ໃນຕອນເຊົ້າເວລາ 08:00 ໂມງ ຂອງ ວັນທີ 19 ກຸມພາ 2018 ໄດ້ມີການຈັດກອງປະຊຸມແລກປ່ຽນຄຳຄິດເຫັນເນື່ອງໃນໂອກາດພາຍຫຼັງການເຂົ້າເປັນສະມາຊິກອົງການການຄ້າໂລກຂອງ ສປປ ລາວ ຄົບຮອບ 5 ປີ ທີ່ກະຊວງອຸດສາຫະກຳ ແລະ ການຄ້າ ພາຍໃຕ້ການເປັນປະທານກ່າວເປີດພິທີໂດຍ ທ່ານນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກໍາ ແລະ ການຄ້າ ຊຶ່ງມີຜູ້ເຂົ້າຮ່ວມຈາກພາກລັດ ແລະ ພາກທຸລະກິດ ຈຳນວນຫຼາຍກວ່າ 100 ຄົນ.
ຈຸດປະສົງຂອງກອງປະຊຸມດັ່ງກ່າວ ແມ່ນເພື່ອສົນທະນາແລກປ່ຽນຄໍາຄິດເຫັນລະຫວ່າງພາກລັດ ແລະ ທຸລະກິດ ກ່ຽວກັບການສ້າງສະພາບແວດລ້ອມທີ່ເອື້ອອໍານວຍໃຫ້ທຸລະກິດລາວ ສາມາດຂະຫຍາຍຕະຫຼາດສູ່ສາກົນ ຊຶ່ງຈະຕິດພັນກັບພັນທະສັນຍາການຄ້າສາກົນ, ໂດຍສະເພາະ ແມ່ນວຽກງານການອໍານວຍຄວາມສະດວກທາງດ້ານການຄ້າ, ຄວາມຄືບໜ້າຂອງລະບົບການແຈ້ງພາສີປະຕູດຽວແຫ່ງຊາດ, ວຽກງານສຸຂານາໄມພືດ, ວຽກງານມາດຕະຖານ ແລະ ການວັດແທກ.
ຕະຫຼອດໄລຍະ 5 ປີ ນັບຈາກມື້ເຂົ້າເປັນສະມາຊິກ ອຄລ, ສປປ ລາວ ກໍໄດ້ສຸມໃສ່ການຈັດຕັ້ງປະຕິບັດພັນທະ ເພື່ອສ້າງສະພາບແວດລ້ອມທີ່ເອື້ອອໍານວຍຄວາມສະດວກໃຫ້ແກ່ທຸລະກິດລາວ ເພື່ອໃຫ້ສາມາດຍາດແຍ່ງເອົາຜົນປະໂຫຍດຈາກວຽກງານການເຊື່ອມໂຍງເສດຖະກິດກັບສາກົນ ທີ່ເປັນວຽກບູລິມະສິດໜຶ່ງທີ່ສໍາຄັນທີ່ສຸດຕໍ່ການພັດທະນາເສດຖະກິດ-ສັງຄົມແຫ່ງຊາດ ຂອງ ສປປ ລາວ.
ນອກຈາກນີ້, ໃນທີ່ປະຊຸມຍັງໄດ້ຮັບຟັງການລາຍງານຄວາມຄືບໜ້າຂອງການເຈລະຈາການຄ້າໃນຂອບ ອຄລ ໂດຍສະເພາະ ການເຈລະຈາໃນຮອບພັດທະນາໂດຮາ ແລະ ຜົນຂອງກອງປະຊຸມລະດັບລັດຖະມົນຕີ ອຄລ ຄັ້ງທີ 11 ທີ່ປະເທດອາກຊັງຕິນ ໃນປີ 2017. ພ້ອມດຽວກັນນັ້ນ, ທີ່ປະຊຸມຍັງເປັນການແຈ້ງໃຫ້ບັນດາຂະແໜງການທີ່ກ່ຽວຂ້ອງຮັບຊາບວ່າ ໃນປີ 2019 ສປປ ລາວ ຈະໄດ້ມີການທົບທວນນະໂຍບາຍການຄ້າ (Trade Policy Review) ຊຶ່ງຈະມີການປະເມີນກ່ຽວກັບນະໂຍບາຍ ແລະ ການຈັດຕັ້ງປະຕິບັດພັນທະ ພ້ອມທັງຜົນກະທົບທີ່ມີຕໍ່ລະບົບການຄ້າຫຼາຍຝ່າຍອີກດ້ວຍ.
ອຄລ ໄດ້ຮັບການສ້າງຕັ້ງຂຶ້ນເປັນເວລາ 23 ປີ ນັບແຕ່ວັນທີ 01 ມັງກອນ 1995 ເປັນຕົ້ນມາ ຊຶ່ງປະຈຸບັນມີສະມາຊິກທັງໝົດ 164 ສະມາຊິກ ແລະ ສປປ ລາວ ກໍເປັນປະເທດທີ 158 ໃນວັນທີ 02 ກຸມພາ 2013. ຕະຫຼອດໄລຍະເວລາ 23 ປີ ແຫ່ງການສ້າງຕັ້ງໄດ້ມີຜົນສຳເລັດ ແລະ ກາລະໂອກາດຫຼາຍຢ່າງໃຫ້ແກ່ສະມາຊິກ ຊຶ່ງຜົນສໍາເລັດອັນຕົ້ນຕໍແມ່ນ ການສ້າງລະບົບການຄ້າຫຼາຍຝ່າຍໃຫ້ມີຄວາມເຂັ້ມແຂງ ແລະ ໂປ່ງໃສ.
[ພາບ ແລະ ຂ່າວ: ກົມນະໂຍບາຍການຄ້າຕ່າງປະເທດ, ກະຊວງ ອຄ]
