ໃນຕອນບ່າຍຂອງວັນທີ 20 ທັນວາ 2016 ທີ່ຫ້ອງຮັບແຂກຂອງ ກະຊວງອຸດສາຫະກຳ ແລະ ການຄ້າ, ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ຕ້ອນຮັບການເຂົ້າຢ້ຽມອຳລາຂອງ ທ່ານ ດາໂຕະ ທັນໄຕ ຫິງ (Dat0 Than Tai Hing) ເອກອັກຄະລະຖະທູດ ມາເລເຊຍ ປະຈໍາລາວ ໃນວາລະໂອກາດທີ່ທ່ານໄດ້ສຳເລັດໜ້າທີ່ການທູດຢູ່ ສປປ ລາວ.
ໃນໂອກາດດັ່ງກ່າວ ທ່ານລັດຖະມົນຕີ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ການປະກອບສ່ວນຢ່າງຕັ້ງໜ້າຂອງທ່ານທູດ ໃນການເສີມຂະຫຍາຍການພົວພັນຮ່ວມມືລະຫວ່າງສອງປະເທດໃຫ້ນັບມື້ນັບຂະຫຍາຍຕົວຢ່າງເຂັ້ມແຂງ ໃນໄລຍະທີ່ປະຕິບັດໜ້າທີ່ຢູ່ ສປປ ລາວ ຕະຫຼອດ 5 ປີ ຜ່ານມາ ເວົ້າລວມ, ເວົ້າສະເພາະແມ່ນການສົ່ງເສີມການພົວພັນການຄ້າ ແລະ ການລົງທຶນ ລະຫວ່າງ ສປປ ລາວ ແລະ ມາເລເຊຍ ລວມທັງການຊຸກຍູ້ ແລະ ສະໜັບສະໜູນການເປັນປະທານກອງປະຊຸມລັດຖະມົນຕີເສດຖະກິດອາຊຽນ ຄັ້ງທີ 48 ແລະ ກອງປະຊຸມກ່ຽວຂ້ອງ ຊຶ່ງປະສົບຜົນສຳເລັດຢ່າງຈົບງາມ. ໃນໂອກາດນີ້ ທ່ານລັດຖະມົນຕີ ໄດ້ອວຍພອນໃຫ້ທ່ານທູດ ຈົ່ງປະສົບຜົນສຳເລັດໃນໜ້າທີ່ຮັບຜິດຊອບໃໝ່ ແລະ ສືບຕໍ່ເສີມຂະຫຍາຍການພົວພັນລະຫວ່າງສອງປະເທດ ແລະ ເດີນທາງກັບປະເທດດ້ວຍຄວາມສະຫວັດດີພາບ.
ໃນຕອນທ້າຍທ່ານທູດ ກໍ່ໄດ້ສະແດງຄວາມຂອບໃຈມາຍັງທ່ານລັດຖະມົນຕີ ກໍ່ຄືລັດຖະບານແຫ່ງ ສປປ ລາວ ທີ່ໄດ້ໃຫ້ການສະໜັບສະໜູນ ແລະ ອຳນວຍຄວາມສະດວກ ຕະຫລອດໄລຍະທີ່ທ່ານປະຕິບັດໜ້າທີ່ຢູ່ ສປປ ລາວ ຈົນປະສົບຜົນສຳເລັດເປັນຮູບປະທຳຫຼາຍວຽກງານ. ສຸດທ້າຍທ່ານຍັງຢໍ້າຄືນອີກວ່າ ຈະສືບຕໍ່ປະກອບສ່ວນ ແລະ ເສີມຂະຫຍາຍມູນຄ່າການຄ້າ ແລະ ການລົງທຶນ ຂອງສອງປະເທດໃຫ້ເພີ້ມຂຶ້ນ.
[ກະຊວງອຸດສາຫະກຳ ແລະ ການຄ້າ]
