ໃນວັນທີ 19 ພະຈິກ 2017 ຜ່ານມານີ້ ໜ່ວຍງານເຈົ້າໜ້າທີ່ກວດກາການຄ້າ ເມືອງປະທຸມພອນ ໄດ້ຕິດຕາມ-ກວດກາລົດຕູ້ TOYOTA ສີຂາວ ໄດ້ເຄື່ອນຍ້າຍສິນຄ້ານອກລະບົບມາແຕ່ເວີນຄາມ ເມືອງໂຂງ ມາຜ່ານເມືອງປະທຸມພອນໂດຍການກວດກາຕົວຈິງເຫັນວ່າ ມີສິນຄ້ານອກລະບົບທີ່ ລັກລອບນໍາເຂົ້າຈາກປະເທດກຳປູເຈຍ ໂດຍບໍ່ມີເອກະສານຢັ້ງຢືນການນຳເຂົ້າຂອງສິນຄ້າແຕ່ຢ່າງໃດ ຊຶ່ງສິນຄ້າທີ່ກວດພົບເຫັນນັ້ນເປັນປະເພດ ຢາສູບ ຈຳນວນ 44 ແກັດ ຍີ່ຫໍ້ Texas 5 ມູນຄ່າທັງໝົດ 60,068,000 ກີບ ເຈົ້າຂອງແມ່ນທ່ານ ກົວະ ອາຍຸ 45 ປີ ສັນຊາດ ກໍາປູເຈຍ, ອາຊີບ ຄ້າຂາຍ ບ້ານປະຈຸບັນ ທ່າໂພ ເມືອງໂຂງ ແຂວງຈຳປາສັກ; ສິນຄ້າດັ່ງກ່າວ ທາງເຈົ້າໜ້າທີ່ໄດ້ຍຶດເອົາມາເປັນຂອງລັດ ພ້ອມທັງສ້າງບົດບັນທຶກກ່າວເຕືອນເຈົ້າຂອງສິນຄ້າ ຕາມລະບຽບການ, ສ່ວນລົດຂົນສົ່ງສິນຄ້າດັ່ງກ່າວ ທາງປກສ ເມືອງໄດ້ທຳການປັບໄໝ ຕາມລະບຽບການເປັນຈຳນວນເງິນທັງໝົດ 3,000,000 ກີບ;
ພ້ອມດຽວກັນນີ້, ທາງຄະນະກໍາມະການກວດກາສິນຄ້າ ກໍ່ໄດ້ຈັດພິທີທຳລາຍ ຢາສູບນຳເຂົ້ານອກລະບົບ ທີ່ນຳເຂົ້າມາຈຳໜ່າຍພາຍໃນເມືອງປະທຸມພອນ;
ໂດຍປະຕິບັດຕາມດຳລັດ ວ່າດ້ວຍການກວດກາການຄ້າ ເລກທີ 508/ລບ, ລົງວັນທີ 04 ທັນວາ 2012 ໜ່ວຍງານເຈົ້າໜ້າທີ່ກວດກາການຄ້າ ເມືອງປະທຸມພອນ ແຂວງຈຳປາສັກ ໄດ້ເອົາໃຈໃສ່ປະຕິບັດສິດ ໜ້າທີ່ຕາມພາລະບົດບາດຂອງຕົນຢ່າງຕັ້ງໜ້າ ສາມາດສະກັດກັ້ນການລະເມີດກົດໝາຍ ກ່ຽວກັບການຄຸ້ມຄອງການຄ້າ, ສິນຄ້ານອກລະບົບ ໂດຍການສ້າງສະຕິ ແລະ ປູກຈິດສຳນຶກ ໃນການເຄົາລົບລະບຽບກົດໝາຍ ແນໃສ່ສົ່ງເສີມປົກປ້ອງຫົວໜ່ວຍທຸລະກິດການຄ້າ ທີ່ເຄື່ອນໄຫວຖືກຕ້ອງ, ສອດຄ່ອງກັບລະບຽບກົດໝາຍ ແລະ ເປັນໄປຕາມກົນໄກ ເສດຖະກິດຕະຫລາດ ທີ່ມີການດັດສົມຂອງລັດ ສົ່ງເສີມການຜະລິດສິນຄ້າ ທັງເປັນການປະກອບສ່ວນໃນການຄຸ້ມຄອງສິນຄ້າ, ລາຄາ ເພື່ອປົກປ້ອງສິດ ແລະ ຜົນປະໂຫຍດຂອງຜູ້ຊົມໃຊ້.
[ຂ່າວໂດຍ: ນາງ ຖື]
