ງານຕະຫລາດນັດວາງສະແດງ ແລະ ຈໍາໜ່າຍສິນຄ້າ ໂອດ໋ອບ – ໂອທ໋ອບ ( ODOP – OTOP ) ສາຍສໍາພັນສອງແຜ່ນດິນ ລະຫວ່າງ ແຂວງ ຄຳມ່ວນ ແລະ ແຂວງ ນະຄອນພະນົມ ປະຈໍາປີ 2018 ແມ່ນໄດ້ຈັດຂຶ້ນໃນວັນທີ 5 – 9 ມັງກອນ 2018 ຢູ່ທີ່ເດີ່ນຕະຫລາດຄຳມ່ວນ ເມືອງທ່າແຂກ. ເປັນກຽດເຂົ້າຮ່ວມໃນພິທີເປີດງານໂດຍ ທ່ານ ບຸນມີ ພິມມະສອນ ຮອງເຈົ້າແຂວງໆ ຄຳມ່ວນ, ທ່ານ ສົມຊາຍ ວິດທະຍາດຳລົງ ຜູ້ວ່າຣາດສະການຈັງຫວັດນະຄອນພະນົມ, ທ່ານເຈົ້າເມືອງໆ ທ່າແຂກ, ບັນດາພະແນກການອ້ອມຂ້າງ, ພາກສ່ວນທຸລະກິດທັງພາຍໃນ ແລະ ຕ່າງປະເທດ ຕະຫລອດຮອດພໍ່ແມ່ປະຊາຊົນທັງສອງແຂວງ ຄຳມ່ວນ ແລະ ນະຄອນພະນົມເຂົ້າຮ່ວມ.
ທ່ານ ບຸນໂຮມ ມຸກດາສັກ ຮອງຫົວໜ້າພະແນກອຸດສາຫະກໍາ ແລະ ການຄ້າແຂວງຄຳມ່ວນ ໄດ້ກ່າວລາຍງານເຖິງຈຸດປະສົງໃນການເປີດງານຕະຫລາດນັດ ວາງສະແດງສິນຄ້າ ໂອດ໋ອບ – ໂອທ໋ອບ ສາຍສໍາພັນສອງແຜ່ນດິນແມ່ນຈັດຂຶ້ນເພື່ອເປັນການຊຸກຍູ້ສົ່ງເສີມການຜະລິດເປັນສິນຄ້າ ໂອດ໋ອບ – ໂອທ໋ອບ ໃຫ້ນັບມື້ນັບຂະຫຍາຍຕົວ, ທັງເປັນການເປີດໂອກາດໃຫ້ທຸກພາກສ່ວນທຸລະກິດ ໂອດ໋ອບ – ໂອທ໋ອບ ພາກລັດຂອງ 2 ແຂວງ ຕະຫລອດຮອດພໍ່ແມ່ປະຊາຊົນພາຍໃນແຂວງໃກ້ຄຽງໄດ້ນຳເອົາຜະລິດຕະພັນ ຂອງຕົນມາວາງສະແດງ ເພື່ອໂຄສະນາຂາຍເປັນສິນຄ້າ ສິ່ງສຳຄັນອີກຢ່າງໜຶ່ງ ແມ່ນເພື່ອເປັນການພັດທະນາຄຸນນະພາບ, ມາດຕະຖານຜະລິດຕະພັນສິນຄ້າ ໃຫ້ເປັນທີ່ຍອມຮັບໃນລະດັບສາກົນ, ເພີ່ມຊ່ອງທາງໃນການຈຳໜ່າຍຊຸກຍູ້ໃຫ້ວຽກງານການຄ້າ, ການລົງທຶນ, ການທ່ອງທຽ່ວ ແລະ ມີໂອກາດພົບປະແລກປ່ຽນບົດຮຽນເຊິ່ງກັນ ແລະ ກັນ ເພື່ອເຊື່ອມໂຍງກັບບັນດາປະເທດຕ່າງໆ ໃນອານຸພາກພຶ້ນກໍ່ຄືສາກົນໃຫ້ນັບມື້ນັບກວ້າງຂວາງ. ເຊິ່ງມີພາກສ່ວນຈາກກຸ່ມຜູ້ຜະລິດສິນຄ້າໂອດ໋ອບ – ໂອທ໋ອບ ຈໍານວນທັງໝົດ 3 ພາກສ່ວນ, ມີ 62 ຮ້ານທີ່ມາຈາກແຂວງຄຳມ່ວນ - ນະຄອນພະນົມ ແລະ ແຂວງໃກ້ຄຽງລວມມູນຄ່າສິນຄ້າທັງໝົດ 700 ກວ່າລ້ານກີບ. ງານຕະຫລາດນັດຄັ້ງນີ້ ນອກຈາກກິດຈະກຳຈັດງານຂາຍສິນຄ້າແລ້ວຍາມຄໍ່າຄືນຍັງມີການສະແດງສິນລະປະວັດທະນະທຳ ຂອງສອງປະເທດຕື່ມອີກ.
ຂ່າວ : ມະນີວັນ
