ລັດຖະມົນຕີ ກະຊວງປ້ອງກັນປະເທດເນັ້ນຢໍ້າວ່າ ກອງທັບມີພາລະໜ້າທີ່ທີ່ສໍາຄັນ ທີ່ຈະຕ້ອງຮັບປະກັນຄວາມປອດໄພໃຫ້ແກ່ໂຄງການກໍ່ສ້າງລົດໄຟເຊື່ອມຕໍ່ລາວ ກັບ ຈີນ.
ພົນໂທຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດ ຖະແຫລງຢືນຢັນວ່າ ພາລະໜ້າທີ່ ທີ່ສໍາຄັນ ຂອງກອງທັບປະຊາຊົນລາວຈະຕ້ອງປະຕິບັດໃຫ້ໄດ້ 100 ເປີເຊັນ ກໍຄືການຮັບປະກັນຄວາມປອດໄພໃຫ້ແກ່ໂຄງການກໍ່ສ້າງທາງລົດໄຟເຊື່ອມຕໍ່ລະຫວ່າງລາວກັບຈີນ ໂດຍປະສານສົມທົບກັບທຸກພາກສ່ວນ ໃນທຸກພື້ນທີ່ ທີ່ທາງລົດໄຟຜ່ານ ທັງຍັງຈະຕ້ອງກວດກາທຸກການເຄື່ອນໄຫວໃນສັງຄົມ ອີກດ້ວຍ ດັ່ງທີ່ພົນໂທຈັນສະໝອນ ໄດ້ໃຫ້ການເນັ້ນຢໍ້າວ່າ: “ການປະຕິບັດໜ້າທີ່ຢູ່ພາກສະໜາມ ມັນມີການພົວພັນກັບຫລາຍພາກສ່ວນ ດັ່ງນັ້ນ ຖ້າປະຕິບັດໜ້າທີ່ ພື້ນທີ່ໃດ ກໍຈະຕ້ອງປະສານສົມທົບກັບຄະນະພັກ ອໍານາດການປົກຄອງຂອງທ້ອງຖິ່ນນັ້ນ ໃຫ້ແໜ້ນແຟ້ນ ໃຫ້ມີຄວາມເປັນເອກະພາບ ໃຫ້ຮັບປະກັນ ເພາະບໍ່ແມ່ນແຕ່ໜ້າທີ່ ທີ່ຈະກວດຄົ້ນ ເກັບກູ້ລະເບີດເທົ່ານັ້ນ ພວກສະຫາຍຍັງຕ້ອງເຮັດໜ້າທີ່ ຮັບປະກັນຄວາມສະຫງົບປອດໄພ ຢູ່ໃນເຂດດັ່ງກ່າວ ຊຶ່ງບັນດາຄົນບໍ່ດີ ຍັງຈະເລັດລອດສ້າງບັນຫາໃຫ້ພວກເຮົາ ໝາຍຄວາມວ່າ ການເຄື່ອນໄຫວປະຕິບັດໜ້າທີ່ ຕ້ອງຕິດພັນກັບການກໍ່ສ້າງຮາກຖານການເມືອງ ພັດທະນາຊົນນະບົດ ປະກອບສ່ວນໃນການກໍ່ສ້າງ ຮາກຖານ.”
ກ່ອນໜ້ານີ້ ລັດຖະບານລາວຍັງໄດ້ມອບໝາຍໃຫ້ກອງທັບປະຊາຊົນລາວເປັນພາກສ່ວນຮັບຜິດຊອບໃນການກວດຄົ້ນ ແລະ ເກັບກູ້ລະເບີດບໍ່ທັນແຕກ ຫລື UXO ທີ່ຕົກຄ້າງຕະຫລອດພື້ນທີ່ທີ່ເປັນເຂດ ແລວທາງ ແລະ ທີ່ຕັ້ງສະຖານີລົດໄຟອີກດ້ວຍ ຊຶ່ງຜ່ານມາກໍປາກົດວ່າກອງທັບປະຊາຊົນລາວ ທີ່ມີກົມໃຫຍ່ເສນາທິການເປັນພາກສ່ວນທີ່ຮັບຜິດຊອບໂດຍກົງນັ້ນ ກໍໄດ້ດໍາເນີນການກວດຄົ້ນພື້ນທີ່ໄດ້ແລ້ວ 314,682 ເຮັກຕາ, ສໍາຫລວດ ແລະ ເຈາະທາງທໍລະນີສາດໃນພື້ນທີ່ 125,625 ເຮັກຕາ, ແລະ ເກັບກູ້ລະເບີດໄດ້ 145 ໜ່ວຍ. ສ່ວນການດໍາເນີນງານໃນໄລຍະຕໍ່ໄປນີ້ ກໍຈະທໍາການກວດຄົ້ນ ແລະ ເກັບກູ້ລະເບີດທັງໝົດ ໃນຕະຫລອດເສັ້ນທາງລົດໄຟໃຫ້ສໍາເລັດພາຍໃນ 36 ເດືອນຕໍ່ໜ້າ.
ທາງດ້ານທ່ານ ອາຄົມເຕີມພິທະຍາ ລັດຖະມົນຕີວ່າການກະຊວງຄົມມະນາຄົມຂອງໄທ ກໍຢືນຢັນວ່າ ການກໍ່ສ້າງທາງລົດໄຟຄວາມໄວສູງຈາກໃນໄທເພື່ອເຊື່ອມຕໍ່ກັບລາວ ແລະ ຈີນນັ້ນ ໄດ້ຜ່ານການຮັບຮອງ ແລະ ອະນຸມັດແຜນການໂດຍຄະນະລັດຖະມົນຕີຂອງໄທ ຢ່າງເປັນທາງການແລ້ວ ໂດຍໄດ້ແບ່ງເປັນສອງໄລຍະຄື: ໄລຍະທີ 1 ແມ່ນເສັ້ນທາງຈາກບາງກອກ ໄປຫາ ໂຄລາດ ກັບໄລຍະທີ 2 ຈາກໂຄລາດໄປຫາໜອງຄາຍ ເພື່ອເຊື່ອມຕໍ່ກັບລາວ ທີ່ນະຄອນຫລວງວຽງຈັນ ໂດຍມີກຳນົດການກໍ່ສ້າງໃຫ້ແລ້ວສຳເລັດ ແລະ ເປີດບໍລິການໃນປີ 2021 ຊຶ່ງຖືເປັນສ່ວນຫນຶ່ງຂອງແຜນການຫນຶ່ງແລວທາງຫນຶ່ງເສັ້ນທາງ (One Belt-One Road) ທີ່ລິເລີ້ມໂດຍລັດຖະບານຈີນ.ໂດຍການເຊື່ອມຕໍ່ທາງລົດໄຟ ໄທ-ຈີນ ດັ່ງກ່າວນີ້ ກໍຄືເສັ້ນທາງລົດໄຟ ທີ່ລາວເປັນສູນກາງການເຊື່ອມຕໍ່ນັ້ນເອງ ຊຶ່ງການກໍ່ສ້າງທາງລົດໄຟໃນລາວ ເພື່ອເຊື່ອມຕໍ່ຈີນ ແລະ ໄທ ມີກຳນົດການກໍ່ສ້າງແລ້ວສຳເລັດ ພາຍໃນ 60 ເດືອນ ນັບຈາກພິທີເປີດການກໍ່ສ້າງທີ່ຈັດຂຶ້ນຢ່າງເປັນທາງການເມື່ອວັນທີ 25 ທັນວາ 2016 ທີ່ຜ່ານມາ ຢູ່ທີ່ແຂວງຫລວງພະບາງ. ທັງນີ້ ມີ 11 ບໍລິສັດ ຈີນ ເປັນພາກສ່ວນຮັບຜິດຊອບໂຄງການ ແລະ ໄດ້ນຳໃຊ້ແຮງງານ ທີ່ມີປະສົບການຈາກຈີນ ຫຼາຍກວ່າ 10,000 ຄົນ ເຊັ່ນ: ຢູ່ທີ່ແຂວງອຸດົມໄຊ ຈະຕ້ອງນຳໃຊ້ແຮງງານຈາກຈີນ 5,000 ກວ່າຄົນ ເນື່ອງຈາກທາງລົດໄຟຈະຕ້ອງຜ່ານເຂດແຂວງອຸດົມໄຊ ເຖິງ 126.6 ກິໂລແມັດ ຄິດເປັນ 1 ສ່ວນ 3 ຂອງເສັ້ນທາງທັງໝົດໃນລາວ. ທັງຍັງຈະຕ້ອງກໍ່ສ້າງຂົວ ແລະ ເຈາະອຸໂມງ ຄິດເປັນ 40 ເປີເຊັນຂອງທາງລົດໄຟ. ສ່ວນໃນແຂວງຫລວງພະບາງ ກໍຕ້ອງໃຊ້ແຮງງານຈາກຈີນ 3,000 ກວ່າຄົນ ເພື່ອສ້າງທາງລົດໄຟທີ່ຍາວ 80 ກິໂລແມັດ, 1 ສະຖານີໃຫຍ່, 4 ສະຖານີຍ່ອຍ, ຂົວຂ້າມແມ່ນໍ້າຂອງ 1 ແຫ່ງ ແລະ ອຸໂມງ 6 ແຫ່ງ.
ໂຄງການກໍ່ສ້າງທາງລົດໄຟ ລາວ-ຈີນ ເປັນການຮ່ວມທຶນ ລະຫວ່າງ ລັດຖະບານລາວກັບຈີນ ໃນສັດສ່ວນ 30 ເປີເຊັນ ຕໍ່ 70 ເປີເຊັນ ຂອງມູນຄ່າການລົງທຶນລວມ 6,000 ລ້ານໂດລາທີ່ກູ້ຢືມຈາກສະຖາບັນການເງິນຂອງຈີນ ມີໄລຍະທາງ 417 ກິໂລແມັດ ຈາກດ່ານບໍ່ເຕັນ ແຂວງຫຼວງນໍ້າທາ ຜ່ານອຸດົມໄຊ-ຫຼວງພະບາງ-ຊຽງຂວາງ-ວັງວຽງ ແລະ ນະຄອນຫຼວງວຽງຈັນ ໂດຍລາງລົດໄຟກວ້າງ 1,435 ແມັດໂດຍຂະບວນລົດທີ່ຂົນສົ່ງສິນຄ້າ ແລະ ໂດຍສານແລ່ນດ້ວຍຄວາມໄວ 120 ແລະ 160 ກິໂລແມັດຕໍ່ຊົ່ວໂມງຕາມລຳດັບ.
[ ແຫລ່ງຂ່າວ: VOA (Voice of America)]
[ ຮຽບຮຽງໂດຍ: ຂະແໜງຂ່າວສານ ]
