ຕອນບ່າຍ ເວລາ 15: 30 ໂມງ ຂອງວັນທີ 14 ສິງຫາ 2017 ທີ່ຫ້ອງຮັບແຂກຊັ້ນ 4 ຂອງກະຊວງອຸດຫະກໍາ ແລະ ການຄ້າ ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ຮັບຕ້ອນການຢ້ຽມຂໍ່ານັບ ຂອງທ່ານ Wang Wentian, ເອກອັກຄະລັດຖະທູດຜູ້ມີອຳນາດເຕັມ ແຫ່ງ ສປ ຈີນ ປະຈໍາສປປ ລາວຄົນໃໝ່ ເນື່ອງໃນໂອກາດທີ່ໄດ້ດຳລົງຕຳແໜ່ງໃໝ່.
ການເຂົ້າຢ້ຽມໃນຄັ້ງນີ້ ມີການປຶກສາຫາລືຄວາມເຂົ້າໃຈຮ່ວມກັນຫຼາຍດ້ານ, ດ້ານການຮ່ວມມື, ດ້ານການລົງທຶນຊ່ວຍເຫຼືອລ້າ, ບັນດາໂຄງໃຫຍ່ ເປັນຕົ້ນ ການກໍ່ສ້າງເສັ້ນທາງລົດໄຟ ລາວ-ຈີນ, ນອກນັ້ນ ຍັງມີຫຼາຍໂຄງການທີ່ປິ່ນອ້ອມທີ່ເປັນຟື້ນຖານ ໂຄງລ່າງໃຫ້ແກ່ ສປປ ລາວ.
ເຂົ້າຮ່ວມພົບປະຈາກຝ່າຍລາວ ນໍາໂດຍ ທ່ານ ນ. ເຂັມມະນີ ພົນເສນາ ກໍາມະການສູນກາງພັກ ເລຂາພັກກະຊວງ ປະທານຄະນະກຳມາທິການຮ່ວມມືລາວ-ຈີນ ລັດຖະມົນຕີກະຊວງອຸດສາຫະກໍາ ແລະ ການຄ້າ ຂອງ ສປປ ລາວ ພ້ອມດ້ວຍຫົວໜ້າຫ້ອງການ, ຮອງຫົວໜ້າຫ້ອງການ, ຫົວໜ້າກົມ, ຫົວໜ້າພະແນກ ແລະ ວິຊາການທີ່ກ່ຽວຂ້ອງຈໍານວນໜຶ່ງ, ພ້ອມທັງຄະນະຈາກຝ່າຍຈີນ ປະມານ 10 ກວ່າທ່ານ;
ທ່ານ ລັດຖະມົນຕີ ກ່າວຍິນດີຕ້ອນຮັບ ທ່ານເອກອັກຄະລັດຖະທູດຈີນ ປະຈໍາ ສປປ ລາວ ຄົນໃໝ່ ແລະ ຊົມເຊີຍການໃຫ້ຄວາມຮ່ວມມື ເປັນຢ່າງດີ ຂອງຝ່າຍຈີນ ແລະ ສຸດທ້າຍ, ທ່ານເອກອັກຄະລັດຖະທູດຈີນ ກໍ່ສະແດງຄວາມຂອບໃຈມາຍັງ ທ່ານລັດຖະມົນຕີກະຊວງ ອຄ ຂອງລາວ ທີ່ໄດ້ໃຫ້ການຕ້ອນຮັບຢ່າງອົບອຸ່ນ.
[ພາບ ແລະ ຂ່າວ: ຂະແໜງຂ່າວສານ]
