ກອງປະຊຸມວຽກງານກວດກາຂອງກະຊວງອຸດສາຫະກຳ ແລະ ການຄ້າ (ອຄ) ປະຈຳປີ 2015 ໄດ້ຍົກໃຫ້ເຫັນຫຼາຍດ້ານທີ່ປະສົບຜົນສຳເລັດ ແລະ ຫຼາຍດ້ານທີ່ຍັງເປັນສິ່ງທ້າທາຍ ໂດຍສະເພາະການສົ່ງເສີມການຜະລິດເປັນສິນຄ້າຂອງປະຊາຊົນຍັງບໍ່ທັນຫຼາກຫຼາຍ, ຂໍ້ມູນການເຊື່ອມໂຍງຍັງບໍ່ທັນໄດ້ເຜີຍແຜ່ຢ່າງກວ້າງຂວາງ.
ທ່ານ ນາງ ເຂັມມະນີ ພົນເສນາ ລັດຖະມົນຕີວ່າການກະຊວງ ອຄ ໄດ້ກ່າວໃນກອງປະຊຸມວ່າ: ຜ່ານການຈັດຕັ້ງປະຕິບັດໜ້າທີ່ຂອງກົມກວດກາ ກໍ່ໄດ້ຮັບການຈັດຕັ້ງປະຕິບັດເປັນປົກກະຕິ ແລະ ສາມາດສະກັດກັ້ນ ແລະ ແກ້ໄຂໄດ້ສິ່ງຫຍໍ້ທໍ້, ຂໍ້ຂາດຕົກບົກຜ່ອງ ເພື່ອປະກອບສ່ວນອັນສຳຄັນໃນການເພີ່ມທະວີບົດບາດການນຳພາຂອງພັກ, ຍົກສູງຄວາມສັກສິດໃນການຄຸ້ມຄອງລັດ ຄຸ້ມຄອງສັງຄົມໃຫ້ເຂົ້າສູ່ລະບຽບທີ່ດີຂຶ້ນເທື່ອລະກ້າວ.
ທ່ານລັດຖະມົນຕີ ກ່າວຕື່ມອີກວ່າ: ຄຽງຄູ່ກັບຜົນສຳເລັດທີ່ຍາດມາໄດ້ນັ້ນ ເມື່ອທຽບກັບຄາດໝາຍສູ້ຊົນທີ່ກອງປະຊຸມໃຫຍ່ຄັ້ງທີ IX ຂອງພັກ ແລະ ກອງປະຊຸມວຽກງານກວດກາຄັ້ງທີ II ວາງອອກ ໂດຍທຽບໃສ່ແຜນການວຽກງານກວດກາຂອງກະຊວງ ອຄ ປີ 2015 ເຫັນວ່າ ຕ້ອງໄດ້ສູ້ຊົນປັບປຸງບາງດ້ານ ເປັນຕົ້ນການຈັດຕັ້ງເຊື່ອມຊຶມ ແລະ ຜັນຂະຫຍາຍມະຕິຄຳສັ່ງຂອງພັກ, ຂໍ້ກຳນົດກົດໝາຍ ແລະ ລະບຽບການຕ່າງໆ ມີບາງກົມກອງໜ່ວຍພັກຍັງຊັກຊ້າ ແລະ ບໍ່ທົ່ວເຖິງເລິກເຊິ່ງ, ດຳເນີນຊີວິດການເມືອງປົວແປງພາຍໃນພັກ ແລະ ປັບປຸງກໍ່ສ້າງພັກ ການເຄົາລົບ ແລະ ປະຕິບັດລະບຽບພັກ, ເຖິງວ່າຄະນະກວດກາແຕ່ລະຂັ້ນມີຄວາມພະຍາຍາມໃນການເຄື່ອໄຫວ ແຕ່ການເຄື່ອນໄຫວມີລັກສະນະລໍຖ້າ ແຕ່ຄຳສັ່ງຫຼາຍກວ່າ ບໍ່ຫັນເປັນເຈົ້າການເຄື່ອນໄຫວ ແລະ ອື່ນໆ.
ຂະນະທີ່ ທ່ານ ພັນ ວິໄລສົມ ຫົວໜ້າ ກົມກວດກາການຄ້າ, ກະຊວງ ອຄ ໄດ້ກ່າວໃນກອງປະຊຸມວຽກງານກວດກາການຄ້າປະຈຳປີ 2015 ວ່າ: ຜ່ານການຕິດຕາມ, ກວດກາໃນໜຶ່ງປີຜ່ານມາເຫັນວ່າບັນດາອົງການລັດແຕ່ລະຂັ້ນຂອງຂະແໜງ ອຄ ໄດ້ເອົາໃຈໃສ່ປະຕິບັດແຜນພັດທະນາເສດຖະກິດ – ສັງຄົມ ແລະ ແຜນງົບປະມານແຫ່ງລັດສົກປີ 2014 – 2015. ບັນດາຄາດໝາຍ, ບັນດາແຜນການ, ແຜນງານ ໂຄງການທີ່ວາງອອກສ່ວນຫຼາຍໄດ້ຮັບການຈັດຕັ້ງປະຕິບັດສຳເລັດ, ການຄຸ້ມຄອງມະຫາພາກ ໄດ້ຮັບການປັບປຸງຕາມພາລະບົດບາດຂອງບັນດາກົມກອງ.
ທ່ານກ່າວວ່າ: ຄຽງຄູ່ກັບດ້ານດີ ຍັງມີບາງບັນຫາທີ່ຍັງຄົງຄ້າງ ຕ້ອງໄດ້ເອົາໃຈໃສ່ ຄື: ການສົ່ງເສີມການຜະລິດເປັນສິນຄ້າຍັງບໍ່ທັນຫຼາຍ, ສິນຄ້າທີ່ມີຄຸນນະພາບ ແລະ ປະລິມານເພື່ອຮອງຮັບຕະຫຼາດພາຍໃນ ແລະ ຕ່າງປະເທດ, ການສົ່ງເສີມວິສາຫະກິດຂະໜາດນ້ອຍ ແລະ ກາງ, ການເຈລະຈາການຄ້າສອງຝ່າຍ – ຫຼາຍຝ່າຍ ການກຽມຄວາມພ້ອມເພື່ອເຂົ້າປະຊາຄົມເສດຖະກິດອາຊຽນ ວຽກນີ້ຍັງບໍ່ທັນໄດ້ຮັບການເຜີຍແຜ່ເຊື່ອມຊຶມໃຫ້ຜູ້ປະກອບການ ແລະ ປະຊາຊົນໄດ້ຮັບຮູ້ເຂົ້າໃຈຢ່າງກວ້າງຂວາງ ທົ່ວເຖິງ ແລະ ເລິກເຊິ່ງ.
ກອງປະຊຸມວຽກງານກວດກາ ຂອງກະຊວງອຸດສາຫະກຳ ແລະ ການຄ້າ (ອຄ) ປະຈຳປີ 2015 ໄດ້ຈັດຂຶ້ນເມື່ອອາທິດຜ່ານມາ ທີ່ກະຊວງ ອຄ ພາຍໃຕ້ການເປັນປະທານຂອງ ທ່ານ ນາງ ເຂັມມະນີ ພົນເສນາ ກຳມະການສູນກາງພັກ, ລັດຖະມົນຕີວ່າການກະຊວງ ອຄ, ມີທ່ານຮອງລັດຖະມົນຕີ, ຫົວໜ້າກົມກອງອ້ອມຂ້າງ, ລັດວິສາຫະກິດທີ່ຂຶ້ນກັບ ລວມທັງພະນັກງານຂອງກົມເຂົ້າຮ່ວມ.
[ບົດຂ່າວຈາກ: ໜັງສືພິມເສດຖະກິດ-ການຄ້າ]
[ສະບັບວັນທີ: 04 ກຸມພາ 2016]
