ກອງປະຊຸມຄະນະຜູ້ຊ່ຽວຊານວຽກງານແຂ່ງຂັນທາງທຸລະກິດອາຊຽນ ຄັ້ງທີ17 ແລະ ກອງປະຊຸມກ່ຽວຂ້ອງ ໃນວັນທີ 22-24 ມີນາ 2016 ທີ່ ນະຄອນຫລວງວຽງຈັນ
ໃນວັນທີ 22-24ມີນາ 2016ຜ່ານມານີ້, ຢູ່ທີ່ໂຮງແຮມ ວຽງຈັນພຣາຊາ,ນະຄອນຫລວງວຽງຈັນ, ກົມການຄ້າພາຍໃນ ກະຊວງອຸດສາຫະກຳ ແລະ ການຄ້າ ໄດ້ຈັດກອງປະຊຸມຄະນະຜູ່ຊ່ຽວຊານວຽກງານແຂ່ງຂັນທາງທຸລະກິດອາຊຽນຄັ້ງທີ17 ແລະ ກອງປະຊຸມທີ່ກ່ຽວຂ້ອງຂຶ້ນຢ່າງເປັນທາງການ ໂດຍການເປັນປະທານ ຂອງທ່ານ ຂວັນໃຈ ອ່ຽມສຸທິ ຮອງຫົວໜ້າກົມການຄ້າພາຍໃນ ແລະ ທັງເປັນປະທານຄະນະຜູ່ຊ່ຽວຊານວຽກງານແຂ່ງຂັນທາງທຸລະກິດອາຊຽນໃນປີ 2016 ນອກນີ້ຍັງມີບັນດາຊ່ຽວຊານວຽກງານແຂ່ງຂັນທາງທຸລະກິດຈາກ 10 ປະເທດອາຊຽນ, ຄະນະກອງເລຂາອາຊຽນ ເຂົ້າຮ່ວມໃນກອງປະຊຸມຄັ້ງນີ້ ຊຶ່ງລວມທັງໝົດ 30 ກວ່າ ທ່ານ.
ຄະນະຜູ່ຊ່ຽວຊານວຽກງານແຂ່ງຂັນທາງທຸລະກິດອາຊຽນ (AEGC) ຖືກສ້າງຕັ້ງຂຶ້ນເພື່ອສົ່ງເສີມວຽກງານການແຂ່ງຂັນການຄ້າທີ່ເປັນທໍາ ພ້ອມທັງເປັນເວທີການສົນທະນາ ວຽກງານນະໂຍບາຍການແຂ່ງຂັນທາງທຸລະກິດຂອງປະເທດສະມາຊິກອາຊຽນຊຶ່ງປະກອບດ້ວຍຜູ່ຕາງໜ້າຈາກອົງການຄວບຄຸມການແຂ່ງຂັນທາງທຸລະກິດ ແລະ ໜ່ວຍງານທີ່ຮັບຜິດຊອບດ້ານນະໂຍບາຍການແຂ່ງຂັນທາງທຸລະກິດຂອງປະເທດສະມາຊິກອາຊຽນ ແນ່ໃສ່ເພື່ອບັນລຸເປົ້າໝາຍບັນດາຍຸດທະສາດຕ່າງໆທີ່ໄດ້ກຳນົດໄວ້ໃນແຜນແມ່ບົດຂອງການສ້າງປະຊາຄົມເສດຖະກິດອາຊຽນໃນປີ 2015 ເປັນຕົ້ນແມ່ນ ການປະກາດໃຊ້ກົດໝາຍວ່າດ້ວຍການແຂ່ງຂັນທຸລະກິດຂອງບັນດາປະເທດອາຊຽນພາຍໃນປີ 2015, ການສ້າງສາຍສໍາພັນຂອງໜ່ວຍງານທີ່ຮັບຜິດຊອບວຽກງານນະໂຍບາຍການແຂ່ງຂັນທາງທຸລະກິດ ເພື່ອເປັນເວທີໃນການປືກສາຫາລື ຫຼື ຕິດຕໍ່ພົວພັນກັນ, ການສົ່ງເສີມການສ້າງຄວາມອາດສາມາດຂອງບັນດາປະເທດອາຊຽນໃນການພັດທະນານະໂຍບາຍການແຂ່ງຂັນທາງທຸລະກິດຂອງອາຊຽນ ແລະ ການພັດທະນາຄູ່ມືນະໂຍບາຍການແຂ່ງຂັນທາງທຸລະກິດ ໂດຍອີງໃສ່ປະສົບການຂອງບັນດາປະເທດສະມາຊິກອາຊຽນ ແລະ ສາກົນ.
ສປປ ລາວ ແລະ ຟີລິບປິນ ໄດ້ສຳເລັດ ແລະ ປະກາດໃຊ້ ກົດໝາຍວ່າດ້ວຍການແຂ່ງຂັນທາງທຸລະກິດຢ່າງເປັນທາງການ ໃນທ້າຍປີ 2015 ທີ່ຜ່ານມາ ຈຶ່ງເຮັດໃຫ້ປະຈຸບັນນີ້ ປະເທດສະມາຊິກອາຊຽນ ມີກົດໝາຍດັ່ງກ່າວລວມທັງໝົດ 9 ປະເທດ (ຍົກເວັ້ນ ປະເທດກຳປູເຈຍ). ໝາຍຄວາມວ່າ ບັນດາປະເທດສະມາຊິກອາຊຽນ ແມ່ນມີຄວາມພ້ອມໃນການຮັບມືດ້ານການແຂ່ງຂັນ ໃນຍຸກປະສາຄົມເສດຖະກິດອາຊຽນ ແລະ ການເຊື່ອມໂຍງກັບເສດຖະກິດພາກພື້ນ.
ປະທານກອງປະຊຸມ ໄດ້ສະແດງຄວາມຂອບໃຈ ຕໍ່ ກໍາປູເຈຍ ທີ່ເຮັດໜ້າທີ່ເປັນປະທານຂອງຄະນະຊ່ຽວຊານດັ່ງກ່າວໃນປີຜ່ານມາ, ຊຶ່ງປີນີ້ ສປປ ລາວ ຈະໄດ້ເຮັດໜ້າທີ່ເປັນປະທານຂອງຄະນະຊ່ຽວຊານດັ່ງກ່າວນີ້ ສືບຕໍ່ຈາກກຳປູເຈຍ. ປະທານຍັງໄດ້ກ່າວຕື່ມວ່າ ໃນຊ່ວງໄລຍະການເປັນປະທານຄະນະ AEGC ຂອງ ສປປ ລາວນີ້ ຈະໄດ້ເນັ້ນໃສ່ບັນຫາຫຼັກໆ ເຊັ່ນ:(1) ແຜນການຈັດຕັ້ງປະຕິບັດວຽກງານການແຂ່ງຂັນທາງທຸລະກິດອາຊຽນ ປີ 2016-2025ແລະ ແຜນການຈັດຕັ້ງປະຕິບັດວຽກງານດັ່ງກ່າວໃນໄລຍະ 5 ປີ; (2) ການສ້າງຄວາມອາດສາມາດແກ່ສະຖາບັນຂອງບັນດາປະເທດອາຊຽນ ເພື່ອຈັດຕັ້ງປະຕິບັດກົດໝາຍວ່າດ້ວຍການແຂ່ງຂັນທາງທຸລະກິດ; (3) ຍົກສູງຄວາມຮັບຮູ້ກ່ຽວກັບນະໂຍບາຍ ແລະ ກົດໝາຍວ່າດ້ວຍການແຂ່ງຂັນທາງທຸລະກິດໃນພາກພື້ນ ແລະ (4) ສົ່ງເສີມການຮ່ວມມື ເພື່ອເຮັດໃຫ້ວຽກງານນະໂຍບາຍ ແລະ ກົດໝາຍແຂ່ງຂັນທາງທຸລະກິດເປັນອັນໜຶ່ງອັນດຽວກັນໃນພາກພື້ນ.
ທີ່ປະຊຸມຍັງໄດ້ທົບທວນຄືນຜົນຂອງກອງປະຊຸມຂອງລັດຖະມົນຕີເສດຖະກິດອາຊຽນ ຄັ້ງທີ 22 (The 22th ASEAN Economic Ministers RetreatMeeting) ຊຶ່ງຄະນະລັດຖະມົນຕີເສດຖະກິດອາຊຽນໄດ້ມອບໝາຍໃຫ້ບັນດາຂະແໜງການທີ່ກ່ຽວຂ້ອງກອດສອບແຜນງານຕ່າງໆໃຫ້ສອດຄ່ອງກັບເປົ້າໝາຍຂອງນະໂຍບາຍ, ມີຍຸດທະສາດ ແລະ ລວມເອົາມາດຕະການຕ່າງໆຂອງອາຊຽນ. ດັ່ງນັ້ນ, ໃນທີ່ປະຊຸມຈຶ່ງໄດ້ປືກສາຫາລືການປັບປຸງ ແລະ ການດັດແກ້ແຜນຈັດຕັ້ງປະຕິບັດວຽກງານແຂ່ງຂັນທາງທຸລະກິດອາຊຽນ 2016-2025 ເພື່ອໃຫ້ສອດຄ່ອງກັບທິດຊີ້ນໍາ ຂອງບັນດາລັດຖະມົນຕີເສດຖະກິດອາຊຽນ.
ວຽກງານການແຂ່ງຂັນທາງທຸລະກິດອາຊຽນ ໄດ້ຮັບຄວາມສົນໃຈຈາກຫຼາຍໂຄງການຊ່ວຍເຫຼືອສາກົນ, ໜຶ່ງໃນນັ້ນແມ່ນອົງການ GIZ. ດັ່ງນັ້ນ, ນອກຈາກກອງປະຊຸມຂອງຄະນະຊ່ຽວຊານແຂ່ງຂັນທາງທຸລະກິດອາຊຽນແລ້ວ ໃນຕອນບ່າຍຂອງ ວັນທີ 24 ມີນາ 2016 ກໍ່ໄດ້ຈັດກອງປະຊຸມຄະນະກຳມະການທົບທວນການຈັດຕັ້ງປະຕິບັດໂຄງການນະໂຍບາຍ ແລະ ກົດໝາຍວ່າດ້ວຍການແຂ່ງຂັນທາງທຸລະກິດໃນອາຊຽນ(PSC) ຊຶ່ງເປັນໂຄງການທີ່ໄດ້ຮັບການສະໜັບສະໜູນໂດຍອົງການ GIZ ທາງດ້ານວິຊາການ ແລະ ດ້ານການເງິນ. ໃນກອງປະຊຸມດັ່ງກ່າວໄດ້ລາຍງານຜົນການຈັດຕັ້ງປະຕິບັດໂຄງທີ່ຜ່ານມາ ແລະ ທິດທາງໃນການຈັດຕັ້ງປະຕິບັດໂຄງການໃນຕໍ່ໜ້າກ່ຽວກັບວຽກງານການແຂ່ງຂັນທາງທຸລະກິດ.
