ລັດຖະມົນຕີກະຊວງອຸດສາຫະກຳ ແລະ ການຄ້າ (ອຄ) ໄດ້ກ່າວໃນກອງປະຊຸມປະຈຳປີ 2016 ຂອງຂະແໜງ ອຄ ວ່າໃນສົກປີ 2014-2015 ຍອດມູນຄ່າການຜະລິດອຸດສາຫະກໍາປຸງແຕ່ງ ແລະ ຫັດຖະກໍາທົ່ວປະເທດປະຕິບັດໄດ້ 5,462 ຕື້ກີບ, ທຽບໃສ່ສົກປີ 2013-2014 ອັດຕາການຂະຫຍາຍຕົວສະເລ່ຍ 1.2%, ທົ່ວປະເທດມີໂຮງງານ 29,628 ແຫ່ງ.
ກອງປະຊຸມປະຈຳປີ 2016 ຂອງກະຊວງ ອຄ ໄດ້ຈັດຂຶ້ນໃນຕອນເຊົ້າວານນີ້ ທີ່ກະຊວງ ອຄ ໂດຍການເປັນປະທານຂອງ ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງ ອຄ ພ້ອມຮອງລັດຖະມົນຕີ ເຊິ່ງມີຜູ້ເຂົ້າຮ່ວມທັງໝົດ 250 ທ່ານ ຈາກບັນດາຫ້ອງການ, ກົມ, ສະຖາບັນ, ພະແນກ ອຄ ແຂວງ/ນະຄອນຫຼອງ, ຫ້ອງການ ອຄ ເມືອງ ແລະ ຄະນະບໍລິຫານງານສະພາການຄ້າ ແລະ ອຸດສາຫະກຳແຫ່ງຊາດ.
ທ່ານ ນາງ ເຂັມມະນີ ພົນເສນາ ໄດ້ກ່າວລາຍງານການຈັດຕັ້ງປະຕິບັດວຽກງານໃນໄລຍະຜ່ານມາວ່າ: ໃນສົກປີ 2014-2015 ຍອດມູນຄ່າການຜະລິດອຸດສາຫະກຳປຸງແຕ່ງ ແລະ ຫັດຖະກຳທົ່ວປະເທດປະຕິບັດໄດ້ 5,462 ຕື້ກີບ, ທຽບໃສ່ສົກປີ 2013-2014 ອັດຕາການຂະຫຍາຍຕົວສະເລ່ຍ 1.2%. ໃນນັ້ນ, ອຸດສາຫະກໍາທີ່ເດັ່ນກວ່າໝູ່ແມ່ນ: ອຸດສາຫະກຳຜະລິດເຄື່ອງດື່ມ ກວມເອົາ 42.98%, ຜະລິດຕະພັນສະບຽງອາຫານກວມ 21.27%, ການປະກອບລົດໃຫຍ່, ລັດຈັກ ແລະ ຜະລິດອາໄຫຼ່ຕ່າງໆກວມ 5.9%, ການຜະລິດຕະພັນຈາກແຮ່ທາດທີ່ບໍ່ແມ່ນໂລຫະກວມ 4.6%. ພ້ອມນີ້, ໄດ້ເອົາໃຈໃສ່ໃນການຈັດຕັ້ງ ແລະ ປັງປຸງນິຕິກໍາໃຫ້ສອດຄ່ອງກັບສະພາບຕົວຈິງ ເພື່ອອໍານວຍຄວາມສະດວກໃຫ້ແກ່ພາກທຸລະກິດ, ດັດສົມໂຮງງານ, ພັດທະນາເຂດ ແລະ ນິຄົມອຸດສາກະກໍາໃນຂອບເຂດທົ່ວປະເທດ. ເຊິ່ງມາຮອດປັດຈຸບັນໂຮງງານອຸດສາຫະກຳປຸງແຕ່ງທົ່ວປະເທດມີ 29,628 ແຫ່ງ. ໃນນັ້ນ, ໂຮງງານຂະໜາດໃຫຍ່ 714 ແຫ່ງ, ຂະໜາດກາງ 1,043 ແຫ່ງ, ໂຮງງານຂະໜາດນ້ອຍ 6,686 ແຫ່ງ ແລະ ອຸດສາຫະກໍາແບບຄອບຄົວ ຈຳນວນ 21,185 ແຫ່ງ ທຽບໃສ່ສົກປີ 2014-2015 ແມ່ນມີທ່າອ່ຽງຫຼຸດລົງຂອງໂຮງງານອຸດສາຫະກຳຂະໜາດນ້ອຍ ແລະ ອຸດສາກະກຳແບບຄອບຄົວ, ເນື້ອງຈາກການດັດສົມໂຮງງານໃຫ້ໄດ້ມາດຕະຖານ ແລະ ປັງປຸງເພື່ອຂະຫຍາຍການຜະລິດຈາກໂຮງງານຂະໜາດນ້ອຍມາເປັນໂຮງງານຂະໜາດກາງ ແລະ ໃຫຍ່, ສ່ວນການຊຸກຍູ້ ແລະ ສົ່ງເສີມການຜະລິດເປັນສິນຄ້າກໍ່ເປັນຂະບວນຟົດຟື້ນໂດຍສະເພາະຂະແໜງທີ່ເປັນທ່າແຮງເຊັ່ນ: ອຸດສາຫະກຳປຸງແຕ່ງໄມ້, ສະບຽງອາຫານ, ວັດສະດຸກໍ່ສ້າງ, ຕັດຫຍິບ, ຫັດຖະກຳ, ຕ່ຳຫູກ, ສິນຄ້າກະສິກຳ ແລະ ອື່ນໆ.
ທ່ານຍັງກ່າວຕື່ມວ່າ: ນອກນີ້ລວມຍອດຜະລິດຕະພັນພາຍໃນຂອງຂະແໜງການຄ້າ ຂາຍຍົກ – ຂາຍຍ່ອຍ ແລະ ສ້ອມແປງ ລວມທັງໝົດ 8,792 ຕື້ກີບ, ເພີ່ມຂຶ້ນ 9% ທຽບໃສ່ສົກປີຜ່ານມາມູນຄ່າດັ່ງກ່າວກວມອັດຕາສ່ວນ 49% ຂອງຂະແໜງບໍລິການ ແລະ ກວດເອົາ 19.8% ຂອງ GDP ຂັ້ນຂອດກໍ່ເຫັນເອື້ອອຳນວຍຫຼາຍຂຶ້ນ, ການຄຸ້ມຄອງທຸລະກິດເຫັນວ່າເຂົ້າສູ່ລະບຽບກົດໝາຍຫຼາຍຂຶ້ນ, ຜູ້ປະກອບກິດຈະການມີຄວາມຮັບຮູ້, ເຂົ້າໃຈເຖິງສະພາບການແຂ່ງຂັນການຕະຫຼາດໂດຍສະເພາະການເຂົ້າສູ່ປະຊາຄົມເສດຖະກິດອາຊຽນເຊິ່ງສາມາດຕີລາຄາໄດ້ດັ່ງນີ້: ການລົງທຶນໃນຂະແໜງອຸດສາຫະກຳ ແລະ ການຄ້າ, ການຄົ້ນຄວ້າສ້າງ ແລະ ປັບປຸງກົດໝາຍ, ນິຕິກຳ ແລະ ນະໂຍບາຍ, ການຄົ້ນຄວ້າວິທະຍາສາດ ແລະ ວິທະຍາການ, ການພັດທະນາຊັບພະຍາກອນມະນຸດ, ການຕິດຕາມກວດກາ ແລະ ປະເມີນ, ການຄຸ້ມຄອງລາຄາສິນຄ້າ, ການປະຕິບັດຄຳສັ່ງເລກທີ 15/ນຍ ເປັນຕົ້ນ.
ທ່ານຍັງເນັ້ນຕື່ມວ່າ: ຜ່ານການປະຕິບັດວຽກງານຂະແໜງການຄ້າໃນໄລຍະຜ່ານມາກໍ່ຍັງມີບາງຈຸດອ່ອນ ແລະ ຂໍ້ຄົງຄ້າງ. ສະນັ້ນ, ເພື່ອເປັນການປັບປຸງ ແລະ ແກ້ໄຂຈຸດອ່ອນມີໃນໄລຍະທີ່ຜ່ານມານັ້ນ ພວກເຮົາຈຶ່ງໄດ້ກໍານົດທິດທາງ ແລະ ມາດຕະການປັບປຸງດັ່ງນີ້: ການຜັນຂະຫຍາຍແນວທາງນະໂຍບາຍຂອງພັກ, ແຜນພັດທະນາເສດຖະກິດແຫ່ງຊາດເຂົ້າສູ່ການຈັດຕັ້ງປະຕິບັດ ແລະ ເພື່ອເຮັດໃຫ້ມະຕິກອງປະຊຸມໃຫຍ່ຄັ້ງທີ X ຂອງພັກ, ມະຕິກອງປະຊຸມໃຫຍ່ຄັ້ງທີ 4 ຂອງອົງຄະນະພັກກະຊວງ ອຄ ກໍ່ຄືວິໄສທັດ, ຍຸດທະສາດການພັດທະນາ ແລະ ແຜນພັດທະນາເສດຖະກິດ – ສັງຄົມແຫ່ງຊາດ 5 ປີ ຄັ້ງທີ VIII ລວມທັງແຜນວຽກຈຸດສຸມໃນ 5 ປີຂ້າງໜ້າຂອງລັດຖະບານໄດ້ຮັບການຈັດຕັ້ງປະຕິບັດໃນຂະແໜງອຸດສາຫະກຳ ແລະ ການຄ້າ ຈະໄດ້ປະກອບສ່ວນໃນໜ້າທີ່ວຽກງານຕ່າງໆດັ່ງນີ້: ຈະໄດ້ປະກອບສ່ວນໃນການປະຕິບັດ 7 ຍຸດທະສາດບຸລິມະສິດໃຫ້ມີປະສິດທິພາບ. ພ້ອມສືບຕໍ່ຊຸກຍູ້ການລົງທຶນໃນຂະແໜງອຸດສາຫະກຳ ແລະ ການຄ້າ, ການຄົ້ນຄວ້າສ້າງ ແລະ ປັບປຸງກົດໝາຍ, ນິຕິກຳ ແລະ ນະໂຍບາຍ. ການຄົ້ນຄວ້າວິທະຍາສາດ ແລະ ວິທະຍາການ. ການພັດທະນາຊັບພະຍາກອນມະນຸດ. ການຕິດຕາມກວດກາ ແລະ ປະເມີນ. ການຄຸ້ມຄອງລາຄາສິນຄ້າ ແລະ ເອົາໃຈໃສ່ປະຕິບັດຄຳສັ່ງເລກທີ 15/ນຍ ຕື່ມອີກ.
[ສູນສະຖິຕິ ແລະ ຂໍ້ມູນຂ່າວສານ]
