ກະຊວງອຸດສາຫະກຳ ແລະ ການຄ້າລາວ ແລະ ຫວຽດນາມ ພ້ອມດ້ວຍພາກທຸລະກິດຂອງສອງປະເທດ ໄດ້ເປີດກອງປະຊຸມຫາລືວຽກງານການຄ້າຮ່ວມກັນ ເພື່ອກະຕຸ້ນການຄ້າການລົງທຶນ ແລະ ສ້າງເງື່ອນໄຂໃຫ້ທຸລະກິດສອງຊາດໄດ້ພົບປະ ກ້າວສູ່ການເຮັດການຄ້າຮ່ວມກັນໃຫ້ຫຼາຍຂຶ້ນ.
ກອງປະຊຸມດັ່ງກ່າວຈັດຂຶ້ນໃນທ້າຍອາທິດຜ່ານມາ ທີ່ສູນການຄ້າລາວ – ໄອເຕັກ ໂດຍການເປັນປະທານຂອງ ທ່ານ ສຽວສະຫວາດ ສະແຫວງສຶກສາ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ແຫ່ງ ສປປ ລາວ, ທ່ານ ຫງວຽນ ເກີມ ຕູ ຮອງລັດຖະມົນຕີກະຊວງການຄ້າ ແຫ່ງ ສສ ຫວຽດນາມ.
ທ່ານ ສຽວສະຫວາດ ສະແຫວງສຶກສາ ໄດ້ກ່າວວ່າ: ເພື່ອຜັນຂະຫຍາຍການຈັດຕັ້ງປະຕິບັດສັນຍາຮ່ວມມືທະວິພາຄີໄລຍະ 2016 -2020 ແລະ ຂໍ້ຕົກລົງວ່າດ້ວຍແຜນການຮ່ວມມື ປະຈຳປີ 2016 ແລະ ບົດບັນທຶກກອງປະຊຸມຄັ້ງທີ 23 ຂອງຄະນະກຳມາທິການຮ່ວມມືພາຄີ ລະຫວ່າງ ລັດຖະບານ ລາວ – ຫວຽດນາມ ແລະ ແຜນວຽກຂອງກະຊວງອຸດສາຫະກຳ ແລະ ການຄ້າ ສອງຝ່າຍ, ສູ້ຊົນເພື່ອຍົກມູນຄ່າການຄ້າ ຂາອອກ – ຂາເຂົ້າ ລະຫວ່າງສອງປະເທດເພີ່ມຂຶ້ນ 20% ຖ້າທຽບໃສ່ປີ 2015. ດັ່ງນັ້ນ, ສອງຝ່າຍຕ້ອງໄດ້ສົມທົບກັນກັບຂະແໜງການ ເພື່ອລົງເຜີຍແຜ່ສັນຍາທີ່ກ່າວມາຂ້າງເທິງຢ່າງກວ້າງຂວາງ ເພື່ອສ້າງຄວາມຮັບຮູ້ໃຫ້ຂະແໜງການກ່ຽວຂ້ອງທັງສູນກາງ ແລະ ທ້ອງຖິ່ນໄດ້ເຂົ້າໃຈ ແລະ ນຳໄປຈັດຕັ້ງປະຕິບັດໃຫ້ປາກົດຜົນເປັນຈິງ ແລະ ຈຸດປະສົງຫຼັກຂອງການສ້າງສັນຍາດັ່ງກ່າວແມ່ນເພື່ອເພີ່ມທະວີ ແລະ ຍົກສູງມິດຕະພາບ ແລະ ການຮ່ວມມືຮອບດ້ານ ແລະ ສົ່ງເສີມການເຂົ້າເຖິງຕະຫຼາດດ້ານສິນຄ້າ, ດ້ານການບໍລິການ ແລະ ພັດທະນາການເຊື່ອມຈອດລະຫວ່າງສອງປະເທດ ໃຫ້ມີຄວາມໝັ້ນຄົງຍືນຍົງ ແລະ ຍາວນານ.
ທ່ານກ່າວອີກວ່າ: ກອງປະຊຸມພົບປະລະຫວ່າງທຸລະກິດ ລາວ – ຫວຽດນາມໃນຄັ້ງນີ້ຈະບັນລຸຜົນສຳເລັດອັນຈົບງາມ, ປະກອບສ່ວນເຂົ້າໃນການສືບຕໍ່ເພີ່ມທະວີການຮ່ວມມື ດ້ານເສດຖະກິດ – ການຄ້າລະຫວ່າງສອງປະເທດລາວ – ຫວຽດນາມ, ເວົ້າສະເພາະ ແມ່ນການຄ້າສອງຝ່າຍ ແລະ ການຄ້າຊາຍແດນ, ເພື່ອຕອບສະໜອງຄວາມມຸ່ງມາດປາດຖະໜາຂອງພັກ – ລັດ ກໍ່ຄືປະຊາຊົນລະຫວ່າງສອງຊາດລາວ – ຫວຽດນາມຂອງພວກເຮົາ ເພື່ອແນໃສ່ສ້າງວຽກເຮັດງານທຳ ແລະ ຫຼຸດຜ່ອນຄວາມທຸກຈົນຂອງປະຊາຊົນສອງຊາດລາວ – ຫວຽດນາມທີ່ອາໃສຢູ່ຕາມຊາຍແດນ ແລະ ຫວັງຢ່າງຍິ່ງວ່ານັກທຸລະກິດທັງສອງປະເທດ ລາວ – ຫວຽດນາມ ຈະນຳໃຊ້ໃນໂອກາດເວທີປຶກສາຫາລື ແລະ ແລກປ່ຽນຂໍ້ມູນ – ຂ່າວສານ ແລະ ເຈລະຈາ ຫາຄູ່ຄ້າສ້າງຄວາມເຂັ້ມແຂງທາງທຸລະກິດ ແລະ ເພື່ອພ້ອມກັນພັດທະນາ.
[ສູນສະຖິຕິ ແລະ ຂ່າວສານ]
