ເພື່ອເປັນການສ້າງຂະບວນການຂໍ່ານັບຮັບຕ້ອນວັນສຳຄັນຕ່າງໆ ຂອງແຂວງໃຫ້ມີບັນຍາກາດຟົດຟື້ນ ພະແນກອຸດສາຫະກຳ ແລະ ການຄ້າແຂວງ ໄດ້ຈັດການແຂ່ງຂັນກິລາເປຕັງຂຶ້ນໃນວັນທີ 21 ກໍລະກົດ 2017 ທີ່ພະແນກດັ່ງກ່າວເຂົ້າຮ່ວມໃນພິທີເປີດການແຂ່ງຂັນໂດຍ ທ່ານ ທອງໄຊ ມັງໝໍ່ເມກ ຫົວໜ້າພະແນກອຸດສາຫະກຳ ແລະ ການຄ້າແຂວງ, ມີບັນດາຂະແໜງການ, ວິສາຫະກິດນ້ຳມັນເຊື້ອໄຟ, ບໍລິສັດການຄ້າ ແລະ ທ່ອງທ່ຽວເຂົ້າຮ່ວມ.
ການແຂ່ງຂັນກິລາເປຕັງຂອງພະແນກອຸດສາຫະກຳ ແລະ ການຄ້າຄັ້ງນີ້ ແມ່ນມີທັງໝົດ 12 ທີມ, ແບ່ງອອກເປັນສອງສາຍແຂ່ງຂັນຄື: ທີມຍິງ ແລະ ທີມຊາຍ, ໃນນັ້ນທີມຊາຍ 8 ທີມ ແລະ ທີມຍິງ 4 ທີມ ເຊິ່ງພາຍໃນງານແມ່ນມີຄວາມຄຶກຄື້ນ, ມ່ວນຊື່ນຈາກສຽງຜູ້ຊົມທີ່ເຂົ້າຮ່ວມ. ຈຸດປະສົງໃນການແຂ່ງຂັນ ທ່ານ ທອງໄຊ ມັງໝໍ່ເມກ ໄດ້ໃຫ້ຮູ້ວ່າ : ການຈັດການແຂ່ງຂັນຄັ້ງນີ້ແມ່ນເພື່ອເປັນການສ້າງຂະບວນການສະເຫລີມສະຫລອງຮັບຕ້ອນ ກອງປະຊຸມສະພາປະຊາຊົນແຂວງສະໄໝສາມັນເທື່ອທີ III, ຜົນສຳເລັດກອງປະຊຸມບັ້ນດຳເນີນຊີວິດການເມືອງປັບປຸງປົວແປງພັກຂອງພະແນກ ໃຫ້ມີບັນຍາກາດຄຶກຄື້ນມ່ວນຊື່ນ ພ້ອມກັບການສ້າງຄວາມສາມັກຄີ ລະຫວ່າງ ອ້າຍນ້ອງພາຍໃນພະແນກ ແລະ ບັນດາທຸລະກິດຜູ້ປະກອບການພາຍໃນແຂວງ ໃຫ້ມີຄວາມສະຫນິດສະໜົມລຶ້ງເຄີຍກັນຂຶ້ນໄປເລື້ອຍໆ.
ຂ່າວ : ມະນີວັນ
[ຮຽບຮຽງໂດຍ: ຂະແໜງຂ່າວສານ]
