ກະຊວງອຸດສາຫະກຳ ແລະ ການຄ້າ (ອຄ) ຈັດກອງປະຊຸມເຜີຍແຜ່ກົດໝາຍວ່າດ້ວຍການແຂ່ງຂັນທາງທຸລະກິດ ເພື່ອສ້າງສະພາບແວດລ້ອມການຄ້າຂາຍ ເພື່ອສ້າງຄວາມເອກະພາບໃນການເຮັດທຸລະກິດ, ປົກປ້ອງຜູ້ຊົມໃຊ້ ແລະ ສ້າງທ່າແຮງທາງການຄ້າໃນເວທີອາຊຽນ.
ທ່ານ ສົມຈິດ ອິນທະມິດ ລັດຖະມົນຕີຊ່ວຍວ່າການກະຊວງອຸດສາຫະກຳ ແລະ ການຄ້າ ໄດ້ກ່າວວ່າ: ກົດໝາຍວ່າດ້ວຍການແຂ່ງຂັນທາງທຸລະກິດມີຄວາມສຳຄັນຫຼາຍໃນການສ້າງ ສປປ ລາວ ໃຫ້ມີຄວາມສາມາດແຂ່ງຂັນສູງໃນລະດັບພາກພື້ນ ແລະ ສາກົນ ແລະ ເຮັດໃຫ້ລະບົບກົດໝາຍຂອງ ສປປ ລາວ ເຊື່ອມໂຍງກັບສາກົນ.
ກົດໝາຍດັ່ງກ່າວຈະເນັ້ນໃຫ້ລະບົບເສດຖະກິດຂະຫຍາຍຕົວ ແລະ ເຮັດໃຫ້ຜູ້ຊົມໃຊ້ໄດ້ຮັບຜົນປະໂຫຍດສູງສຸດຈາກສະພາບການແຂ່ງຂັນ, ການແຂ່ງຂັນບໍ່ພຽງແຕ່ຈະເປັນການສົ່ງເສີມ ແລະ ຊຸກຍູ້ ໃຫ້ບັນດາຫົວໜ່ວຍທຸລະກິດ ໃຫ້ມີການຄົ້ນຄວ້າເທົ່ານັ້ນ ແຕ່ຍັງເປັນການເຮັດໃຫ້ຫົວໜ່ວຍທຸລະກິດພັດທະນາສິນຄ້າ ແລະ ການບໍລິການຂອງຕົນໃຫ້ມີຄວາມຫຼາກຫຼາຍ, ຄຸນນະພາບດີ, ລາຄາຖືກ ແລະ ເປັນທຳ.
ກົດໝາຍວ່າດ້ວຍການແຂ່ງຂັນທາງທຸລະກິດ ມີທັງໝົດ 9 ພາກ, 8 ໝວດ ແລະ 95 ມາດຕາ ເນື້ອໃນສຳຄັນຂອງກົດໝາຍໄດ້ບັນຈຸໃນມາດຕາ 9 ພຶດຕິກຳທີ່ເປັນການແຂ່ງຂັນທາງທຸລະກິດທີ່ບໍ່ເປັນທຳ ມີ: 1.ການເຮັດໃຫ້ເຂົ້າໃຈຜິດ, 2.ການລະເມີດຄວາມລັບທາງທຸລະກິດ, 3.ການບັງຄັບໃນການດຳເນີນທຸລະກິດ, 4.ການເຮັດໃຫ້ຜູ້ດຳເນີນທຸລະກິດເສື່ອມເສຍຊື່ສຽງ, 5.ການສ້າງອຸປະສັກຂັດຂວາງຕໍ່ການດຳເນີນທຸລະກິດ, 6.ການໂຄສະນາທີ່ບໍ່ຖືກຕ້ອງຕາມຄວາມເປັນຈິງ, 7.ການສົ່ງເສີມການຂາຍດ້ວຍວິທີທີ່ບໍ່ເປັນທຳ, 8.ການຈຳແນກປະຕິບັດໂດຍສະມາຄົມທຸລະກິດ ແລະ 9.ພຶດຕິກຳອື່ນໆ ຕາມທີ່ໄດ້ກຳນົດໄວ້ໃນກົດໝາຍ ແລະ ລະບຽບການທີ່ກ່ຽວຂ້ອງ.
ທ່ານ ບຸນທຽນ ແກ້ວສີພາ ຫົວໜ້າກົມການຄ້າພາຍໃນ ກະຊວງອຸດສາຫະກຳ ແລະ ການຄ້າ ໄດ້ກ່າວວ່າ: ກົດໝາຍສະບັບນີ້ ຈະເຮັດໃຫ້ວຽກງານການຄ້າ ແລະ ການປົກປ້ອງຜູ້ຊົມໃຊ້ໄດ້ຮັບການຈັດຕັ້ງປະຕິບັດດີຂຶ້ນ ທັງສອດຄ່ອງກັບສາກົນ ແລະ ພາກພື້ນ ແລະ ເປັນການສົ່ງເສີມຜູ້ຜະລິດພາຍໃນ, ຊາວຄ້າຂາຍຂະໜາດນ້ອຍ ແລະ ຄວາມເປັນທຳຂອງຜູ້ບໍລິໂພກ.
ຕອນທ້າຍກອງປະຊຸມຍັງມີພິທີເຊັນສັນຍາໂຄງການຍະໂຍບາຍການແຂ່ງຂັນ ແລະ ກົດໝາຍໄລຍະ 2 ລະຫວ່າງ ກົມການຄ້າພາຍໃນ ກະຊວງ ອຄ ແລະ ໂຄງການຊ່ວຍເຫຼືອຂອງ ຈີໄອແຊັດ.
ກອງປະຊຸມດັ່ງກ່າວຈັດຂຶ້ນທ້າຍອາທິດຜ່ານມາ ທີ່ໂຮງແຮມແລນມາກ ແມ່ຂອງ ນະຄອນຫຼວງວຽງຈັນ ໂດຍການເປັນປະທ່ານຂອງ ທ່ານ ສົມຈິດ ອິນທະມິດ ລັດຖະມົນຕີຊ່ວຍວ່າການກະຊວງ ອຄ, ທ່ານ Michael Grau ເອກອັກຄະລັກຖະທູດເຢຍລະມັນ ປະຈຳລາວ ມີການນຳຂອງກະຊວງ ອຄ, ຕ່າງໜ້າຈາກພາກລັດ ແລະ ອົງການກ່ຽວຂ້ອງເຂົ້າຮ່ວມ.
[ບົດຂ່າວ: ໜັງສືພິມເສດຖະກິດ-ການຄ້າ]
