ໃນຕອນເຊົ້າ ຂອງວັນທີ 10 ມີນາ 2016 ທີ່ຜ່ານ, ຢູ່ທີ່ຫ້ອງປະຊຸມຊັ້ນ 3 ຂອງຫ້ອງວ່າການປົກຄອງແຂວງອຸດົມໄຊ ໄດ້ມີພິທີເຊັນບົດບັນທຶກມອບ-ຮັບ ໜ້າທີ່ຕຳແໜ່ງຫົວໜ້າພະແນກອຸດສາຫະກຳ ແລະ ການຄ້າ ລະຫວ່າງຜູ້ເກົ່າ ແລະ ມອບໃຫ້ຜູ້ໃໝ່ຂື້ນ ໂດຍໃຫ້ກຽດເຂົ້າຮ່ວມເປັນປະທານ ຂອງ ທ່ານ ເພັດສາຄອນ ຫຼວງອາໄພ ເລຂາພັກແຂວງ ເຈົ້າແຂວງອຸດົມໄຊ, ເຂົ້າຮ່ວມເປັນສັກຂີພິຍານໃນຄັ້ງນີ້ມີແຂກເຊີນຈາກຂະແໜງການທີ່ກ່ຽວຂ້ອງຂອງແຂວງ ແລະ ພະນັກງານພາຍໃນພະແນກ ອຄ ພ້ອມດ້ວຍພະນັກງານພາຍໃນຫ້ອງການ ອຄ 7 ເມືອງ ເຂົ້າຮ່ວມທັງໝົດ 62 ສະຫາຍ, ຍິງ 9 ສະຫາຍ, ເຊີ່ງຫົວໜ້າພະແນກ ອຄ ຜູ້ເກົ່າແມ່ນ ທ່ານ ບຸນທັນ ວັນນະໃຈ ອາດີດກຳມະການປະຈຳພັກແຂວງ, ຫົວໜ້າພະແນກ ອຄ ຜູ້ເກົ່າ ແລະ ໄດ້ມອບໜ້າທີ່ຫົວໜ້າພະແນກ ອຄ ໃຫ້ແກ່ ທ່ານ ຄຳເພົ້າ ສີລິສຸກ ກຳມະການພັກແຂວງ ຫົວໜ້າຫ້ອງວ່າການປົກຄອງແຂວງ ມາເປັນຫົວໜ້າພະແນກ ອຄ ຜູ້ໃໝ່.
ພ້ອມກັນນັ້ນ ທ່ານ ນາງ ຄຳມີ ສຸກສະຫວັດ ຄະນະປະຈຳພັກແຂວງ, ປະທານກວດກາພັກ-ລັດແຂວງອຸດົມໄຊ ກໍ່ໄດ້ຂຶ້ນຜ່ານມະຕິຕົກລົງຂອງຄະນະເລຂາທິການສູນກາງພັກ, ວ່າດ້ວຍການອະນຸມັດໃຫ້ພະນັກງານການນຳພັກຜ່ອນຮັບເບ້ຍບຳນານ ແລະ ຜ່ານມະຕິຕົກລົງຂອງຄະນະປະຈຳພັກແຂວງວ່າດ້ວຍການຊັບຊ້ອນພະນັກງານນຳພາ-ຄຸ້ມຄອງຂັ້ນແຂວງໄປຮັບໜ້າທີ່ຕຳແໜ່ງໃໝ່.
ໃນຕອນທ້າຍ ທ່ານ ເພັດສາຄອນ ຫຼວງອາໄພ ເຈົ້າແຂວງໆອຸດົມໄຊ ແລະ ຫົວໜ້າພະແນກ ອຄ ຜູ້ເກົ່າ – ຜູ້ໃໝ່ກໍ່ໄດ້ມີຄໍາເຫັນກ່າວຄໍາຂອບໃຈ ແລະ ຮັບຄໍາໂອວາດຈາກທ່ານເຈົ້າແຂວງ.
ພາບ ແລະ ຂ່າວໂດຍ: ຄຳຝັ້ນ ພາວິວົງກອນ
