ກອງປະຊຸມໃຫຍ່ ຄັ້ງທີ V ຂອງຮາກຖານຊາວໜຸ່ມພະແນກອຸດສາຫະກໍາ ແລະ ການຄ້າແຂວງ ໄດ້ເປີດຂຶ້ນໃນເວລາ 08:00 ມ, ຂອງວັນທີ 11 ສິງຫາ 2017, ທີ່ຫ້ອງປະຊຸມໃຫຍ່ພະແນກອຸດສາຫະກຳ ແລະ ການຄ້າແຂວງ ໂດຍພາຍໃຕ້ການເປັນປະທານຂອງ ທ່ານ ທອງໄຊ ມັງໜໍ່ເມກ, ເລຂາຄະນະພັກຮາກຖານ ພະແນກອຸດສາຫະກໍາ ແລະ ການຄ້າແຂວງ. ນອກນັ້ນ, ກອງປະຊຸມ ຍັງຖືເປັນກຽດຢ່າງສູງ ທີ່ໄດ້ຕ້ອນຮັບການເຂົ້າຮ່ວມຂອງ ທ່ານ ນ. ອາລີ ບົວຈູມ, ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 12 ແຂວງຄຳມ່ວນ, ຮອງຄະນະບໍລິຫານງານຊາວໜຸ່ມ ແຂວງຄຳມ່ວນ.ສະມາຊິກຊາວໜຸ່ມຂອງຮາກຖານ ພະແນກອຸດສາຫະກຳ ແລະ ການຄ້າແຂວງ ທັງໝົດ 95 ສະຫາຍ, ຍິງ 30 ສະຫາຍ.
ກອງປະຊຸມໄດ້ດຳເນີນໂດຍສຸມໃສ່ຄົ້ນຄວ້າ ບັນດາວຽກງານທີ່ສຳຄັນ ດັ່ງນີ້:
- ກອງປະຊຸມໄດ້ຮັບຟັງບົດລາຍງານການເມືອງໃນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ IV ຂອງຮາກຖານຊາວໜຸ່ມ ພະແນກອຸດສາຫະກຳ ແລະ ການຄ້າແຂວງ ແຕ່ປີ 2013-2017 ຜ່ານມາ.
- ກອງປະຊຸມໄດ້ພ້ອມກັນຕີລາຄາ, ປະກອບຄຳຄິດ ຄໍຳເຫັນ ຕໍ່ຜົນງານທີ່ຍາດມາໄດ້ ມີດ້ານດີ ແລະ ດ້ານອ່ອນ, ຂໍ້ຄົງຄ້າງໃນໄລຍະຜ່ານມາທີ່ຈະໄດ້ພ້ອມກັນປັບປຸງ ແລະ ແກ້ໄຂໃນຕໍ່ໜ້າ ແລະ ໄດ້ຕົກລົງເຫັນດີ ເປັນເອກະພາບກັນ ຮັບຮອງເອົາບົດລາຍງານການເມືອງ ແລະ ທິດທາງແຜນການ ໃນຕໍ່ໜ້າ.
- ຜູ້ແທນກອງປະຊຸມຍັງໄດ້ຮັບຟັງການຜ່ານບົດສຳຫຼວດ ຂອງຄະນະຮາກຖານຊາວໜຸ່ມຄັ້ງທີ IV, ເຊິ່ງໄດ້ຍົກໃຫ້ເຫັນຜົນງານໃນການຊີ້ນຳໆພາວຽກງານໃນແຕ່ລະດ້ານ; ມີດ້ານດີ, ດ້ານອ່ອນ, ຂໍ້ຄົງຄ້າງຂອງຄະນະຮາກຖານຊາວໜຸ່ມຊຸດເກົ່າ ທີ່ຈະຕ້ອງໄດ້ຖອດຖອນບົດຮຽນ ແລະ ປັບປຸງແກ້ໄຂໃນຄະນະຮາກຖານຊາວໜຸ່ມຊຸດໃໝ່.
- ຜູ້ແທນກອງປະຊຸມໄດ້ຮັບຟັງມາດຖານ ແລະ ເງື່ອນໄຂຂອງຜູ້ສະໝັກຄະນະຮາກຖານຊາວໜຸ່ມ ຊຸດໃໝ່ເພື່ອມາບໍລິຫານວຽກງານຂອງຮາກຖານຊາວໜຸ່ມ ພະແນກອຸດສາຫະກຳ ແລະການຄ້າແຂວງ ໃນຕໍ່ໜ້າ.
- ກອງປະຊຸມໃຫຍ່ໃນຄັ້ງນີ້ ໄດ້ພ້ອມກັນປ່ອນບັດເລືອກຕັ້ງເອົາຄະນະຮາກຖານຊາວໜຸ່ມ ຊຸດທີ V, ເຊິ່ງມີຜູ້ອອກສະມັກເລືອກຕັ້ງທັງໝົດ 09 ສະຫາຍ, ໃນນັ້ນໄດ້ເລືອກເອົາ 07 ສະຫາຍ
ກອງປະຊຸມຄັ້ງປະຖົມມະລຶກ ແມ່ນໄດ້ເປັນເອກະສັນຢ່າງສົມບູນເລືອກເອົາເລຂາ, ຮອງເລຂາ ແລະ ຄະນະກຳມະການຮາກຖານຊາວໜຸ່ມ ພະແນກອຸດສາຫະກຳ ແລະ ການຄ້າແຂວງ ຊຸດໃໝ່, ເຊິ່ງປະກອບມີ:
1) ເລືອກເອົາ ສະຫາຍ ເພັດສະໝອນ ສັງສິນໄຊ ເປັນເລຂາຮາກຖານຊາວໜຸ່ມ.
2) ເລືອກເອົາ ສະຫາຍ ສິນບັນດິດ ອຸດທິວົງ ເປັນຮອງເລຂາຮາກຖານຊາວໜຸ່ມ, ທັງເປັນປະທາານກວດກາ.
3) ເລືອກເອົາ ສະຫາຍ ສຸລິເດດ ຄູສະກຸນ ເປັນຮອງເລຂາຮາກຖານຊາວໜຸ່ມ.
4) ເລືອກເອົາ ສະຫາຍ ນ. ສີສົມພອນ ຈັນທະວົງ ເປັນກຳມະການ.
5) ເລືອກເອົາ ສະຫາຍ ພິລາວົງ ອິນທະວົງສາ ເປັນກຳມະການ.
6) ເລືອກເອົາ ສະຫາຍ ນ. ເພັດສະໜອນ ຫອມສົມບັດ ເປັນກຳມະການ.
7) ເລືອກເອົາ ສະຫາຍ ໄຂມາ ແສງສຸລິຍາ ເປັນກຳມະການ
ກອງປະຊຸມໃຫຍ່ໃນຄັ້ງນີ້ໄດ້ມອບຄວາມຮັບຜິດຊອບໃຫ້ຄະນະຮາກຖານຊາວໜຸ່ມ ຊຸດທີ V ສືບຕໍ່ຊີ້ນຳໆພາການຈັດຕັ້ງປະຕິບັດແຜນການກອງປະຊຸມໃຫຍ່ຄັ້ງນີ້ໃນ 05 ປີ ຕໍ່ໜ້າໃຫ້ປະກົດຜົນເປັນຈິງ. ພ້ອມທັງ ໄດ້ຮັບຟັງການໂອ້ລົມຊີ້ນຳຂອງ ທ່ານ ນ. ອາລີ ບົວຈູມ, ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 12 ແຂວງຄຳມ່ວນ, ຮອງຄະນະບໍລິຫານງານຊາວໜຸ່ມ ແຂວງຄຳມ່ວນ ເຊິ່ງໄດ້ສະແດງຄວາມຍ້ອງຍໍ,ຊົມເຊີຍ ຕໍ່ການຊີ້ນຳໆພາຂອງຄະນະຮາກຖານຊາວໜຸ່ມ ຊຸດເກົ່າ ແລະ ບັນດາສະມາຊິກຊາວໜຸ່ມໃນໄລຍະຜ່ານມາ. ພ້ອມກັນນັ້ນ, ສະຫາຍ ກໍ່ຍັງໄດ້ສະແດງຄວາມເປັນຫວ່ງ, ເປັນໄຍຕໍ່ກັບບັນດາຈຸດອ່ອນ ແລະ ຂໍ້ຄົງຄ້າງ ແລະ ຍັງໄດ້ໃຫ້ທິດເຍືອງທາງຕໍ່ການຈັດຕັ້ງປະຕິບັດໜ້າທີ່ວຽກງານ ຂອງຄະນະຮາກຖານຊາວໜຸ່ມ ຕະຫຼອດຮອດສະມາຊິກຊາວໜຸ່ມ ພະແນກອຸດສາຫະກຳ ແລະ ການຄ້າແຂວງ ໃນຕໍ່ໜ້າໃຫ້ມີຜົນງານຍິ່ງໃຫຍ່ຂຶ້ນກວ່າເກົ່າ; ແລະ ມີຄວາມໝາຍຄວາມສຳຄັນຢ່າງໃຫຍ່ຫຼວງ. ສະນັ້ນ, ຈຶ່ງຂໍຮຽກຮ້ອງມາຍັງສະມາຊິກຊາວໜຸ່ມທຸກສະຫາຍ ຈົ່ງພ້ອມພາກັນ ແລະ ເພີ້ມຄວາມຮັບຜິດຊອບສູງຂຶ້ນກວ່າເກົ່າ,ເປັນຕົ້ນແມ່ນດ້ານການເມືອງ-ແນວຄິດ, ດ້ານການຈັດຕັ້ງ, ດ້ານວຽກງານວິຊາສະເພາະ ແລະ ການເຂົ້າຮ່ວມຂະບວນການຕ່າງໆເພື່ອເປັນເສນາທິການໃຫ້ແກ່ຄະນະພັກຂັ້ນເທິງກໍ່ຄືຄະນະບໍລິຫານງານຊາວໜຸ່ມແຂວງຄຳມ່ວນຂອງພວກເຮົາ ເພື່ອຈັດຕັ້ງປະຕິບັດໜ້າທີ່ວຽກງານ ໃຫ້ປະສົບຜົນສຳເລັດ ຕາມແຜນການທີ່ໄດ້ວາງໄວ້.
ກອງປະຊຸມ ໄດ້ສໍາເລັດລົງ ໃນເວລາ 12 : 00 ມ, ຂອງວັນດຽວ.
[ຂ່າວ ແລະ ພາບ: ນິພາພອນ]
[ຮຽບຮຽງໂດຍ: ຂະແໜງຂ່າວສານ]
