ຄ່າໃຊ້ຈ່າຍສູງເປັນສາເຫດສຳຄັນປະການຫນຶ່ງ ທີ່ເກີດໃຫ້ນັກທ່ອງທ່ຽວຊາວຕ່າງຊາດເດີີນທາງເຂົ້າມາໃນລາວຫລຸດລົງຢ່າງຕໍ່ເນື່ອງ ທັງຍັງເປັນຄ່າໃຊ້ຈ່າຍ ທີ່ສູງກວ່າທຸກປະເທດໃນເຂດລຸ່ມແມ່ນໍ້າຂອງອີກດ້ວຍ.“
ທ່ານ ສູນ ມະນີວົງ ຫົວໜ້າກົມໂຄສະນາ ແລະ ສົ່ງເສີມການທ່ອງທ່ຽວ ໃນສັງກັດກະຊວງຖະແຫລງຂ່າວ, ວັດທະນາທຳ ແລະທ່ອງທ່ຽວ ໃຫ້ການຢືນຢັນວ່າ: ການມີຄ່າໃຊ້ຈ່າຍຕ່າງໆທີ່ສູງກວ່າທຸກປະເທດ ທີ່ຢູ່ໃນເຂດລຸ່ມແມ່ນໍ້າຂອງດ້ວຍກັນ ເປັນສາເຫດທີ່ສຳຄັນປະການຫນຶ່ງທີ່ເຮັດໃຫ້ນັກທ່ອງທ່ຽວຊາວຕ່າງຊາດ ເດີນທາງເຂົ້້າມາໃນລາວຫລຸດລົງຢ່າງຕໍ່ເນື່ອງ ໂດຍສະເພາະ ຄ່າຄອງຊີບ, ຄ່າເດີນທາງ ,ຄ່າ ທຳນຽມ ແລະ ຄ່າບໍລິການຕ່າງໆນັ້ນ .
“ລາຍການທ່ອງທ່ຽວ ຖ້າແມ່ນໄປທ່ອງທ່ຽວຫວຽດນາມໄດ້ 4 ວັນ 5 ຄືນ ມາທ່ຽວບ້ານເຮົາໄດ້ແຕ່ 2 ວັນ 3 ຄືນ ອາຫານກະແພງ ເຝີຖ້ວຍຫນຶ່ງບ້ານເຮົາ 20,000 ຫລືວ່າ 25,000 ກີບ; ຖ້າແມ່ນເຝີຢູ່ໄທມີລາຄາ 30 ບາດ ນອກຈາກນັ້ນຄັນໄປເຂົ້າຮ້ານອາຫານຍິ່ງແພງ; ອັນທີ 2 ມາຄ່າຂົນສົ່ງ ຫລາຍຄົນເຂົາກໍເວົ້າ ຄ່າປີ້ຍົນໄປວຽງຈັນ-ບາງກອກ ມີແຕ່ 2,000 ບາດ; ບາດໄປວຽງຈັນ-ຫລວງພະບາງຂຶ້ນ 6 ແສນປາຍ ຄັນໄປວຽງຈັນ-ປາກເຊກໍລ້ານປາຍ; ບາດນີ້ຖ້າເຂົ້າແຫລ່ງທ່ອງທ່ຽວເປັນບັນຫາຫນຶ່ງຄືກັນ ທີ່ບັນດານັກທ່ອງທ່ຽວທີ່ມາລາວເຂົາມາເຈິບັນຫາເຊັ່ນ: ໄປວັດພູ ແລະ ຄອນພະເພັງ ຄ່າເຂົ້າຊົມກໍແພງ ກະທົບອີຫລີ ຕົວນີ້ເດ້ ເຂົາຕ້ອງຮັບຮູ້ຄວາມເປັນຈິງເອົາເອງ ເຮົາຈະແກ້ໄຂກັນແນວໃດ?”
ໂດຍໃນລະຍະ 6 ເດືອນທຳອິດຂອງປີ 2017 ຊາວຕ່າງຊາດໄດ້ເດີນທາງເຂົ້າມາທ່ອງທ່ຽວໃນລາວຫລຸດລົງເຖິງ 12% ທຽບໃສ່ໄລຍະດຽວກັນໃນປີ 2016 ໂດຍສະເພາະແມ່ນນັກທ່ອງທ່ຽວຈາກປະເທດສະມາຊິກໃນອາຊຽນດ້ວຍກັນນັ້ນ ຖືເປັນກຸ່ມນັກທ່ອງທ່ຽວທີ່ເດີນທາງເຂົ້າມາໃນລາວຫລຸດລົງຫລາຍທີ່ສຸດ ແລະ ຖ້າຫາກວ່າສະພາບການຍັງຄົງດຳເນີນໄປໃນທິດດັ່ງກ່າວນີ້ຕໍ່ໄປຍັງຈະເຮັດໃຫ້ຄາດໝາຍຈຳນວນນັກທ່ອງທ່ຽວຊາວຕ່າງຊາດ ທີ່ຈະເດີນທາງເຂົ້າມາໃນລາວຕະຫລອດປີ 2017 ນີ້ຈະໜ້ອຍກວ່າປີ 2016 ຢ່າງແນ່ນອນ.
ທັ້ງນີ້ເພື່ອຫລຸດຜ່ອນຜົນກະທົບ ທີ່ຈະເກີດຂຶ້ນດັ່ງກ່າວ ທ່ານ ບໍ່ແສງຄຳ ວົງດາຣາ ລັດຖະມົນຕີກະຊວງຖະແຫລງຂ່າວ ວັດທະນະທຳ ແລະ ທ່ອງທ່ຽວ ຢືນຢັນວ່າ: ລັດຖະບານລາວ ຈະປະກາດເປີດ ແລະ ເລີ້ມການຈັດຕັ້ງປະຕິບັດປີການທ່ອງທ່ຽວລາວປີ 2018ໃນໂອກາດດຽວກັນກັບງານບຸນນະມັດສະການພະທາດຫຼວງ ປີ 2017 ທີ່ເລີ້ມຂຶ້ນຢ່າງເປັນທາງການໃນວັນທີ 28 ຕຸລາ ນີ້ ໂດຍຈະເຊີນບັນດາສື່ມວນຊົນ ແລະ ແຂກຕ່າງປະເທດທັງໃນອາຊຽນ ແລະ ພູມີພາກອື່ນໆ ຈາກທົ່ວໂລກເພື່ອເຂົ້າຮ່ວມໃນພິທີດັ່ງກ່າວ ຊຶ່ງທາງການລາວ ໄດ້ຮຽກຮ້ອງຕໍ່ລັດຖະບານຂອງບັນດາປະເທດໃນອາຊຽນດ້ວຍກັນ ເພື່ອຂໍໃຫ້ມີການສົ່ງເສີມພົນລະເມືອງໃນປະເທດຂອງຕົນ ໃຫ້ເດີນທາງເຂົ້າມາທ່ອງທ່ຽວໃນລາວເພີ້ມຂຶ້ນ ໂດຍສະເພາະແມ່ນປະເທດທີ່ຢູ່ໃນລຸ່ມແມ່ນໍ້າຂອງດ້ວຍກັນ.
ທ່ານ ບໍ່ແສງຄຳ ຍັງຢືນຢັນດ້ວຍວ່າ: ເປັນເປົ້າໝາຍສຳຄັນໃນການພັດທະນາການທ່ອງທ່ຽວລາວ ໃນປັດຈຸບັນ ຄືການປະກອບສ່ວນເຂົ້າໃນການຈັດຕັ້ງປະຕິບັດວຽກງານທຸກດ້ານ ເພື່ອເຮັດໃຫ້ອາຊຽນ ເປັນຈຸດໝາຍປາຍທາງດຽວກັນ ສຳລັບບັນດານັກທ່ອງທ່ຽວຈາກພູມີພາກອື່ນໆ ໃຫ້ໄດ້ຢ່າງເປັນຮູບປະທຳພາຍໃນປີ 2025 ດ້ວຍການເສີມຂະຫຍາຍການຮ່ວມມືຢ່າງເຂັ້ມແຂງ ແລະ ໃກ້ຊິດ.
ທາງດ້ານສະມາຄົມວິໄຈການທ່ອງທ່ຽວ ອາຊຽນ (ATRA) ລາຍງານວ່າ: ລາຍຮັບໃນການທ່ອງທ່ຽວຂອງລາວໃນປັດຈຸບັນຍັງມີລາຍຮັບຕໍ່າກວ່າອັດຕາສະເລ່ຍ ໃນກຸ່ມອາຊຽນດ້ວຍກັນ ກໍຄືໃນຂະນະທີ່ລາຍຮັບການທ່ອງທ່ຽວຂອງອາຊຽນຢູ່ທີ່ອັດຕາສະເລ່ຍ 12% ຂອງຍອດຜະລິດຕະພັນພາຍໃນ (GDP) ຫາກແຕ່ວ່າລາຍຮັບໃນພາກ ການທ່ອງທ່ຽວຂອງລາວ ກັບຄິດເປັນອັດຕາສະເລ່ຍພຽງ 7% ຂອງ (GDP) ເທົ່ານັ້ນ.
ໂດຍພາຍໃຕ້ສະພາບການດັ່ງກ່າວ ຈຶ່ງເຮັດໃຫ້ທາງການລາວໄດ້ກຳນົດແນວທາງແກ້ໄຂບັນຫາ ດ້ວຍການນຳເອົາແຜນຍຸດທະສາດການພັດທະນາດ້ານການທ່ອງທ່ຽວຂອງອາຊຽນ ແຕ່ປີ 2016-2025 ມາປັບໃຊ້ໃນລາວທັງໃນພາກສ່ວນ ກ່ຽວກັບການຕັດກິດຈະການທ່ອງທ່ຽວ ແລະ ການສົ່ງເສີມການລົງທຶນໃນການບໍລິການ ແລະ ທ່ອງທ່ຽວຢ່າງຄົບວົງຈອນ.
ທັ້ງນີ້ເປົ້າໝາຍ ສໍາຄັນຂອງປີການທ່ອງທ່ຽວລາວ 2018 ກໍຄືການດຶງດູດນັກທ່ອງທ່ຽວຊາວຕ່າງຊາດໃຫ້ໄດ້ 5 ລ້ານຄົນ ໂດຍການຈັດກິດຈະກຳ ຕ່າງໆ ທັງໃນ ແລະ ຕ່າງປະເທດ ເຊັ່ນ: ງານບຸນປະເພນີຕ່າງໆໃນ 18 ແຂວງທົ່ວປະເທດ, ການຈັດຂະບວນຄາລະວານລົດທ່ອງທ່ຽວແຕ່ ເໜືອຮອດໃຕ້, ບຸນມະໂຫລານ ການສະແດງສິນລະປະວັດທະນະທຳພື້ນເມືອງບັນດາເຜົ່າ, ການແຂ່ງລົດວິບາກ, ກິດຈະກຳປີນໜ້າຜາ, ການຈັດງານວັນລາວໃນຕ່າງປະເທດເຊັ່ນ: ປະເທດໄທ, ຫວຽດນາມ, ຍີ່ປຸ່ນ, ເຢຍລະມັນ, ຝຣັ່ງ ແລະ ອັງກິດເປັນຕົ້ນ.
[ຂ່າວໂດຍ: VOA]
[ຮຽບຮຽງໂດຍ: ຂະແໜງຂ່າວສານ]
