ກອງປະຊຸມດັ່ງກ່າວໄດ້ຈັດຂຶ້ນໃນວັນທີ 24 ມັງກອນ 2018 ຢູ່ທີ່ພະແນກອຸດສາຫະກຳ ແລະ ການຄ້າແຂວງຄຳມ່ວນ ໂດຍການເປັນກຽດເຂົ້າຮ່ວມເປັນປະທານຂອງ ທ່ານ ທອງໄຊ ມັງໝໍ່ເມກ ຫົວໜ້າພະແນກອຸດສາຫະກຳ ແລະ ການຄ້າແຂວງຄຳມ່ວນ, ທ່ານ ສຸລິຍົນ ພິລາວົງ ຫົວໜ້າກົມການນຳເຂົ້າ ແລະ ສົ່ງອອກ, ບັນດາທ່ານຄະນະກົມ, ຫົວໜ້າ, ຮອງຫົວໜ້າພະແນກອຸດສາຫະກຳ ແລະ ການຄ້າ ຕະຫລອດຮອດຕາງໜ້າຈາກພາກລັດ ແລະ ທຸລະກິດທີ່ກ່ຽວຂ້ອງຈາກແຂວງພາກກາງ ແລະ ພາກໃຕ້ເຂົ້າຮ່ວມ.
ຈຸດປະສົງຂອງກອງປະຊຸມໃນຄັ້ງນີ້ ແມ່ນແນໃສ່ໃຫ້ບັນດາຜູ້ທີ່ເຂົ້າຮ່ວມໄດ້ຮັບຮູ້ ແລະ ເຂົ້າໃຈ ເພື່ອຄວາມເປັນເອກະພາບກັນໃນການຈັດຕັ້ງປະຕິບັດແຜນດຳເນີນວຽກງານດັ່ງກ່າວ ໂດຍສະເພາະຂໍ້ຕົກລົງ ວ່າດ້ວຍການຮັບຮອງ ແລະປະກາດໃຊ້ແຜນການດຳເນີນງານວຽກງານອຳນວຍຄວາມສະດວກທາງດ້ານການຄ້າ ສະບັບເລກທີ 0051/ກຂອຄ ລົງວັນທີ 25 ກັນຍາ 2017 ເຊິ່ງມີວັດຖຸປະສົງເປົ້າໝາຍເພື່ອແນໃສ່ເຮັດໃຫ້ຂັ້ນຕອນການຄ້າ ແລະ ພາສີມີຄວາມກະທັດຮັດ, ງ່າຍດາຍ, ຫລຸດຂັ້ນຂອດ, ປັບປຸງການໃຫ້ບໍລິການ, ເພີ່ມຄວາມສາມາດແຂ່ງຂັນດ້ານການຄ້າຂອງ ສປປ ລາວ ໂດຍຫລຸດຜ່ອນເວລາລົງຢ່າງຕໍ່າ 50% ແລະ ຕົ້ນທຶນທີ່ໃຊ້ນຳເຂົ້າ – ສົ່ງອອກ ຢ່າງຕໍ່າ 30% ຢູ່ໃນລະດັບໃກ້ຄຽງກັບເພື່ອນບ້ານ ທັງສາມາດເຊື່ອມໂຍງເຂົ້າກັບພາກພື້ນ ແລະ ສາກົນ, ເຊິ່ງກອງປະຊຸມແມ່ນໄດ້ຮັບຟັງຄວາມໝາຍຄວາມສຳຄັນ ຂອງວຽກງານອຳນວຍຄວາມສະດວກທາງດ້ານການຄ້າ, ການຈັດຕັ້ງປະຕິບັດແຜນຍຸດທະສາດ ອຳນວຍຄວາມສະດວກທາງດ້ານການຄ້າປີ 2011 – 2015, ວິໄສທັດມາດຕະການຍຸດທະສາດແຜນດຳເນີນວຽກງານອຳນວຍຄວາມສະດວກທາງດ້ານການຄ້າ ປີ 2017 – 2022. ພ້ອມນັ້ນບັນດາຜູ້ເຂົ້າຮ່ວມຍັງໄດ້ປຶກສາຫາລືແລກປ່ຽນຄຳຄິດເຫັນ ກ່ຽວກັບກົນໄກຂອງການຈັດຕັ້ງແຜນດຳເນີນງານ, ຫລັກການວີທີເກັບກຳສະຖິຕິນຳເຂົ້າ - ສົ່ງອອກ ແລະ ວຽກງານອື່ນໆ ທີ່ກ່ຽວຂ້ອງ.
[ຂ່າວ : ມະນີວັນ]
[ຮຽບຮຽງໂດຍ: ນ ຖື]
