ທ່ານ ນາງ ເຂັມມະນີ ພົນເສນາ ລັດຖະມົນຕີວ່າກະຊວງອຸດສະຫະກຳ ແລະ ການຄ້າ ຂອງ ສປປ ລາວ ແລະ ຜູ້ແທນການຄ້າ ສະຫະລັດອາເມລິກາ ທ່ານ ໄມໂຄ ໂຟຼແມນ ໄດ້ເຊັນສັນຍາການຄ້າ ແລະ ການລົງທຶນສອງຝ່າຍ ເຊິ່ງທັງສອງທ່ານໄດ້ເປັນປະທານຮ່ວມປະຊຸມລັດຖະມົນຕີເສດຖະກິດ ອາຊຽນ – ອາເມລິກາ ຢູ່ຊານຟຣານຊິດໂກ ລັດແຄຣິຟໍເນຍ ສະຫະລັດອາເມລິກາ ໃນອາທິດທີ່ຜ່ານມາ.
ສັນຍາການຄ້າ ແລະ ການລົງທຶນ ເປັນເວທີໃຫ້ສະຫະລັດອາເມລິກາ ແລະ ສປປ ລາວ ສາມາດປຶກສາຫາລືກ່ຽວກັບບັນຫາການຄ້າ ແລະ ການລົງທຶນ ເພື່ອເສີມຂະຫຍາຍສາຍສຳພັນເສດຖະກິດສອງຝ່າຍ ໂດຍຜ່ານການອຳນວຍຄວາມສະດວກທາງດ້ານການຄ້າ, ສິ່ງກີດຂວາງທີ່ບໍ່ແມ່ນພາສີ, ຊັບສິນທາງປັນຍາ, ການປົກປ້ອງສິ່ງແວດລ້ອມ ແລະ ການສ້າງຄວາມສາມາດ. ສັນຍາສະບັບນີ້ຍັງເປັນເວທີເພື່ອປະສານງານກ່ຽວກັບບັນຫາຫຼາຍຝ່າຍ ແລະ ພາກພື້ນເຊັ່ນ: ການເຊື່ອມໂຍງ AEC.
ທ່ານ ໂຟຼແມນ ກ່າວວ່າ: ການເຊັນສັນຍາຄັ້ງນີ້ ເພື່ອເສີມຂະຫຍາຍສາຍພົວພັນການຄ້າ ແລະ ການລົງທຶນ ສະຫະລັດອາເມລິກາ – ສປປ ລາວ, ສັນຍາສະບັບນີ້ສະທ້ອນເຖິງຄວາມຕັ້ັ້ງໃຈຂອງ ປະທານນາທິບໍດີ ໂອບາມາ ທີ່ມີຕໍ່ອາຊຽນ ແລະ ການເພີ່ມໂອກາດທາງດ້ານເສດຖະກິດລະຫວ່າງພວກເຮົາ.
ພິທີເຊັນສັນຍາຄັ້ງນີ້, ສະແດງໃຫ້ເຫັນການເພີ່ມທະວີການຮ່ວມມືລະຫວ່າງ ສປປ ລາວ ແລະ ສະຫະລັດອາເມລິກາ ແລະ ຈັດຂຶ້ນພາຍຫຼັງກອງປະຊຸມສຸດຍອດອາຊຽນ – ອາເມລິກາ ສະໄໝພິເສດທີ່ ຊັນນີແລນ ລັດແຄຣິຟໍເນຍ ເຊິ່ງເປັນປະທານຮ່ວມ ຂອງ ທ່ານ ຈູມມາລີ ໄຊຍະສອນ ປະທານປະເທດ ສປປ ລາວ ກັບ ທ່ານ ບາຣັກ ໂອບາມາ ປະທານນາທິບໍດີສະຫະລັດອາເມລິກາ.
[ບົດຂ່າວ: ສູນສະຖິຕິ ແລະ ຂ່າວສານ]
