ໃນຕອນບ່າຍຂອງວັນທີ 26 ພຶດສະພາ 2016 ທີ່ຜ່ານມາ, ກົມສົ່ງເສີມ ແລະ ພັດທະນາສິນຄ້າ ກະຊວງອຸດສາຫະກຳ ແລະ ການຄ້າ (ອຄ) ໄດ້ຖະແຫຼງຂ່າວກຽມຈັດງານວາງສະແດງເຄື່ອງເຮືອນລາວ ຄັ້ງທີ 1 ປະຈຳປີ 2016 (1th Lao Home & Living Fair 2016) ທີ່ຈະຈັດຂຶ້ນໃນວັນທີ່ 18 -24 / 07 / 2016 ທີ່ ສູນການຄ້າລາວ-ໄອເຕັກ (ຕຶກເກົ່າ) ນະຄອນຫຼວງວຽງຈັນ ໂດຍການເປັນປະທານຮ່ວມຂອງ ທ່ານ ສົມຫວັງ ນິນທະວົງ ຫົວໜ້າກົມສົ່ງເສີມ ແລະ ພັດທະນາສິນຄ້າ ກະຊວງ ອຄ, ທ່ານ ຄຳໄພ ສົມຊະນະ ປະທານສະມາຄົມເຟີນີເຈີລາວ, ທ່ານ ກອງມາລາ ພົມມາໄລ ຮອງປະທານສະມາຄົມເຟີນີເຈີລາວ, ບັນດາທ່ານຫົວໜ້າກົມ, ຕົວແທນຫົວໜ່ວຍວິສາຫະກິດ ແລະ ສື່ມວນຊົນ ພ້ອມດ້ວຍພາກສ່ວນທີ່ກ່ຽວຂອງເຂົ້າຮ່ວມ.
ຈຸດປະສົງຂອງການຈັດງານໃນຄັ້ງນີ້ກໍເພື່ອເຜີຍແຜ່ໃຫ້ສັງຄົມຮັບຮູ້ ແລະ ເຂົ້າໃຈ ກ່ຽວກັບຜະລິດຕະພັນເຄື່ອງເຮືອນລາວຫຼາຍຂຶ້ນ ສົ່ງເສີມຜູ້ຜະລິດສາມາດເຂົ້າຫາຕະຫຼາດ ແລະ ຈຳໜ່າຍສິນຄ້າໄດ້ທັງພາຍໃນ ແລະ ຕ່າງປະເທດ ແລະ ກ້າວເຂົ້າສູ່ການສ້າງຕາໜ່າງການວາງສະແດງ – ຂາຍສິນຄ້າ ກັບພາກພື້ນ ແລະ ສາກົນໃນອະນາຄົດ ເພື່ອຮັບຮອງຕະຫຼາດ AEC.
ທ່ານ ສົມຫວັງ ນິນທະວົງ ໄດ້ກ່າວວ່າ: ພັກ – ລັດຖະບານເຮົາ ຍາມໃດກໍ່ໃຫ້ຄວາມສຳຄັນ ແລະ ເອົາໃຈໃສ່ຢ່າງເປັນເຈົ້າການໃນວຽກງານເຊື່ອມໂຍງເສດຖະກິດກັບພາພື້ນ ແລະ ສາກົນ, ຖືວ່າເປັນໜຶ່ງໃນວຽກງານບູລິມະສິດໃນການສຸກຍູ້ ສົ່ງເສີມ ແລະ ພັດທະນາ ເສດຖະກິດ – ສັງຄົມ ຂອງປະເທດຊາດ.
ໃນທ່າມກາງທົ່ວພັກ – ລັດ ແລະ ປວງຊົນລາວທັງຊາດ ພວມເຊື່ອມຊຶມມະຕິກອງປະຊຸມໃຫຍ່ຂອງພັກສະໄໝທີ X ແລະ ປະຕິບັດຕາມຄຳສັ່ງວ່າດ້ວຍການເພີ່ມທະວີຄວາມເຂັ້ມງວດໃນການຄຸ້ມຄອງ ແລະ ກວດກາການຂຸດຄົ້ນໄມ້, ເຄື່ອນຍ້າຍໄມ້ ແລະ ທຸລະກິດໄມ້ຂອງ ນາຍົກລັດຖະມົນຕີ ແຫ່ງ ສປປ ລາວ ສະບັບເລກທີ 15/ນຍ, ລົງວັນທີ 13 ພຶດສະພາ 2016 ເພື່ອໃຫ້ສອດຄ່ອງກັບແນວທາງດັ່ງກ່າວ ຈຶ່ງເຫັນໄດ້ຄວາມສຳຄັນໃນການອະນຸລັກຮັກສາປ່າໄມ້, ການນຳໃຊ້ໄມ້ໃຫ້ເກີດຜົນປະໂຫຍດສູງສຸດ ແລະ ມີໄມ້ໄວ້ໃຊ້ຢ່າງຢືນຍົງໂດຍໃຫ້ມີການປຸງແຕ່ງໃຫ້ເປັນຜະລິດຕະພັນສຳເລັດຮູບຈາກໄມ້, ຫວາຍ ແລະ ໄມ້ປ່ອງ ໃຫ້ມີຫຼາກຫຼາຍຜະລິດຕະພັນ ຕາມທີ່ສັງຄົມປະຈຸບັນຕ້ອງການ ແລະ ເປັນທີ່ນິຍົມກັນຢູ່ ດ້ວຍການນຳໃຊ້ເຕັກໂນໂລຊີທີ່ທັນສະໄໝ ແລະ ທັງເປັນການສ້າງມູນຄ່າເພີ່ມໃຫ້ຜະລິດຕະພັນເຟີນີເຈີໄມ້ລາວ ໃຫ້ກາຍເປັນສິນຄ້າທີມີຄຸນນະພາບ ແລະ ລາຄາສູງຕົງຕາມຄວາມຕ້ອງການຂອງລູກຄ້າ ແລະ ຕະຫຼາດ ເຮັດໃຫ້ສາມາດສົ່ງອອກຕ່າງປະເທດໄດ້, ຍັງເປັນການສົ່ງເສີມດ້ານສີໄມ້ລາຍມືຂອງຄົນລາວ ແລະ ສ້າງວຽກເຮັດງານທຳໃຫ້ກັບປະຊາຊົນບັນດາເຜົ່າ, ຕ້ານໄພຫວ່າງງານ, ຊ່ວຍໃຫ້ຫຼຸດພົ້ນຈາກຄວາມທຸກຍາກໃນອະນາຄົດ.
ໃນຕອນທ້າຍຂອງງານ ທ່ານ ກອງມາລາ ພົມມາໄລ ຮອງປະທານ ສະມາຄົມເຟີນີເຈີລາວ ໄດ້ກ່າວວ່າ: ການຈັດງານວາງສະແດງເຄື່ອງເຮືອນລາວ ຄັ້ງທີ 1 ປະຈໍາປີ 2016 ຈະໄດ້ຈັດຂຶ້ນ ໃນລະຫວ່າງວັນທີ 18 – 24 / 07 / 2016 ທີ່ສູນການຄ້າລາວ – ໄອເຕັກ, ຈຸດປະສົງຂອງການຈັດງານ ແມ່ນເພື່ອຈັດຕັ້ງປະຕິບັດ ແລະ ຜັນຂະຫຍາຍຕາມເນື້ອໃນຈິດໃຈຂອງຂັ້ນເທິງວາງອອກໃຫ້ປະກົດຜົນເປັນຈິງ ພ້ອມທັງເປັນການສ້າງຂະບວນການຕ້ອນຮັບການເຂົ້າເປັນປະຊາຄົມເສດຖະກິດອາຊຽນ AEC.
ປະເພດສິນຄ້າທີ່ນໍາມາເຂົ້າວາງສະແດງມີ: ຜະລິດຕະພັນເຄື່ອງເຟີນີເຈີທີ່ຜະລິດດ້ວຍໄມ້, ຫວາຍ, ໄມ້ປ່ອງ ແລະ ຈາກວັດສະດຸເສດເຫຼືອຕ່າງໆ ທີ່ເຮັດເປັນເຄື່ອງເຟີນີເຈີ, ຜະລິດຕະພັນຫັດຖະກໍາ ແລະ ເຄື່ອງແກະສະຫຼັກຕ່າງໆ, ຜະລິດຕະພັນໄມ້ພ້ອມດ້ວຍເຄື່ອງຈັກສານຕ່າງໆ ຊຶ່ງຫ້ອງວາງສະແດງສິນຄ້າ - ຂາຍ ທັງໝົດມີປະມານ 300 ຫ້ອງ, ໃນນັ້ນປະກອບມີຫົວໜ່ວຍທຸລະກິດມາຈາກຕ່າງແຂວງ ປະມານ 50 ຫ້ອງ ແລະ ປະເທດອ້ອມຂ້າງ 40 ຫ້ອງ ເຂົ້າຮ່ວມ, ກິດຈະກໍາພາຍໃນງານ ມີການວາງສະແດງ, ຂາຍສິນຄ້າ ແລະ ມີການສາທິດການຜະລິດເຄື່ອງເຟີນີເຈີໄມ້, ແກະສະຫຼັກໄມ້, ມີການຈົກສະຫຼາກຊິງລາງວັນ ແລະ ການສະແດງສິນລະປະ.
ຂ່າວໂດຍ: ຕິ່ງຄຳ ຈັນທະພອນ (ກົມແຜນການ ແລະ ການຮ່ວມມື, ກະຊວງ ອຄ)
