອນ
