ໃນວັນທີ 6 ມີນາ 2018 ນີ້ ຢູ່ທີ່ຫ້ອງປະຊຸມເຮືອນພັກ 01 ຂອງແຂວງຄໍາມ່ວນ ທ່ານນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ ປະທານສະພາແຫ່ງຊາດໄດ້ເຄື່ອນໄຫວຢ້ຽມຢາມພົບປະໂອ້ລົມຕໍ່ພະນັກງານການນຳຫລັກແຫລ່ງແຂວງຄຳມ່ວນ. ໃນການພົບປະຄັ້ງນີ້ມີບັນດາທ່ານເລຂາ, ຮອງເລຂາພັກແຂວງ, ປະທານສະພາປະຊາຊົນແຂວງ, ບັນດາຄະນະປະຈຳ, ກຳມະການພັກແຂວງ, ຕະຫລອດຮອດພະແນກການທີ່ກ່ຽວຂ້ອງເຂົ້າຮ່ວມຮັບຟັງ.
ໃນການພົບປະຄັ້ງນີ້ທ່ານພ້ອມດ້ວຍຄະນະໄດ້ຮັບຟັງການລາຍງານວຽກງານຮອບດ້ານຂອງແຂວງໃນໄລຍະ 1 ປີ ຜ່ານມາຈາກ ທ່ານ ໂອໄດ ສຸດາພອນ ກຳມະການສູນກາງພັກ, ເລຂາພັກແຂວງ, ເຈົ້າແຂວງໆຄໍາມ່ວນ, ໂດຍໄດ້ຍົກໃຫ້ເຫັນບັນດາຜົນງານທີ່ພົ້ນເດັ່ນໃນຫລາຍດ້ານ ໂດຍສະເພາະແມ່ນອັດຕາຂະຫຍາຍຕົວທາງດ້ານເສດຖະກິດຂອງແຂວງ, ພ້ອມນັ້ນຍັງໄດ້ຮັບຟັງການລາຍງານແຜນການພັດທະນາເສດຖະກິດ – ສັງຄົມຂອງແຂວງ, ຈາກພະແນກການ ແລະ ການລົງທຶນ, ການສ້າງແຫ່ງລາຍຮັບເຂົ້າງົບປະມານຂອງພະແນກການເງິນ, ການຂະຫຍາຍຕາໜ່າງການສຶກສາ, ອອກສູ່ເຂດຊົນນະບົດ ແລະ ເຂດຫ່າງໄກສອກຫລີກຂອງພະແນກສຶກສາທິການ ແລະ ກິລາ, ການສົ່ງເສີມວຽກງານສາທາລະນະສຸກພາຍໃນແຂວງ ໃນໂອກາດດັ່ງກ່າວທ່ານ ນາງ ປານີ ຢາທໍ່ຕູ້ ກໍ່ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ແຂວງສາມາດຈັດຕັ້ງປະຕິບັດໄດ້ ໃນໄລຍະຜ່ານມາພ້ອມທັງຕີລາຄາສູງຕໍ່ຜົນສຳເລັດດັ່ງກ່າວ ແລະ ຖືໂອກາດໂອ້ລົມໃຫ້ທິດຊີ້ນຳຕໍ່ພະນັກງານການນຳຫລັກແຫລ່ງຂອງແຂວງ ໂດຍໄດ້ເນັ້້ນໃຫ້ເພີ້ມທະວີການປັບປຸງບໍລິຫານລັດໃຫ້ໄປຕາມລະບຽບກົດໝາຍໃຫ້ດີຂຶ້ນ, ໃຫ້ເຂັ້ມງວດຂຶ້ນກວ່າເກົ່າຖ້າເຮົາເຮັດໂຕນີ້ໄດ້ແມ່ນຈະສາມາດຈັດເກັບລາຍຮັບເພີ້ມຂຶ້ນ, ເຮັດໃຫ້ການສົ່ງເສີມການລົງທຶນຂອງພາກສ່ວນເສດຖະກິດຕ່າງໆ ສຸມໃສແຂວງພວກເຮົາຫລາຍຂຶ້ນ, ເບິ່ງຄືນນິຕິກຳທີ່ ສູນກາງ, ແຂວງ ແລະ ພະແນກ ວາງອອກຕະຫລອດເຖິງຄາດໝາຍສູ້ຊົນສາມາດປະຕິບັດ ແລະ ສອດຄ່ອງແລ້ວຫລືບໍ່, ກວດກາຄືນນິຕິກຳໃດທີ່ໄດ້ວາງອອກມາແລ້ວຍັງບໍ່ທັນສາມາດຈັດຕັ້ງປະຕິບັດໄດ້, ຖ້ານິຕິກຳໃດບໍ່ທັນມີຜ່ານການຄຸ້ມຄອງບໍລິຫານຕົວຈິງບໍ່ທັນຄົບຊຸດ ບໍ່ທັນແຈ້ງແມ່ນສະເໜີໃຫ້ມີການອອກນິຕິກຳເພີ້ມເຕີມອີກ, ສະເໜີໃຫ້ຂະແໜງການເງິນເບິ່ງຄືນໃນການປະຕິບັດກົດໝາຍໂດຍສະເພາະການຄຸ້ມຄອງດ່ານສາກົນກັບດ່ານທ້ອງຖິ່ນໃນການໂຍະຍານການເກັບລາຍຮັບ, ຂະແໜງກະສິກຳ ແລະ ປ່າໄມ້, ສາທາລະນະສຸກ, ສິ່ງແວດລ້ອມພາກສ່ວນກ່ຽວຂ້ອງເອົາໃຈໃສ່ເບີ່ງຄືນເຄື່ອງບໍລິໂພກທີ່ນຳເຂົ້າ ແລະ ອື່ນໆ.
ລະບົບການບໍລິການໂດຍຜ່ານຜະຕູດຽວຈັດຕັ້ງປະຕິບັດແລ້ວບໍ່ຖ້າປະຕິບັດແລ້ວກໍ່ຈົ່ງສືບຕໍ່ຈັດຕັ້ງປະຕິບັດໃຫ້ໄດ້ດີ , ພ້ອມທັງຮຽກຮ້ອງໃຫ້ທຸກພາກສ່ວນຈົ່ງເຊີດຊູຄວາມຮັບຜິດຊອບໃນໜ້າທີ່ການເມືອງຂອງຕົນຈັດຕັ້ງປະຕິບັດແຜນພັດທະນາເສດຖະກິດ – ສັງຄົມຂອງແຂວງໃຫ້ບັນລຸຜົນສຳເລັດຕາມຄາດໝາຍ .
[ຂ່າວ : ມະນີວັນ]
[ຮຽບຮຽງໂດຍ: ນ ຖື]
