ໃນວັນທີ 13-14 ກັນຍາ 2017 ຜ່ານມານີ້ ໜ່ວຍງານເຈົ້າໜ້າທີ່ກວດກາການຄ້າ ເມືອງລະຄອນເພັງ ໄດ້ປະສານສົມທົບກັບ ເຈົ້າໜ້າທີ່ກວດກາການຄ້າ ແຂວງ ແລະ ຂະແໜງການທີ່ກ່ຽວຂ້ອງ ເປີດກອງປະຊຸມປຶກສາຫາລື ແລະ ເຊື່ອມຊຶມລະບຽບການຕ່າງໆ ພ້ອມທັງວາງແຜນ ການຈັດຕັ້ງ ປະຕິບັດວຽກງານການກວດກາ ການນໍາເຂົ້າ ແລະ ຈໍາໜ່າຍສິນຄ້າທີ່ບໍ່ຖືກຕ້ອງຕາມລະບຽບການ ຢູ່ຕາມຫ້າງຮ້ານ 42 ຫົວໜ່ວຍ ແລະ ສາມາດກັກຍຶດສິນຄ້າ 03 ໝວດ 54 ລາຍການ ມີມູນຄ່າທັງໝົດ 19,334,000 ກີບ ຊຶ່ງມີລາຍລະອຽດດັ່ງນີ້:
1. ປະເພດອາໄຫລ່ຈັກສະຕີນ ແລະ ທາດເຄມີ ທີ່ປະກອບເປັນອາວຸດລ່າເນື້ອ ມູນຄ່າ 2,500,000 ກີບ;
2. ປະເພດອາຫານ ແລະ ເຄື່ອງດື່ມ ມູນຄ່າ 10,552,000 ກີບ;
3. ປະເພດເຄື່ອງສໍາອາງ ແລະ ຢາສູບ ມູນຄ່າ 6,282,000 ກີບ;
ພ້ອມດຽວກັນນີ້, ທາງຄະນະກໍາມະການກວດກາສິນຄ້າ ກໍ່ໄດ້ຈັດພິທີທຳລາຍສິນຄ້າທີ່ບໍ່ມີຄຸນນະພາບ, ເຊື່ອມຄຸນບໍ່ໄດ້ມາດຖານ, ປອມແປງ, ລອກຮຽນແບບ, ມີສານເຈືອປົນໃນອາຫານ ແລະ ສິນຄ້າຕ້ອງຫ້າມ ຄ້າຂາຍ-ຈໍາໜ່າຍພາຍໃນເມືອງລະຄອນເພັງ;
ໂດຍປະຕິບັດຕາມວຽກງານປົກປ້ອງຜູ້ຊົມໃຊ້ ໜ່ວຍງານກວດກາການຄ້າ ເມືອງລະຄອນເພັງ ພະແນກ ອຄ ແຂວງສາລະວັນ ໄດ້ເອົາໃຈໃສ່ປະຕິບັດສິດ ໜ້າທີ່ຕາມພາລະບົດບາດຂອງຕົນຢ່າງຕັ້ງໜ້າ ສາມາດສະກັດກັ້ນການລະເມີດກົດໝາຍ ແລະ ລະບຽບການ ກ່ຽວກັບການຄຸ້ມຄອງການຄ້າ ແນໃສ່ເຮັດໃຫ້ສັງຄົມ ມີຄວາມຍຸຕິທໍາ, ມີຄວາມສະຫງົບ, ຄວາມເປັນລະບຽບຮຽບຮ້ອຍ ເຮັດໃຫ້ຊີວິດການເປັນຢູ່ຂອງປະຊາຊົນບັນດາເຜົ່າ ດີຂຶ້ນເທື່ອລະກ້າວ.
[ແຫລ່ງຂ່າວ: ອ ຄ ເມືອງລະຄອນເພັງ]
[ຮຽບຮຽງໂດຍ: ທ.ນາງ ຖື]
